手機再次響起,一幅笑得好甜既女仔相出現係手機既螢幕,無錯,係Jessica打黎,佢已經打左第五次黎,但我始終都係冇聽,原因無他,就係因為把男人聲。腦海不斷出現各種各樣既念頭,為左令電話唔再響,我熄左機,掉左落床,自己就訓係地下,一訓就三日三夜。
其間Jessica有上過黎,不過我冇開到門比佢,佢不斷禁鐘,我就選擇逃避,因為我唔知道點面對佢,我好驚佢一見到我,就係講分手,所以我唔見佢仲好。直至第十二日,我訓唔著,我打開youtube,咁岩見到劉嘉亮既你到底愛誰,我播出黎聽「一個人喝醉,好想找個人來陪,我們之間有太多的誤會,愛不能再沉睡,是可悲是摧毀,我不要再為誰掉眼淚。」
呢隻歌,勾起我同Jessica既回憶,唔通中間有咩誤會,而我因為心情唔好,所以亂諗,但另一方面,我又會覺得根本我冇諗錯,佢確實係同男仔一齊,可能以家陪係佢身邊既男人,先至係佢既真愛。諗深一層,其實一切可能都係我自己造成,如果我唔衝動,唔打架,唔坐監,之後一切一切既事都唔會發生。但係以家,所有事都因為自己而改變左,到底我仲係唔係可以比到幸福佢,問題不斷係腦海浮現,點解因為一把聲,就發生左咁多事情。