既然寂寞，點解我哋唔可以一齊？//《不如相愛》: 四、白（1）

青青說：「我好少畀人真心鍾意。」
 
雖然，別人總隨便靠近她；然而若是她不喜歡的對象，從一開始她便會很冷淡，對方不至能認識更多元的她，再真心喜歡。
 
所以，她被「喜歡」的經驗，應該是少的。
 
阿行沉住氣：「呢個係男仔追女仔嘅普通情節，你無須自責，唔好覺得要攞嘢嚟同其他人換。」
 
他又搖了搖她的肩：「你咁樣會蝕底，呢個世界好多衰人，你知唔知㗎？」
 


他感到好嬲又好笑，她不應該如此愚鈍；也有點擔心。
 
阿行的一聲聲似被撥到青青的耳蝸裏，她莫名感動。
 
「你唔好咁好啦。」
 
「仆你個街！派好人卡畀我。」
 
他哄近，卻見她的眼中有水光：「你做咩喊？」
 


她擰轉頭：「好廢呀，如果我哋係小說主角，我就係嗰啲會畀人憎到仆街嘅惡毒收兵死港女。」
 
他用手背掃一掃她的臉：「我就係最靚仔最溫柔嘅男主角，所以最後一定會抱得美人歸。」
 
追求一個人，要抱住「一定能追到」的決心；做任何事亦然。
 
「下話？」
 
「瞓覺啦，要嘔隨時出聲。」
 


她笑笑，沉沉睡去。
 
半夜，青青醒過來，發現阿行已經熟睡。
 
她有一種不寒而慄的害怕，他的真誠令她充滿罪惡感，但不足以令她安心地和他談戀愛。
 
她不想改變目前的生活節奏。
 
建立關係，要有承諾，承諾等於責任，責任便是束縛。
 
束縛令人渴望離散。
 
青青摸摸阿行的髮，再次睡去。
 
翌日，她沒有再提起這件事，他再找她，亦扮作並不在房間，亦不回覆訊息。


 
再這樣下去，她一定忍不住和他在一起；始終她根深蒂固的價值觀中，她無法接受自己和沒有關係的人如此親密——即使她渴望，然而背德感十分濃重。
 
阿行不知青青為何如此，她只不發一言便離去。
 
他只好問了解女生的女性朋友，尤其是戀愛經驗豐富的伊嵐。
 
伊嵐聽了阿行的心事，嘗試確認：「你真係鍾意青青？」
 
「係……」
 
「哦，」伊嵐鎮定：「你哋而家發展到咩地步啊？講嚟聽吓。」
 
「你唔好同人講……唉，但我真係唔明佢諗咩。我哋飲咗少少酒，之後就錫咗，但第二日好似咩都冇發生過咁。」他娓娓道來。
 


他知道那幾下親吻不代表什麼，但不至於令二人疏遠吧？
 
「佢唔飲得？點解仲要同你飲？」她不屑。
 
「佢飲少少就上頭。」
 
「其實應該醉唔晒，似突登畀你錫，之後再扮唔記得吊住你。」
 
伊嵐激動，她不知何解阿行會喜歡青青，因為她手段高明嗎？男生真是如此膚淺和愚蠢？即使是他，也不例外？
 
「佢而家唔覆我message，唔聽我電話。」他不理，只頹然地說。
 
「欲擒故縱。」伊嵐越說越焦躁：「佢同你個EX有咩分別？你個EX起碼同你一齊，青青呢？吊住你條癮，收你做兵啊。」
 
「佢唔似係啲咁嘅人……」


 
「但佢啲行為係咁喎。」她冷笑：「同你咁close，引你媾佢，唔受媾，爽完就走。」
 
伊嵐的說話一點都沒有錯，其實阿行也知道，他只是憑感覺替青青辯護，然而她的所言所行——相比喜歡他，更似玩弄他，她處理這段關係的手法毫無章法。
 
「媾女係咁㗎啦。」
 
「佢咁識玩，你到時唔好喊。」
 
伊嵐不明白——她本人比任何人更符合他喜歡的條件，光是外型，就已經拋離矮小而腰部肥圓的青青百倍。可是，他偏偏只當她是兄弟。
 
愛情從來不講先來後到，她知道。
 
但是，對手比她差勁太多了——如此聽來，青青性格亦是普通的「娘娘」；因此，她很憤怒。
 


伊嵐談過很多次戀愛，但她未曾愛過「男朋友」。
 
只是，她愛的男生，眼睛一直追逐他人；她也有脆弱和不甘的時候，渴望一個溫暖的擁抱，但很快便覺得無趣，來得快、去得快，再沒有然後。
 
現在，伊嵐只在內心祈求，青青是個一百分的壞蛋，不要鍾愛阿行。
 
她深愛了很久的男生，不應又被玩弄於股掌之中。
 
*
 
阿行等到要上課的日子，一進課室，便看見青青；課室也就得他們二人，距離正式上課，還有十二分鐘。
 
「做咩唔理我？」他主動地問。
 
「幾時？」她逃避。
 
青青的冷處理似將二人的關係都放進冰格，隨便由它結冰，硬邦邦也不理，柔情似水才難以擱擋。
 
「你唔覆我message喎，我send咗好多嘢畀你㗎。」阿行向她展示對話紀錄，全部都是他在自言自語，便故作委屈：「搞到好似我係痴漢咁，係咁騷擾你。」
 
這是冷暴力吧。
 
還有欲擒故縱嗎？
 
「Hi女學霸。」她左顧右盼。
 
「冇錯，就係仙氣！」他接話：「咁你做咩唔理我？」
 
青青深呼吸：「再係咁落去，我真係會鍾意你。」
 
阿行呆一呆，青青突如其來的告白，殺他一個措手不及。他發現自己總是猜不到她的下一句話。
 
如果這是遊戲，她在佔領上風。
 
「咁咪好囉，然後我哋一齊。」他將語氣放得很軟。
 
「我唔想同你拍拖。」
 
她的行為完全是在收兵，給自己套上觀音的光澤，卻無大慈悲心；他想起伊嵐說的、關於她的所有罪名。
 
「點解？」
 
「你唔夠投入咁鍾意我。」她定神看他。
 
青青細細思考，總覺得他的喜歡是「試着喜歡」，眉頭額角之間是很想追到她，卻不是一定要愛她。
 
她說中了他的真心話。
 
阿行忽然整個身體都定格，無言以對。
 
半晌，他說：「但我好投入咁追你。」
 
他承認了，他是喜歡她，卻不敢十分喜歡；然而追求她的欲望，亦隨求之不得和相處日久而漸漸濃重。
 
青青詫異於他的回答：「鍾意同追，係唔同概念㗎喎。你唔投入咁鍾意我，你有所保留。」
 
阿行覺得她貪得無厭，無法理解她的苛求：「你又唔鍾意我，如果我咁投入，我會好蝕。」
 
「冇錯。」她洩氣：「但係，我唔會同唔夠鍾意我嘅人一齊。」
 
青青不是迷信「有愛萬歲」，然而，相信如果不夠愛，講什麼都沒有用。
 
她有自我防衞機制，成年之後，她未曾深愛不愛她的人。變得越來越膽小的她，同樣更加考慮自己，於是目中無人，要求對方首先投入。
 
見慣不同男生手段的她，不會輕易投入關係，即使動心。可能因為如此，所以，她沒有拍過短拖。
 
他沒有再說話，只拿出電腦，隨便上網；她見狀，亦不再說話，二人一同靜靜地等老師來。
 
課堂開始。
 
老師說：「今日我哋講恐懼，集中喺一啲情感上面嘅懼怕——例如心結、陰影等等。嚟個熱身先，抽張代表到自己心結嘅牌，然後同隔籬位講吓，自己有啲咩係好驚嘅嘢？」
 
老師派發了幾張卡牌，同學一人拿了一張。
 
阿行和青青對視，二人有心結，雖然並不懼怕對方。
 
剛才的尷尬仍然籠罩他們，眼見老師快行到過來，青青便說：
 
「我好驚人嚟咗又走。好多人都講過鍾意我，但係好短暫，或者其實只係輕輕咁有好感，但又成日講到好鍾意、好愛；有時咁啱我都對對方有啲嘢，但發現人哋個世界好大，有好多其他女仔，我就會好失望——即使我哋咩關係都未有。所以，唯有對方鍾意我、好鍾意我，我先會相信對方短時間內都唔會離開我。」
 
青青的每一句話都是向阿行說的，緊緊握住畫着沙漠的卡。
 
二人親吻之後，她靜下來，不斷反思；最近，她和他說話的語氣已經變化了很多，她比以前嬌嗲和時時歡笑——唯有她的愛人才會見過這一面，因而自知已經喜歡了他。
 
遲來的目成心許。
 
阿行靜靜地聽，然後說：「你講嘢好人性化。」
 
「但好唔appropriate，」她分神看一看老師，說起悄悄話：「如果畀其他人知道我同你嘅事，一定會畀人鬧爆。」
 
論到阿行講，關於「恐懼」。
 
「我覺得，自己冇畀人真心鍾意過。」他凝神看她，向她展示黑黑灰灰的毛熊卡牌：「其他人鍾意我，都係鍾意我對佢哋好。我唔敢再投入咁多……好坦白同同學你分享一件事吖。」
 
他一動不動地正眼看她：「我而家有鍾意嘅人，佢好得意、好醒目，細我兩年；我追佢，佢唔受，但又成日同我玩。我覺得佢玩緊我，我唔敢再好似以前咁——付出太多。」
 
她怯怯地笑：「你鍾意嘅女仔真係衰。」
 
他滿不在乎：「係咩？但我諗，呢種事情，總要有一個人做勇敢嗰種，我唔介意——」
 
「好，夠鐘！」老師說。
 
阿行的說話被打斷了一次，二人變回鄰座座位後，他在青青耳邊說：「我唔介意真係投入更多，令你更相信我。」
 
她瞟一㬓他，淺淺地笑，看向老師。
 
休息時間，她打開電話，回覆了他的訊息，逐個逐個。
 
阿行偷偷和青青自拍一張，傳給她。
 
之後，他們去吃飯，不着邊際地隨便閒聊。
 
阿行說：「我就嚟辭職。」
 
青青問：「點解？唔係做得好穩定？人工又高。」
 
「係嘅，但係，佢要我宣誓……」
 
「噢。」
 
「屋企人叫我繼續做，始終好工難求喎。」
 
「咁你點諗呢？」她專心看他。
 
「唔做，唔撚做，做失業人士算。」他忽然氣餒，又扮作亢奮。
 
「工冇咗可以再搵過份嘅。」
 
「啱嘅，伊嵐叫我直頭認真讀書就算，唔返工啦、咁辛苦。」他抓了抓手肘：「佢咁有錢，當然可以唔使做，但我手停口停。」
 
伊嵐時常心疼阿行需為區區幾百元奔走，她覺得錢沒有重要到要犧牲青春。
 
「叫佢包養你囉。」她笑笑。
 
「我有問過佢養唔養狗，識自己去廁所嗰種，但佢話佢只會養男人。」
 
「你都幾叻，咁耐以嚟都自己養自己。」
 
青青會過很多同齡人，多多少少也需靠家中零用錢幫補生活。每次，她認識能夠自己應付生活的人，都會感到十分佩服。畢竟，他們還是全職學生。
 
「唔係點啊？」
 
阿行不以為然，從十五歲已是這種生活模式的他，認為這便是「唔會死」的方法。
 
「好似好辛苦，返足一世工咁，會唔會？」
 
個個都當他是異類，身邊的同學、朋友，多數家境優渥，然後勸他不要再上班了，趁年輕，享受一下年輕應有的玩樂志趣。
 
但是，沒有辦法。
 
「提早適應啫，冇嘢喎。」他故作輕鬆。
 
如果他的父親沒有破產，母親不用辛勞工作，他本人也不會倔倔地將時間大把大把地花在上班。一切非他所願，但不可能逃避生活。
 
阿行轉換話題：「喂，如果追唔到你，我哋係咪冇朋友做？」
 
「點做朋友，咁尷尬。」青青快速地答。
 
「咁其實幾時先會知你哋公司請唔請我㗎？」他連續眨眼。
 
「我哋行政比較慢啲嘅，唔好意思，最快由面試起，都要等三個月。」她慢熱得似在精心熬製一鍋老火湯。
 
「咁都係剩返半個月就有結果啦？」
 
「係啊，無謂耽誤你前程，如果唔請你，都係盡快搵下一份新工好過。」她起來，與他一同將廚餘倒在筲箕：「東家唔打打西家，世界有咁多工。」
 
「可惜囉，同你咁夾，如果衰咗連friend子都冇得做。」
 
「冇計。唔肯定自己心意嗰陣就話啫，諗清楚之後仲同鍾意自己嘅人做朋友？以為仲有機嘅話，對大家都唔好。」
 
「明明就係因為你懶處理人際關係。」他篤穿她。
 
她朝他打了一個「咁你咪好醒」的眼神。
 
他們一同行路下山，話題又轉。
 
「有啲、有啲人有錢，就會睇唔起人。」青青不屑地說。
 
她的父母都從事薪金微薄的體力勞動工作，每日回到家，都已經十分疲累。多年來將一切看在眼內的她和弟弟，都在心裏發誓將來要好好報答父母。
 
但有些人，因為她的家境瞧不起她。
 
在同一個學府的人，笑過她來自不知名學校和屋邨，她滿面溫婉笑容，語氣和善地回覆：「你有錢過我咁多，有咁多教育資源，仲要考得差過我，係咪代表你真係廢啲？」
 
即使，她是一個自卑而時常比較的人，卻並不介意物質生活的缺失。
 
一分一毫都來之不易，小時候她都沒有玩具，自那時起，她便覺得吃喝玩樂的花費不是必須。她身穿中三時買的五十元的白色紗裙，出席謝師宴，別人以為那是貴價貨。所以，其實，安心便可。童年的慣性使她在物質方面不與人比較。
 
「啱啊，但人哋有錢又真係吹佢唔脹，好彩佢只能用錢睇人唔起。」
 
阿行說起，曾經有富家女追求他，說如果二人交往，她會保障他衣食無憂；更說他辛勞一生，也不及陪她逛街數天。
 
一個人富有的時候，連愛情都可以拍賣。
 
身價低者趨之若鶩。
 
「有錢女媾你？仲話肯包你？行哥仔有啲料到。」青青挑眉。
 
「如果佢靚啲都可能可以。」阿行饒有趣味地說：「伊嵐知道之後係咁笑柒我，話佢可以出更高價錢畀我做佢屋企嘅maid maid。」
 
他常常都覺得，自己需要「有錢」，才能平等地接觸愛情。
 
這不是真理，卻是他成長當中的教訓。
 
Jenny說過，母親查問身為「朋友」的他，住在哪裏、在讀什麼；
 
結論是：「唔好同佢咁close，影衰你啊。」
 
別人一知道他要不斷上班，也猜測到他有金錢需要，原本相交甚歡的女生都與他疏遠。
 
這不是誰的錯，只是，他的「條件」未能令人愛上。
 
「So sad。你係我阿媽會鍾意嗰種囉，自己搵自己使。」青青說。
 
她的母親四歲時，已在印尼凌晨三時替家裏碌蝦、打蝦肉；常常都說，女兒一定要好好讀書。
 
母親手指的關節位發腫發大，像一顆打不開的核桃，令她越來越明瞭世界規則。
 
但是，青青知道，母親十分欣賞年紀輕輕便分擔家累的人，即使，這非任何人所願。
 
「咁奇怪？」
 
「大家都窮慣，所以知係咩滋味，咪好佩服。」
 
她記得，有次，有男生送她生日禮物，然後，禮物裏面裝了一疊現金，生日卡上寫：以後她可以過富裕的生活，只要願意和他牽手。當時，她一打開，便莫名鼻酸，隨後哭了出來，一發不可收拾地不斷抽泣。
 
她覺得屈辱。
 
別人以為她窮困，便會因金錢而跪下、替他舔舔睾丸和吞下整根陰莖。
 
她退回禮物、現金，只留住那張字寫得歪歪曲曲的生日卡，提醒自己。
 
之後，與對方再無聯絡。
 
她不討厭富人，當然也羨慕他們掌握資源。但是，她滿意現在的生活，有些事情慣了，便不會覺得有問題。
 
「希望之後可以有錢啲。」阿行說。
 
「係！」青青點頭。
 
他們都不追求物質生活，然而，窮困會被看不起。被低看的感覺，怎樣都是不好受。
 
「向資本主義低頭囉。」
 
「資本主義萬歲！」
 
阿行忽然䆁懷，寬心地地笑了起來，青青和他是一路人，二人無高低之分，他不需要變得「有條件」，才能繼續與她友好——唯一的指標，只是喜歡與不喜歡。
 
所以，她明白他。
 
他因而覺得，真好。如果她真是什麼觀音娘娘，那麼他也心甘情願，要是有女生不花他分毫，卻理解和聆聽他的心思，那點感情，就送給她吧。
 
「唔躺平了！」
 
「做韭菜！」
 
青青與阿行繼續圍着未圓湖散步，環迴了一圈又一圈，以為這是度假風景。
 
和他，是否散步，亦是真正聊天。