既然寂寞，點解我哋唔可以一齊？//《不如相愛》: 五、彎（2）

翌日，阿行在Gri攤睡的草地上偶遇青青。
 
他掃了掃Gri的背，牠便慵懶地朝她打了個大大的呵欠，一副還要繼續睡的樣子。
 
阿行問：「你今日要返學咩？」
 
青青答：「莊員生日，返嚟慶祝，而家諗住走啦。」
 
他的語氣不自覺地冷淡了一點，她的臉容平靜依舊，就突然覺得她很可惡。
 


「唔好走住。」他決定，將話講清講楚：「有嘢想同你講。」
 
她一臉不解：「做咩啊？」
 
「坐低先。」阿行用手替她遮擋太陽。
 
他不喜歡和她有事、又收在心裏，他相信她願意了解和講開，大家都不是扭扭擰擰的人，不如快點講清講楚。
 
「想知你到底係點諗，我真係唔明。」
 


他的內心：屌，鍾意親啲女人都咁撚麻煩……
 
「我？做咩？」青青疑惑。
 
阿行說：「嗰日我哋出嚟行街嘅，你，好似真係唔鍾意我咁。」
 
她明明說過，她是、將會喜歡他的。
 
她努力回想，無果：「點解？」
 


他說：「你寧願對住伊嵐都唔對我，同佢換嘢食，但唔同我換，又應佢多啲。之後影完相，佢同你講嘢，你先應多啲」
 
「有咩問題？」
 
「吓，我哋熟啲㗎喎。」
 
「哥哥仔，」她沒好氣地笑：「平時唔係好成熟老積㗎咩你？你碗嘢勁多芫荽，我先唔要食。同埋啊，伊嵐講嘢你都唔理佢，咁我咪應。你講嘢伊嵐都應你，夠晒啦，無謂加把口，咁我咪聽囉。有咩問題啊？」
 
她討厭芫荽；她有禮貌。
 
「咁你都可以應我㗎嘛。」
 
「冇興趣噃。」她用一個看變態的眼神看他。
 
「咁影完相之後呢，做咩唔理我但理佢？」


 
「我睇緊相囉，啲細路仔喺度跑，睇吓邊張最好睇嘛。咁同佢又唔太熟，唔應就唔係咁好。」她向他展示那日的原況照片：「呢個妹妹係勁得意囉，成隻公仔咁。」
 
「所以你係咪鍾意我？」阿行關注重點。
 
「係啊。」青青點頭。
 
喜歡而已，心動而已，這是真話。
 
青青經常杞人憂天，害怕他或她下一秒突然離世，心聲便被埋藏，永永遠遠。
 
「我都係。」他寬心地笑。
 
阿行理解她的意思，有時，他真的感覺到她的喜歡、樂意；然而因為沒有承諾，他的安全感長期似只剩兩日份量的眼藥水，在褲袋中流浪。
 


「多謝你。」
 
「咁你可唔可以做我女朋友？」
 
阿行知道她不會在此刻答應，但他還是會問，像說：「肚唔肚餓啊？」她一定會回答一些東西，但與她接下來吃不吃飯無關。
 
「你質疑我。」青青開玩笑地說：「你因為我冇應你幾句就控訴我；同你一齊，容乜易你又處處針對我？」
 
「唔會㗎！唔會㗎。」他也裝出緊張的樣子。
 
「我哋而家咁樣唔好咩？一齊相處又開心，又冇咩壓力。」
 
「我想同你拍拖。」
 
她一副恍然大悟的樣子：「哦，你嫌而家唔可以做更多嘢？」


 
「妖，唔係講呢啲。」
 
「咁我哋而家除咗冇好親密之外，同拍拖有咩分別？」
 
「你而家係available，萬一遲啲又有男仔追你，你咪會走囉。」
 
曖昧期是你來我往的切磋，他確實享受這種甜蜜，可是已經夠了。
 
安全感和情趣，他選擇安全感。
 
「唔會，」她搖頭：「識你之後都有啦，我又唔鍾意佢。」
 
偶然，她遇到人來撩一撩她——撩而已，她不覺是喜歡，馬上變換冷漠神色。
 


「咁萬一你動心呢？」
 
「如果真係要走，咁我同你一齊咗都會㗎啦！」她說。
 
愛情的原則輕易被打破，所有死守的承諾，在某時某地某事某人的推波助瀾之下，可以異常地不堪一擊。
 
她怔怔地看着他惆悵的臉，於心不忍。
 
她知道他想要什麼，但她仍然猶豫不決。與一個人戀愛，光是心動是不夠的——她如此認為。
 
她想談長久的戀愛，久到能夠結婚以法律約束關係，久到能髮佈白雪仍相伴在側。
 
所以，她常覺得，要再考慮一下。
 
「畀多一陣我諗……」
 
「我已經好投入，好認真，你可唔可以話畀我聽，係咪我有咩唔好？」他的語氣越來越輕柔，恰似下雨天之後的微風。
 
「唔係……你冇唔好，係我唔好。」她苦惱。
 
他擁抱她，她斷斷續續地說：「我唔想你走啊……我有好多缺點㗎，你接受到？」
 
「你好好啊。」
 
「我好煩、好情緒化、好鍾意講大話……」
 
「我知。」
 
「屌你。」
 
「咁點呢？我冇因為你以上想講嘅嘢而唔開心，你好坦率，我只係因為你唔鍾意我、唔同我一齊而唔開心咋。」
 
「日子耐咗，你就會走。咁後生，可以一生一世咩？」
 
「咁你係咪想單身一世啊？」
 
「唔係，我想要男人……」
 
「妖，你唔好講得咁淫蕩啦。」他笑一笑。
 
「我琴日搵返前度寫畀我嘅情信，」她爽朗地笑：「佢話，會一生一世咁愛我、錫我，然後呢？都係鍾意咗另一個女仔。我唔想你走啊……至少，我哋冇承諾嘅話，你走嗰陣我會冇咁唔開心啩？」
 
她是自私的。
 
他捉住她的肩膀，由擁抱拉到近距離對視。
 
「所有人都有機會走，所以，我哋一齊努力，互相挽留，好唔好啊？我算係識咗你好耐啦係咪？我真係、真係好鍾意你，你同我遇過嘅所有人都唔同，我唔會輕易放手。」
 
「畀多少少時間我諗。」
 
她努力忍住一刻的情感衝動，十分懼怕做錯決定，最終交纏得更厲害。
 
很多事情都因為不夠冷靜才有後續，然而如果因此莽為，導致更壞的結果，她將無法接受；除了想得更清楚，她沒有更好的考慮。
 
講到尾，就是她渴望愛，心中有愛，但為人瞻前顧後，是個不折不扣的無膽匪徒。
 
青青的臉被瀉出的陽光濺過，她瞇着眼避開、淺笑。
 
阿行怔了一怔，她真似悠然的懶貓。他第一次覺得他們如此靠近，她整個人都十分實在，他捉得住、亦相信她的想法。
 
*
 
伊嵐拿出和青青的自拍，遞給Ryan。
 
「個女仔係呢個樣。我問你啦，畀你揀，你揀我定佢？」
 
Ryan勿勿看了一眼，他甚至都看不清別個女生的長相，便答：「當然係你。」
 
他很清楚，她只要一個答案。
 
「所以你明點解我唔忿氣未？」
 
看情敵的第一眼，就是比較、質疑、難過、不可置信、失望、不甘願；這種感覺，仍然強烈，又多了幾分酸楚。
 
「可能楊念行係鍾意佢嗰type。」
 
「咩type？。」伊嵐攤坐：「我唔係特登講佢壞話，啫係，如果畀着你，你都唔開心啦。我高又高啲，身材又好啲，又真心咁鍾意人，佢呢？生得可愛少少咋喎，戀童呀而家？都應該就嚟二十啦。」
 
Ryan撫了撫她的肩。
 
他知道她無意批評任何女生，但是，那一位，特別招她恨。
 
他也知道，這麼多年來，她只喜歡阿行。她會唸「楊念行」做親切的「阿行」，而他才不要，每次提及，他都只會冷硬地呼喊阿行的全名。
 
「鄧伊嵐世界第一。」Ryan環抱她的脖子。
 
「你真係好，永遠都聽我講嘢。」
 
伊嵐清醒，她與Ryan之間，不是愛情，只是有種恰如其分的性吸引力。
 
他對她的情感，不過也只是愛過、發現不合適、能夠各取所需。他們成為真心朋友，就是不能真心愛上對方。因此，Ryan對她的好，是出自「Friends with benefits」的名義。
 
她在他面前完全做自己，講盡真心話，她心知他不會認真質疑她。
 
不愛，就是令她舒心。
 
「講真話啫。」Ryan由衷地說。
 
「我就嚟痴線，我以為阿行分咗手之後，可以到我。所以呢一年嚟，我陪佢過，同佢一齊療傷。等佢好返啦，佢鍾意咗第個。」
 
「係會好嬲嘅。」
 
「仲要——我覺得我真係好啲囉。上一個我都冇唔服氣啊，今次唔得。」
 
這是事實，在街隨便捉一個男生問，他都會答伊嵐條件較佳。
 
伊嵐不是「八婆」，她只是隱密地跟密友分享心事，不為貶低他人，只為發洩情緒。
 
「當然啦，畀我睇多次張相？」
 
Ryan好奇起來，剛才，他沒有看清，只看到有兩個膚色人樣對鏡頭笑。
 
他說：「同你唔同類型。」
 
「係，阿行話過覺得佢生得有啲似藍白英短貓，我顯然唔係。」
 
「似寵物，咁奇怪嘅佢啲癖好。」
 
伊嵐不禁笑：「咪係。」
 
如果她不是喜歡阿行，可能，她能與青青交好，她們是聊得來的。
 
可是，可是，有些緣分，始終難得一見。
 
「如果佢哋真係一齊，你打算點？」Ryan問。
 
「我諗我會絕交咁濟。」伊嵐半開玩笑地說。
 
她認真思索，那麼多年來，她得一人是很想得到但又得不到，不能用錢買，不能用美貌吸引，不能被時長感情。
 
愛很難明白。
 
Ryan和伊嵐一起看Netflix，再沒有講起自身。