《我將一位宅女變成女神，然後再將自己變成佢隻兵》: 下集 (1)

星期六
 




因為多野做，所以留返係Hall而唔返屋企，準備開始做Paper時，室友突然問我 :『喂! 阿明! 去唔去踢波?』
 
我諗左一陣，對上一次踢波係上次著左條超緊底褲個次，自此就無再踢波，既然最近無咩點做運動，就答應左一齊去踢波。
 
落到球埸，除左我室友外，一個都唔識，覺得無咩安全感，唯有唔出聲跟住踢下算。但踢踢下先知人地係自私精黎，又唔傳波，又獨食，攪到我得個"追"字，無咩波比我上腳。最近開始踢到燥燥地，心神不定仲整親傷腳。
 
『你無事呀嘛? 你隻腳腫左起黎呀!』室友關心地說。
 
『我唔踢啦! 我返去先! 你地繼續吧!』唉，最近都唔知行咩衰運，好多事都不如意，踢個波都整親，聽日仲要約左阿雪睇電影。
 




『洗唔洗我扶你呀?』
 
『唔洗啦!小事黎姐! 你地踢啦!』說罷，我就一步一步咁柺下柺下咁行返Hall。
 
返到Hall到，真係頂唔順，痛到出汗，唯用有D冰水浸住，突然SMS MSG提示響起
 
阿雪
聽日幾點呀?
 
阿明




兩點旺角嘉禾睇!
 
阿雪
無問題! 到時見! ^^
 
阿明
^^
 
放低手提電話，雖然隻腳好鬼痛，但一諗起聽日約左阿雪就即時興奮，雖然我試過好多次同女仔出街既經驗，但都好期待同阿雪既約會，我知道我地唔可以就咁睇完電影就算，應該諗下仲有咩做，我就上下高登問，去旺角睇完電影仲有咩可以做!
 
上高登其實都係哂氣，大多數都係啪啪啪啪，其他意見都係好平凡。諗落其實同阿雪約會都係中午，我諗唔會玩到夜晚食埋飯呀? 都係聽日先算。
 
到左星期日。
 
我隻腳痛得好勁，腫左一舊野出黎，每用隻腳落地行一步，我就已經痛到叫奶媽，估唔到要約會既時侯先整件咁既野，難得約左阿雪出黎，我都唔想有咩特別改動，於是死忍出去。沖過涼執正個人就正式出發，由Hall行到去火車站個段路簡直無左半條人命，我痛到出哂汗，一細步一細步咁行，仲要有斜路，令我真係一步一驚心。時間都愈黎愈急。唯有Send sms比阿雪拖下佢時間。




 
阿明:
你係邊?
 
阿雪:
我仲幫補緊習= [ 仲未出發
 
阿明:
唔緊要! 我都係去緊! 慢慢!
 
原來阿雪都未出發，咁我就實第一個到，唔洗遲到。始終要留一個好印象比阿雪。其實之前都唔係咁著緊依次約會，但經過幾日既時間沖淡，阿靜既影像係我腦海入面慢慢淡出，反而依幾日見到阿雪又增加左我對佢既好感，慢慢又浮現返係我腦入面，所以依次約會我都幾著緊。
 
依次約會可以比到個印象阿雪，對女人黎講，第一個印象好重要，因為女人最鐘意好似D少女叫春小說咁，講感覺。由於一直都係同阿雪做事合作多，但真正獨處時間好少，其實阿雪對我印象同了解唔係太深，今次就係一個好好既機會比佢認識下我，都係一個機會比我認識下阿雪。
 
到左旺角之後，望一望個鐘都已經一點半，阿雪應該趕緊黎，見到賣飛條隊多到到好似派米咁，唯有排定隊買飛，之後阿雪黎到就可以即刻入埸睇。




 
當我排緊既時侯，摸一摸個褲袋，屌! 今次大獲，我竟然無帶錢出黎。其實我有一個習慣，就係唔會拎銀包出街，更何況我係無銀包。我次次出街只會拎八達通同身份證，再拎一舊錢出去。今次我拎左前者，但無拎後者。無錢買飛真係好樣衰，加上我岩岩係到大動作咁係褲袋搵錢，比人見到我之後走好似好樣衰，我仲要排係中間。
 
於是扮聽電話 : 『喂喂??咩呀??你到左係邊??好啦好啦 我黎接你!』
 
扮哂野行出條隊，再Send msg比阿雪
 
阿明:
係邊? 我見好多人排隊，可能趕唔切睇
 
阿雪:
駛唔駛睇遲一埸@@
 
 
阿明:




你OK?
 
阿雪:
哈哈 我OK丫 我今日好得閒 你買邊埸都得
 
阿明:
下一埸係4點半 依段時間去下街好嗎?
 
阿雪:
哈哈 都好! 不過好少同男仔行
我想掃街食野^^
 
當我睇到阿雪想話掃街食野時，姐係佢預左有下半埸同額外活動，但我無帶錢出黎，真係好樣衰。今次真係好樣衰，約人出街連買飛都買唔到，唉，個一刻真係灰灰地。
 
阿明:




好呀 一於咁話!
 
等左幾個字後，阿雪就到左。佢第一句說問 : 『係呢，買左飛未? 睇幾多點呀?』
 
我知道唔可以再遮掩，就死死氣話 : 『其實我....今日唔記得帶錢出黎...所以...』
 
點知阿雪即時笑笑話 : 『唔緊要啦! 我出住先咪得! 都係一樣姐! 我地去排隊! 』
 
個一刻望住阿雪有一種講唔出口既感覺，將我心底既灰一清就清走哂，原來阿雪一D都唔介意依D野。而且仲無比面色我睇，依然笑笑口咁。
 
買左兩張飛之後，阿雪就話 : 『離下一埸仲有兩個半鐘，一於去掃街食野! 哈哈! 我好耐無試過啦!!』
 
雖然本來我應該好興奮咁和應下佢，但因為我知道自己無錢係身，所以都係含糊咁應下佢。
 
阿雪見到我咁就問 : 『你食左野未架?』
 
『我........』
 
『我請你食啦! 哈哈!』阿雪似乎知道我仲未食野，但因為無帶錢所以唔敢講，為左保住我面子，唔想令我難堪，就主動提出請我食野。
 
當阿雪咁講既時侯，我終於知道我眼前既係一個絕種好女仔，我諗就算我同佢拍拖，情人節去M記慶祝佢都無問題，去食日式放題而去西九龍明將到食，佢都應該無問題。丫......阿雪真係好好。
 
一路行既時侯，我隻腳真係好痛好痛，但阿雪既腳步好快，我傷左隻腳開始有D跟唔到，唯有大大步咁行。去到旺角街頭，阿雪就買左好多小食，而且幫埋我買，我地兩個人好開心咁掃街食野，有時分甘同味，佢串左粒魚蛋我食，我就挨過頭埋去比佢喂我食，外人睇我地好似拍緊拖咁。
 
同阿雪兩個人一路掃街食野，一路傾計。所傾既話題全部都係身邊既八掛野，而阿雪係咁問我之前所問既問題:
 
『究竟你有冇心上人姐? 講黎聽下啦! 哈哈! 』阿雪說。
 
『嘩! 又無啦啦問依個!』
 
『想知丫嘛! 係咪上次個個女仔呀! 上次捉棋比賽個個!』阿雪原來記得阿靜既存在。
 
『我地由細玩到大架! 』
 
『車! 咁姐係點!』
 
『姐係朋友囉!』說罷，我就掉走手上既小食落垃圾桶。阿雪都跟住掉埋，我地兩個又傾又講咁周圍行街。其實我都好少同女仔去行街買衫，我全程真係得個跟字，但我從來都無介意，好多人話男人最僧就係陪女友買衫買鞋買東買 西。但我唔知點解佢地有咁既諗法，我覺得一齊行下街，陪下佢睇下，望下眼比下意見，見佢好開心咁試下衫個個樣都幾好丫，雖然真係幾消磨時間，但咁仲好! 唔洗我諗節目計劃下一步點做，而阿雪係咁試衫既樣真係好得意，明明佢想要，但一望個價錢就即刻放低，再留意一下阿雪所行既鋪全部都係D平價鋪，入面既衫丫鞋丫裙丫全部唔過100蚊。
 
『唔試下行D大店鋪?』 我試問。
 
『唔啦，好貴架! 我又無咩所謂，著咩都係咁架啦! 哈哈! 依D十幾蚊既衫都好好著架!』阿雪好開心咁邊揀衫邊說。
 
依一刻又覺得阿雪好似發緊光咁，將男人夢寐以求既"女人"完完全全顯示哂出黎，名副其實既好女仔。
 
行左一段時間，先發覺我地就黎夠鐘睇電影，阿雪唯有話 跑過去，但我隻腳........
為左唔想掃阿雪興，我就死頂一路跟住佢跑，但真係痛到仆街。
 
一路跑，阿雪一路笑住講:『估唔到我地最後都係咁趕....哈哈哈!』
 
望住佢既笑容，加上迎面吹來既風，令到佢既頭髮更飄逸，好靚。到達戲院，我地就靜靜地睇電影，本來都無咩事發生，但阿雪突然捉住我隻手。
 
『阿明....覺唔覺得好凍呀?』 阿雪細細聲說。
 
『咁你慢慢用手吸走我既熱力啦!』我細細地回應佢。
 
阿雪聽到後就笑左 :『哈哈! 衰人! 唔好係到引我笑! 』
 
睇完戲，阿雪去左廁所，但女廁既廁所長到成條隊咁，我靜靜咁係廁所出面等阿雪，望一望身旁，發覺全部都係男士係到等佢既伴侶，大家你眼望我望咁，好似就互相send 緊一個msg "咦? 你又等女呀?"
 
估唔到我都加入左成為等女一份子，個刻有好強大既滿足感。
 
等左一陣，阿雪就去完廁所出黎，對住係出面等左好耐既我，即刻表示歉意
 
『Sorry ar!要你等咁耐，女廁不嬲都好多人排!』
 
『唔緊要，我地男仔屙尿係 拉開褲鏈，屙尿，拉返褲鏈，之後就完。所以好快! 你地就唔同啦，除褲，屙尿，用紙巾清潔，著返條褲，再去洗手，梗係耐。』我說。
 
『你講漏左一點喎!』阿雪問。
 
『咩?』
 
『拉開褲鏈，屙尿，拉返褲鏈，之後就完? 你地唔洗手?』
 
『岩! 我地男仔係唔洗手! 哈哈!』說罷，我將我隻手故意觸摸一下阿雪。阿雪即時彈開話:『咦!你講真架!?』
 
『哈哈哈!』 這一晚以一個輕鬆既對答完結左今晚既約會。
 
去到火車站，踏上火車。阿雪係銀包到拎左五十蚊出黎。
 
『比你。』阿雪拎起我隻手，再放係我手中。
 
『做咩比五十蚊我?』我唔係咁明白。
 
『你無帶銀包出黎，廢事你一陣需要錢個陣無人幫到你。』
 
『唔洗啦，我都返屋企架啦。』
 
『袋住啦! 咪當應急錢! 你用唔著遲下先比返我。』阿雪仍然堅持。我唯有答應。
 
『岩先套電影都唔錯，不過個結局有D爛尾!』
 
『哈哈! 都OK 丫! 我覺得都唔錯!』
 
『你份人無論咩事都咁易滿意。』
 
『咁唔好咩? 哈哈!』
 
列車到左我要落既站，走前再問一問阿雪 : 『今晚玩得開唔開心?』
 
『開心呀! 哈哈!』
 
『咁....我地仲會唔會有下次?』我單刀直入。
 
『好呀! 下次有好電影睇，到時再約出黎!』阿雪微笑說。
 
『嗯!一於咁話! 拜!』拜別阿雪後，望住列車駛去，我握一握手上既五十蚊，不禁笑了。這一晚很順利。
 
***********************************************************************************
 
第二日，同阿Sam，阿龍阿言佢地食lunch，照舊又係到討論大家最近既近況，好似每次都開會做一個賽後檢討咁。
 
『琴日我同阿雪出左街，佢真係正到呢......慳家! 唔港女! 心地好! 細心! 屈哂機!。』
 
『嘩! 有冇咁正呀!』阿龍說。
 
『我琴日無帶銀包出黎，佢個樣完全無介意，仲出埋我個份又請我食野，走個陣驚我無錢用! 借多五十蚊黎! 你話依D女人邊到搵?』
 
『睇你個發姣樣，琴日一定好Happy 啦!』阿Sam說。
 
『梗係Happy! 出一次街就已經知道阿雪比我想像中更好!』
 
『我地平時同佢除左開會做Project都唔知佢份人咁正，不過佢個樣同身材都夠殺食。』阿龍說。
 
『係呢! 依D女真係....正到爆! 我追梗佢!』我雙眼充滿曈景。
 
『你地其實....有冇第二D話題...成日都講女。』阿言說。
 
阿Sam搭住阿言膊頭 :『講女都係每日男人既話題，媾女都係男仔既消閒玩意，你媾過女未呀?』
 
『我梗係媾過啦!!!』阿言說。
 
『WOWOWOW! 媾邊個呀? 女呢! i cant see that sir!!』
 
阿言諗左一陣，都係篤返杯檸茶:『無野啦。』
 
『挑! 方佢唔係又媾D網上妹妹仔咩。』阿Sam說。
 
『咪理佢! 拿! 總之黎緊我就同佢打好D關係，我諗住黎緊聖誕節就同佢表白!』
 
『唉! 我都想有你咁好景! 』阿龍又呻佢同阿May既事。
 
『點呀，佢又唔覆你呀? 』
 
『都係咁，成日對我又冷又熱咁，我都唔知佢想點。』
 
『小心你做佢隻兵呀!』我說。
 
『唔撚係怪? 我咩都無為佢做過野喎!』
 
『有時唔一定幫佢做野先做兵既! 好似係!』
 
『唉! 如果佢好似阿雪咁就好!』
 
『阿雪係獨一無二架啦! 你個個阿May點都比唔上架啦! 飲杯加油啦! 』睇黎我地幾個之中，我個勢係最好，天時地利人和我都有齊，加上阿雪對我完全無討厭既感覺，佢又無拍拖，生活咁Dry，我諗唔到有咩機會係唔得!
 
由於一直準備既宣傳單張終於印好，同埋宣傳莊既物資，細手舉牌都已經準備好，我地就分時間去中大每個學院地方，Canteen門口，校巴站前，種種唔同既地點，進行"哂莊"活動。由於我地早前決定左唔"嗌莊"，所以我地靜靜地手握住細手舉牌，同埋派發宣傳單張，同學生打招呼，講解一下我地理念。
 
『阿明! 你依套suit幾岩你著喎!』阿雪對我說。
 
『聽師兄講，大學D suit一定要去旺角荷理活中心買，500蚊包哂一套，仲會度身定做，好過去”豬二千”!』我地所有莊員都著哂Suit係到哂莊，我對上一次著Suit好似係中五謝師宴，我地班一致通過中7唔攪謝師宴，因為我地原校升，無必要再攪。今日再著Suit感覺好似真係大個仔咁。
 
望一望阿雪，佢一身OL既裝扮，真係好好睇。不過我覺得佢對黑絲麻麻地，阿雪雙腳不嬲都係好白，突然被一股黑色遮掩住，我真係麻麻地，都唔明D人點解咁鐘意黑絲。
 
『靜變? 點解要選你呀? 人地支莊好疊馬喎!』突然有一位學生走黎問我地。
 
『你好，我係今次參選學生會既會長劉啟明，我地相信我地政綱係可以幫助中大學生爭取更大福利，同時希望可以改善一直以來中大校政既積弊，而且我地都會攪多D外務既事，希望可以代表中大去社會發出聲音。』
 
個位學生望一望我，然後說: 『你地政綱係點我唔理，我係問你點解要選你呀? 格離莊咁疊馬，又齊人! 你睇下你地....得個幾個人企係到，人地又派紀念品! 又有老鬼撐! 你地咁寒酸! 做咩選你呀?』
 
我望一望身邊既莊員，其實好多莊員都要上堂，同埋因為個人理由黎唔到，所以得返部份莊員係到。
 
『其實我覺得參選學生會唔係鬥人多既，我地政綱........』
 
『唉! 同你講都哂氣，我話知你政綱係點! 我唔理! 我係問你 點解要我選你呀! 你答埋D 九唔搭八既野! 唉!唔講啦!』 接著，個位學生就走左。而我只好無奈地接受。
 
『你點呀?阿明?』阿雪問。
 
我突然間感到一陣失望，雖然都預左會發生咁既情境，但當真正面對時，原來係咁難受。
 
『我無野，我地繼續吧。』我強顏歡笑地回應。
 
我行去阿龍到，問 :『你打左比其他人未? 叫佢地黎哂莊。』
 
『我打左啦，佢地個個都話唔得閒，又話要趕deadline交Paper! 我都吹佢唔脹。』
 
『唉....激死。』
 
到左中午，我地轉戰去Canteen門口哂莊，雖然入冬，但中午時分天氣仲係好熱，我地又著左成套suit，真係熱到出哂汗。
 
當我地靜靜地企係到哂莊，突然聽到一股氣勢從背後湧埋黎，而且一股好有霸氣既聲音從後發出
 
" 我地...係第四十屆香港中文大學學生會幹事會候選內閣! 中連 ! 請多多支持我地 "
 
我地轉身一望，原來係阿風支莊黎左，佢地好有組織性，十多個莊員整齊地行，好似一隊軍隊列隊到埸咁，而且邊行邊叫口號，氣勢好強勁。身旁仲有一班Helper邊派宣傳單張同紀念品，睇真D，原來係印有中連既File。
 
我地莊員見到咁，都感到強大壓逼感，我地幾丁友拍埋去真係得淡笑。阿風似乎留意到我地，就行埋黎同我講 : 『咦? 你地係到哂莊呀? 真係似足你地個莊名，得個靜字! 哈哈! 攪咩呀?』
 
『我唔覺得叫到鬼殺咁嘈又係一件好好既事。』我說。
 
『咁你不如叫遊行示威既人咪鬼叫啦! 嗌莊係傳統文化! 你唔試係你蠢。』
 
『傳統文化就要跟?』
 
『你唔好扮哂突出啦，以為玩突破玩另類就會嬴? 我到依家都諗唔到你做咩可以出黎選，咩你覺得會嬴咩?』
 
『一日未選，一日都未分勝負。』
 
阿雪見到後，就拉開我 : 『我地唔好同依D人講咁多野。』
 
阿風就笑笑口講 : 『係囉! 快D聽下D女人講啦! 哈哈!』
 
『放手! 』我甩開阿雪隻手說。我覺得依下好無面，於是叫其他莊員: 『我地換個地方。』
 
『唔洗換啦，我地都唔想係到阻住D人入去買野食，我地咁多人就真係唔方便既，你地就唔同啦，幾丁友係到，阻得去邊! 哈哈哈! 』說罷，阿風就繼續帶領班人一路叫口號，一路行。
 
" 我地...係第四十屆香港中文大學學生會幹事會候選內閣! 中連 ! 請多多支持我地 "
 
不知不覺間，我腦海竟然係咁出現依一句。
 
『點? 我地仲洗唔洗轉地方? 』阿龍問。
 
『唔轉啦......係到得。』我望一望阿雪，頭先突然間被阿風激到燥燥地，大力甩開左阿雪隻手，於是我就行埋阿雪到。
 
『頭先.....對唔住。』
 
阿雪搖搖頭: 『我明既，唔洗講對唔住! 佢真係幾黑人僧。』
 
『我地支莊咁散，好似一班烏合之眾組埋一齊咁，我地莊員同莊員之間又無咩交流，你睇下今日，我地哂莊但都可以得幾丁友黎，人地就..........』 我都開始灰灰地。
 
『我地當初唔係預左咁咩?我地要係咁既環境下要嬴! 就算嬴唔到，我地都算係試過同努力過! 』
 
我明白阿雪係想安慰我，但依D大道理我聽到都覺得煩，依D好聽既說話我明白，我都識講，但我依一刻真係聽唔入耳。
 
『喂喂! Sorry!! 岩岩先落完堂! 點呀?』阿Sam跑黎。
 
『你套Suit呢?』我望住阿Sam說。
 
『丫....今日我趕住出門，所以......』阿Sam仲未講完，我就將手上既手舉牌掉去阿Sam到，然後說 : 『你係到舉，我去食飯。』
 
阿Sam見我咁大反應都有D驚訝。
 
『你係到企吧，我去睇下阿明。』阿雪說罷，就跟住我行去Canteen。
 
『依支莊真係不知所謂，究竟佢地有冇心選? 我真係睇唔到。』我邊排隊買野食邊說。
 
『唔好咁啦，可能佢地真係好多野做呢。』
 
『多野做? 唔通我地都唔多野做喎? 我地已經走左堂黎哂莊，我地都放棄左好多野，佢地呢?』我都講到有少少嬲。
 
『黎近都差唔多放假，我估情況會好好多。』
 
『黎近放假就死啦，到時邊有學生返黎? 一月就係政綱發佈會! 之後係質詢會! 我地唔多D宣傳，根本無人知我地既支莊係點。』
 
『唉.......我都唔知點算。』阿雪似乎都開始灰心。
 
而我望住前面個食物價錢牌，個腦只係浮現阿風個種串咀樣，究竟我點先可以嬴到佢?
 
雖然莊務好多，但愈唔得閒愈多野做時，一到夜晚既時侯，內心就特別寂寞。所以我開始係咁Send msg同阿雪傾計，同時每當我地好夜，接近凌晨二點時，我地見到對方仲上緊Facebook時，都會聊下對方傾計，陪住對方做Paper，陪住對方直至做完為止。所以短短幾個月，我同阿雪關係變得幾親密。
 
*************************************************************************