《我將一位宅女變成女神，然後再將自己變成佢隻兵》: 下集 (7)

晚上，知道一班中同今晚同我慶祝，內心都鬆左一口氣，因為我今晚終於有節目，唔洗屈係hall到做毒撚過生日。我打扮得好好睇睇就出發。
 
落到hall既樓下，竟然見到阿言手揪住一個膠袋慢慢行埋黎，阿言夜晚晚走黎hall到做咩?
 
『阿言! 你做咩係到!?』我大叫。
 
阿言望真d，先發現我存在，慢慢行埋黎笑笑口咁講:『你琴日話無咩節目既，我今晚買左少少野食同啤酒，諗住同你啤一啤慶祝下!』
 
我呆左。
 




我琴日求其講左一句說話，原來阿言咁上心，可能佢同情我生日無人同我慶祝吧? 阿言真係好有心，仲買左野食同啤酒，完全唔似佢平時毒毒地既作風。但係我今晚約左中同，個刻有點不知所措。
 
阿言望一望我既衣著，好明顯我係要出街。
 
『你.....約左人?』阿言問。
 
『丫.....係呀，約左中同去慶祝。』
 
阿言聽到後有點無奈，好似柒到應一應咁，即刻想搵洞收埋自己算。
 




『咁.....咪好囉! 唔洗自己一個人，咁.....我走先。』說罷，阿言就頭也不回轉身走左。
 
望住佢既身影，我個心又酸左一酸，或許阿言真係可以值得交既真心朋友。
 
『hey!阿言!』我決定了。
 
『?』阿言轉身望。
 
『不如一齊去玩啦，順便介紹班中同比你識，仲有索女係到!』
 




『唔洗啦，你班fd我都唔識......你自己玩得開心d吧。』阿言又變返一個無咩自信既小毒撚。其實阿言又唔算係毒撚，佢只係對自己無咩信心，佢既衣著同思想都好正常，同真正既毒撚仲有一大段距離，只係我地成日見佢閃閃縮縮，無咩點出聲，就標籤左佢係毒撚，係依個時代，毒撚依個詞語已經濫用了。
 
『怕咩姐!黎啦!』我知道勸阿言去係一件費時既事，於是我直接拉佢去算。
 
去到k房，見到一大班好耐無見既中同，大家都好開心，好似變返中學玩個種感情咁，對上一次既聚會好似係.....范威既生日呀? 不知不覺間，我地圍內既生日會已經變成聚舊既理由，不過咁樣都唔錯丫!
 
但我今晚仍然唔係幾開心，因為我發現阿靜唔係到，我問范威先知阿靜突然有事黎唔到，但所謂既"有事"，就唔知咩事了。阿靜都有Whatsapp我同我講sorry，雖然我內心灰過灰太狼，但我仍然扮哂開心唔緊要既語氣去回應佢。
 
係k房到，聽住班中同係到唱歌，突然唱d慘情既歌，我就更加心酸。望一望阿言，一如所料，佢怕羞到坐埋一邊睇住ktv，睇黎佢都係無膽同班人玩，我就拎左兩支啤酒叫左阿言出去一齊吹下水。
 
坐係新之城門口，好似d mk仔咁，拎住啤酒係坐係到。令到阿言有點唔好意思。
 
『唔洗怕咩! 坐啦!』
 
『嗯......其實做咩出黎既?』阿言問。




 
我視線望住外面條馬路，呆呆地說:『無......想靜下姐。同埋同你吹下水，等你唔洗咁悶。』
 
『sorry......我令到氣氛好似差咁d咁。』阿言都知自己內向性格攪到身邊既人都玩得唔夠放。
 
『傻啦，始終第一次見佢地，怕羞好正常。』
 
『嗯。』
 
『係呢，阿言你......有冇鐘意既人?』
 
阿言飲左兩淡啤酒，同我一樣視線望住出面條馬路，呆呆地回應:『嗯.....都算有既。』
 
『哈! 估你唔到喎，我識唔識得架?』
 




『唔識......佢叫婉澄.......係我網上識返黎，而家讀緊浸會。』
 
『網上識? 真係估你唔到。』
 
『你個心......一定係到笑緊我，網上識既女仔都可以鐘意吧?』
 
『我無呀，我覺得無咩問題，網上識女都係一個路徑，如果大家ok既!一齊都無咩問題。』
 
『可惜......我同佢唔可以起碼一齊。』
 
『點解?』
 
『唉.....唔知點講好，我地關係本來一直都好好，晚晚都傾電話同send sms，但對方好似受唔住依種見唔到面，唔知我係點既關係，佢要求見面。』說罷，阿言又飲左兩淡啤酒，今晚既阿言真係同平時唔同，大家又點會估到阿言都有感情煩惱，而且講野有文有路，飲左幾淡啤酒後仲散發住一股"佬"味。
 
『咁見面咁咪見面，唔係仲好咩?』我問。




 
『我......地見過面，只係我見佢，佢見唔到我。我無信心去見佢。』
 
『佢正唔正先?』唔知點解我一聽人地講感情事，我就好想知對方個樣係點，因為如果係豬西既話，基本上我都無咩興趣聽同埋唔洗出動法官大人去審理依個案件就可以結束，係就係仆街左d，但無計，男人呀嘛。
 
『佢ok呀......係我唔ok姐......』阿言感觸地說。
 
聽到阿言依句說話，突然間令我有點無言，或許依句說話都幾岩自己。
 
『咁你地依家點?』
 
『自從上次約見面.....我無出現到後，我地關係淡左好多，加上我中大，佢浸大，大家圈子唔同，自然無左好多話題去傾，而且佢好似上莊......叫電影學會，佢咁唔得閒，更加唔會理我依個網上識返黎又唔知我個樣係點既人.....』
 
『你試下盡力搵d話題去聊佢傾下計囉。』咪住......我叫阿言既做法咪姐係平時所做既野? 唉，原來阿言都面對緊同我一樣既情況。
 




阿言拎出部手機比我睇佢同婉澄既對話，發現婉澄回應字數同語氣都係幾隻字，而且仲係冷冷淡淡咁。正正就係阿靜平時對我既態度同字數。
 
不禁有點心酸。
 
『女人係一個好善變既動物，佢對你有興趣既時侯，佢可以好痴身，成日都搵你，好想知你個人係點，好想知道你更多既事。但係......一旦佢對你無興趣既時侯，佢可以好絕咁唔理你，唔搵你，你之後所經歷既事就算幾刺激幾吸引都好，佢都無興趣去知同理。面對依個情況，就算我做咩都好，都係無用。』
 
我最初叫阿言出黎，諗住教導下阿言d社交技巧，估唔到變左聽阿言既肺腑之言，一段令我心酸既說話。
 
『唉......我真係好鐘意佢......我做左好多野去叫佢，希望佢理下我......但係......都係無用......都係無用。』阿言開始講到眼濕濕。
 
我呆呆望住前面，慢慢說:『唉......我都做好多野......都係無用。』
 
『你有對像?』阿言問。
 
『算係.......同你一樣，我同佢既關係暫時只可以用Whatsapp黎維繫住，但係.....佢對我應該無哂興趣，覆我msg都好似例行公事咁，雖然明知對方唔想同我傾都無興趣傾，但係我仍然......仍然時不時搵d藉口去叫佢.......琴日開會個陣，有莊員覺得有個狗公成日whatsapp佢，覺得好煩，我諗.....對方都可能覺得我好煩。』
 
『可能我個個......都覺得我好煩。』阿言說。
 
說罷，我地兩個人無出聲，沉默咁，呆呆地望住前面條馬路，此刻，大家個腦都諗緊一個女人，一個令我地手足無措，令我地流下男兒淚既女人。
 
返到Hall後，攤係張床到，成個腦都係頭先同阿言傾計既情景，正所謂同時天涯淪落人，就算係一個小小既毒撚，都有資格有屬於自己既愛情故事，雖然係感情路上唔係咁順利，但至少可以經歷一段愛得入骨既感情故事。但阿言情況唔同我，佢同個個叫婉澄既女仔係網上識，即使經歷一段似真似假既曖味時間，但始終大家圈子唔同，基本上，阿言應該打定輸數吧?
 
但我唔同，阿靜係我由細識到大，我地經歷過好多事，我同阿靜距離其實唔遠，至少我住佢對面，至少我地讀同一間大學，雖然阿靜仲係單身，但我打從心底都開始急了，係我恨拍拖定係覺得阿靜遲早會屬於其他人? 我唔知，我只係知道自己依一刻好掛住佢。
 
我拎起手提，再打開Whatsapp，見到阿靜狀態顯示為"上線中"，我實在忍唔住，我唔想再任由個關係咁樣惡化落去，我決定將我愛意講比阿靜聽，但我唔係要表白。經歷阿雪事件後，我覺得表白係一件自殺式行為，如果大家鐘意既，根本唔需要用表白去確認關係，你表白就代表你既底牌比對方睇到，主導權就自然落係對方身上，你絕大機會會成為輸家，加上我同阿靜一直關係麻麻地，表白後既成功率仲低過同阿雪一齊，我都唔想再面對返同阿雪表白後既關係，所以我決定帶點愛意外，仲保留一些。
 
阿明:
今晚做咩唔黎既?
 
阿靜:
突然間有事，所以黎唔到丫 sorry!!
 
阿明:
你知唔知我好想見到你
 
阿靜:
why ar?
 
阿明:
你估下
 
阿靜:
點估= ="
 
阿明:
我唔明白點解我地之間關係冷淡左咁多
 
阿靜:
busy ma
 
阿明:
我地考AL個陣唔忙咩? 我地都係咁過之嘛
 
阿靜:
咁你想點
 
阿明:
我唔知
 
阿靜:
.......
 
阿明:
唉.......你依家係邊? 我想見你
 
阿靜:
返左屋企
 
阿明:
我係hall.....不如我返屋企，我想見你
 
阿靜:
依家兩點幾......好夜啦 訓啦
 
阿明:
我可以call的士
 
阿靜:
咁想見我做咩?
 
阿明:
我想見你
 
阿靜:
唔好咁啦.....你咁樣我好驚
 
阿明:
我要見你
 
阿靜:
.......我訓啦
 
阿明:
阿靜呀......
 
阿靜:
拜拜
 
個一刻，我真心覺得心碎了。同時間，我突然間清醒起黎，發覺好似一下子就將我同阿靜之間僅餘既關係都破壞埋，我諗我真係飲多左或者今晚受到阿言個故事衝擊所影響......我真係好亂，竟然失去理智咁將我底牌比阿靜睇，無論點計都好，我都係輸家。睇返d對話，成個狗公痴漢咁，特別見到阿靜個一句"唔好咁啦.....你咁樣我好驚"，令我更加覺得自己好Cheap好嘔心，估唔到岩先先過完生日，就發生依件咁既事。
 
阿明:
sorry.....
 
當我打完依句說話後，時間顯示2:35分。我放低電話，個心好驚，同時間覺得好心酸，我同阿靜之間係咪正式玩完? 但係個死因係咩? 我真係完全唔知發生咩事。過左一陣，再望一望手提，我既msg顯示為兩個Tick，加上阿靜最後上線時間為2:40分，即係話阿靜睇左個MSG，但佢無再回應，姐係話依件事已經事態嚴重，劉啟明你真係好ON9。
 
*****************************************************************
 
第二日
 
起身望一望手提，阿靜依然無回應，我帶住灰灰地既心情同班莊員係中大向地方到哂莊，派宣傳單張，希望為選戰作最後衝刺。而民主牆獲獲新鮮獲獲金，我地支莊同阿風支莊係文宣戰鬥黎好勁，大家都針對大家政剛去攻擊大家，唔少傳媒都報導今次學生會有共青團成員等等，令到唔少中大學生都開始關心一下選情。
 
『死共狗! 死返去大陸啦! 咪攪我地香港呀!』
 
我同阿雪都即時轉向傳出聲音既方向，只見阿Sam係遠處比幾位中大學生指住黎罵，大概針對好早之前認左係共青團成員件事，講真個句，依樣野真係選學生會大忌，阿Sam當面認左，除左玩死我地之外，都玩死自己。
 
我暗嘆一下，望望阿雪，見到佢想幫阿Sam解圍，我就勸阻佢。
 
『算啦，唔好行埋去，廢事攪到愈黎愈大件事。』
 
阿雪睇黎明白我講緊咩，因為我地去解釋，人地就會就地炮轟我地，因為我地根本就唔知點回應人地。我地只好係遠處無奈地睇住，只見阿Sam一臉難堪既樣，我係到諗，佢會為當日所講既野而後悔嗎?
 
『阿明，阿風佢地黎緊。』阿雪指住火車站門口。
 
『驚佢有牙丫?』我邊望邊說。
 
阿風行埋黎個陣，都注意到阿Sam比人質問既情境，然後冷笑了，應該笑緊阿Sam比人質問既情境。
 
『早晨喎，咩依排咁勤力呀? 係民主牆到不斷同我地鬥文宣戰，又係到哂莊，咩你地真係咁想嬴咩?』阿風笑笑口說。
 
『哈，唔想嬴既話選黎做咩?』我笑說。
 
『其實鬥鬥下......都就快到投票日，但我真係諗唔到你地有咩勝算。』
 
『我地無勝算，唔代表你都有。有冇聽過大學無學生會? 我諗今年應該會出現依個情況。』
 
『哈哈! 你唔好咁天真啦，中大無學生會你知唔知幾大件事? 』
 
『做咩? 你怕無得比你攪O Camp掠水?』
 
『中大學生唔係弱智，唔投你自然會投我，你都唔好哂咁多心機係到。』
 
『下話?』我扮哂充滿自信既樣出黎，而實質上我所做既野都已經做哂，我都無咩後著再下一成。
 
但阿風似乎比我拋窒左，整個對話都顯示出佢好擔心個選戰，佢雖然明知勝算好大，但仍然對我有隱憂，好擔心我仲有後著突然反咬佢一淡，加上我一副自信既樣，更加令佢有所顧忌。
 
『好! 我就即管睇下你有咩法寶。』說罷，阿風就同班莊員走左。
 
我內心即時舒了一口氣，每次面對阿風既時侯，我都緊張到心跳加速，唔知點解好怕依個人，明明我地係唔相識，只係見過幾次面，但唔知點解慢慢變成宿敵既關係，唔係......如其話宿敵，不如話我永遠都比佢食住既人，至少到目前為止，我諗唔到有邊次係真真正正嬴過佢。
 
望一望個鐘，都係時侯約班人開會，於是就叫身邊既莊員集合。阿Sam依個時侯先慢慢行埋黎。
 
『咦? 咁快走拿? 』阿Sam既態度仲係咁輕挑，睇黎佢博我地唔知佢頭先比人窒既情境。
 
『都差唔多，你打比阿龍叫佢唔洗派單張，我地去會議室開會。』
 
『我無帶電話呀。』
 
『嘖....電話都唔帶，拿! 你幫手打埋比其他莊員。』說罷，我係袋到拎部手提比阿Sam。
 
『咁鬼懶......』阿Sam就行埋一邊打電話。
 
『每次見完阿風之後，你都好急燥咁約班莊員去開會，你冇野呀嘛?』阿雪問。
 
比阿雪提一提，我先注意到依個情況，每次見到阿風之後我個心都好不安，想即時搵人商討對策，我打從心底真係好驚阿風。
 
『傻啦，我點會怕佢。只係每次見親佢都令我熱血起黎，想CALL班莊員去開會。』
 
『哈，你咁講我就放心，但你記住，我地點都會撐你，所以......其實唔洗咁Chur我地架!哈哈!』
 
我笑了 :『好好好，我地慢慢黎，咁你食左早餐未? 未既話，我地慢慢咁去嘆返個早餐之後先開會ok?』
 
『好呀!』
 
我望一望阿SAM，見佢仲咁好唔得閒咁傾電話，我都唔煩佢，我唔想成日Chur班莊員同成日點佢地做野，始終大家身份都係同等，但我就成日點佢地做野。可能佢地內心都對我好多不滿。唯有遲d開會先拎返部手機。
 
中午時侯，係會議室到。
 
『各位，我估大家都知道黎緊就係Con Day(質詢日)，到時埸面同黎睇既中大學生將會比上一次更加多人，依個係我地最後之戰，因為依次將會係我地最後一次公開面對中大學生，到時我地要回應得比上次更加好。』 當我講到最後個一句時，我又諗起自暴自棄個段時期，係我放棄左大家，而依句說話就好似同返自己講咁。
 
『今次我地睇你頭架啦! 阿明!』莊員說。
 
『對唔住大家，都係我累事，我相信到時好多人會圍插共青團件事。』阿Sam忍唔住開口。
 
『算啦，我地都唔Care選唔選到，到依一刻為止我地都夠啦。』莊員說。
 
『係囉! 選唔選到都好，我當我地嬴左架啦!』
 
『至少我地都組成一支莊，係中大學生會選戰入面留低少少歷史足印，我覺得我地已經好威水。』
 
阿言都忍唔住開口講:『我同你friend多過同我班同學仔。』
 
見到大家咁樣，好似變左上莊分享會咁，大家都講自己感受，雖然大家口說不要緊，但打從心底內都相信奇蹟，一個可以嬴出既奇蹟。我更加想嬴，已經我已經準備好迎接最後挑戰，以我會長既身份去嬴依埸仗。
 
『總之我地唔會放棄! 加油去準備自己! 到時面對問題時，希望大家可以團結一致去諗點回應!』
 
『靜變! 靜變! 一定SURE WIN!!』莊員突然Dem起Beat黎，睇黎大家都為依埸仗豁出去。
 
係Con day前一晚，我有一個人很想見，個個就係阿靜。我唔知點解有依個衝動，感覺上聽日就要去死咁，係死之前想見一見一個值得去見既人，雖然個一晚我成個狗公咁去煩住阿靜，令我覺得好尷尬，但我已經諗到藉口去解圍，就話當晚飲左酒先會咁，令到阿靜覺得我唔係故意，同埋可能有一個感覺就係酒後吐真言，唔知佢又點睇呢?
 
依一晚，我無返到hall，我返左屋企，不知不覺間我覺得好似好耐無返過屋企咁，特別係阿靜門前既景象，好似變得陌生了，但當我到來時，又覺得有種回味既感覺。好似隱若見到我地中學時，我著住校服成日走去阿靜屋企又返返我屋企咁。
 
『咔嚓!』阿靜屋企鐵閘拉開了。
 
『咦? 明仔!? 好耐無見你返黎喎!』阿靜媽媽說。
 
『係丫.....今晚突登返黎，不過屋企人好似仲未返。』我突登講屋企人未返，目的就係想去阿靜屋企食飯。
 
『傻仔! 你都好耐無黎我屋企食啦! 黎黎黎! 阿靜係入面煮緊飯! 我依家要出去同人睇大戲，你今晚黎陪下阿靜食啦!』說罷，阿靜媽媽便大叫阿靜煮多d飯，之後就走左了。
 
我企係阿靜屋企門外，阿姨無關到門就走左，面對住阿靜既屋企，聞到由廚房傳來既香味，從門外睇到屋內熟悉既傢私格局，聽到廚房內既數下拖鞋走動聲，我吞一吞口水，心跳開始加速，因為我知道，阿靜就係入面。
 
當我踏入屋內時，阿靜就大叫 :『除鞋呀!!!我岩岩拖左地咋!』
 
我即時嚇得退返出門外，只見阿靜拎住對拖鞋一野放係我面前:『著住佢先好入黎呀!』說罷就走返入廚房煮。
 
我除鞋後，邊著邊說:『其實原本都係得你一個食......唔洗煮到好似咁忙呀?!唔通你知道我一早黎食?』
 
『你都傻既，我鬼知你會黎，我順便煮多D，聽日比阿媽拎去返工帶飯呀!』
 
『哈......原來係咁。』On9都知一定唔會知我會黎啦。
 
走入屋內睇，吸了一淡氣，唔知點解每個人既屋企都會有屬於佢地既獨特氣味，可能當事人係唔感覺唔到，但局外人就會注意到，阿靜屋企其實充斥住一種獨特氣味，依個氣味我都唔知點形容，但我知道如果我閉上眼去估我身在邊個人既屋企，我一聞就會知道係阿靜屋企。
 
不知覺走入阿靜間房，電腦依舊開左，令我諗起當日既阿靜仲係一個宅女，我的最愛既網站全部都係漫畫，仲有好多咩PPS，風行網既網上電視程式，我仲記得我個陣用佢Facebook上141叫雞網Like左一個妓女。我仲記得係到用相機幫阿靜影相，再放上高登吊班狗公癮。我望到阿靜既書桌上，貼左好多好多相，都係一大堆O camp既相，同埋佢班女性朋友。以前阿靜怕怕怕羞咁，就好似一個未啄磨既寶石咁，朋友都唔多個，唔好話影相，生活圈子近乎零既佢，除左係班相到見到阿靜既樣外，根本無任何地方可以搵到阿靜既樣，佢係慢慢比我去改造，慢慢由內外變成外向既女仔。
 
屌。做咩我好似變左阿伯咁，係咁懷念過去，我只係一段時間無黎姐，就好似成世未黎過咁，彷如隔世咁。
 
『幫手放桌布啦! 』阿靜大叫。
 
『丫!』我回應。估唔到阿靜無罵我入佢間房。
 
由於我以前成日黎痴餐，所以都會幫手放桌布食飯，所以我記得D桌布放左係大廳既電視組合櫃既第二格，於是就走左去開，但當我拉出黎時，只係見到一堆藥同藥水膠布。
 
『D桌布係鞋櫃上面個抽屜到。』阿靜說。
 
我對住個櫃呆左一呆，我明白到雖然整個屋企格局無咩點變，但實質上變左好多。而我不斷回味過去既好，明顯地我對於現時既狀況唔太滿意，正如阿靜雖然外表上無咩點變，但係內心同性格就完全變哂.......變到我無法控制，無法觸摸既情況。
 
晚飯期間，我同阿靜都好沉默咁食飯，我一來係擔心緊上次件事，二來我開始感到沮喪，我好似明白了一D野。
 
『做咩今晚返黎既?聽日Con day你唔洗準備?』阿靜開口問，打破冷埸。
 
『丫......要準備既都準備好，見咁耐無返黎咪返黎囉。』
 
『加油。』
 
依兩隻字好冰冷，就好似打圓埸既對話咁......丫! 好似Msg咁，冷言冷語，幾隻字咁回應。
 
『我會.......』我都唔知點回應好。
 
阿靜突然起身走去開電視，之後邊食邊睇，無出到聲。而我都無奈咁望住電視慢慢食。雖然氣氛好怪，阿靜又無提到當晚既事，我地關係一潭死水，已經返唔到轉頭嗎? 唔得，我仲有希望，我知道一陣就會洗碗，到時我幫手洗，我地兩個人再更加迎距離獨處係廚房傾計，一定會改善大家既關係。
 
於是我慢慢食，跟住阿靜既食野速度。當佢食完先，我就同時話食完，阿靜就執起碗筷拎去廚房。
 
『我幫你丫。』我都企起身執。
 
『唔洗啦，我今日好累想早D抖，D碗聽朝先洗，你都返去啦，養足精神聽日Con day呀!』
 
阿靜依句說話表面無咩特別，但其實收埋左好多意思，一個唔想我留係到，想我快D走，但好婉轉咁講而且加一D打氣對話去隱藏個意思。
 
既然阿靜有咁既意思，我都無謂勉強。就除鞋換返對鞋走人。見到阿靜不斷一來一回咁收恰碗碟，睇黎佢都無意欲送我出去.......我關上門後，不禁傷感起黎，似乎我明白到，我同阿靜已經玩完了。
 
 
依一晚我真係覺得好沮喪，但我將我既情緒一一收埋，我唔想將依堆情緒爆發出黎，因為聽日就係Con day，我唔想有任何差池，我要以最佳既狀態去應付。阿靜件事......就暫時由佢吧，依一刻我想專注一意咁去應付聽日既Con day。
 
***********************************************************************