我嘅工作就係揀我鍾意嘅女仔拍拖: 初次約會

———
星期日

今日我好早就起咗身，自己整咗個簡單嘅早餐就開始揀衫。打開衣櫃，最煩就係唔知著咩衫去見佢...。簡簡單單著套白色T加件軍褸？好似有啲頹...，我隨手拎起咗一件恤衫，定係著恤衫好啲呢。因為而家秋天，著恤衫加件薄冷衫可以襯下文青look。揀好衫之後我打開電腦，search下cafe附近仲有啲咩地方好去，廢時我地去完cafe唔知去邊。我搵到嗰頭有個石灘，仲有條望海嘅橋都幾靚，可以車埋佢過去行下海邊。我順便睇下cafe附近邊度可以泊車，做好咗啲資料搜集之後就上youtube hea下時間。我好耐冇試過星期日咁早起身，平時一定係訓到勁晏先捨得起身。

「早晨~」我whatsapp Cherine，望一望鐘，而家原來先十點半。我一起身冇同佢講早晨係因為我唔想佢知我八點幾就起咗身，到時佢問起我點解咁早，我又廢時解釋。
「早晨呀~」佢過咗兩分鐘就覆咗我。我地今日約咗2點半，因為佢話佢想係屋企食埋晏先出嚟。
「我一陣兩點幾揸架車過嚟啦，你想我係邊個位接你？」我問。我知道佢住荃灣，但仲未知佢住邊個屋苑。
「我近荃灣西嗰邊呀，一係我一陣同你講我係咩位？」
「可以呀，到時我打比你啦」


「嗯～See you」佢比咗個單眼嘅emoji我，再加咗隻白色嘅熊仔sticker。
「See you lah~」

我執咗一陣嘢就出咗門口，去荃灣西行青葵公路應該好快就到。我泊咗架車係荃灣西，然後係車上面玩下手機。
「我到咗荃灣西站附近啦～你得就同我講啦」
「我差唔多啦...！等多我一陣，sorry ah」佢話。
「唔緊要呀，你慢慢啦！」我連咗車入面嘅藍牙喇叭，隨便播咗啲歌。

望日落在極處出現 沉下去一息間天已黑



正呀RubberBand～我係車入面望住出面好好天，好似慶祝緊我同Cherine第一次正式出街嘅日子。而家嘅我心情有少少緊張，但又好期待，希望今日順順利利。
「抱起了幾千攝氏陽光 來讓相戀近乎熱燙～」我忍唔住跟住唱咗幾下。
「叮～」
「我落咗樓啦，你泊咗係邊呀？」佢Whatsapp 問。我直接打比佢。

「喂？」一打過去就聽到佢把靚聲。
「係邊呀你～？」我問。
「我行到荃灣體育館嗰邊呀」
「哦..我係如心廣場二期出面，一係我泊係地鐵站D出口嗰邊？應該近你啲」
「好呀～你等等我，我好快到啦」


「傻啦慢慢啦，唔急～」我好溫柔咁話。
「好啦～係喎，你車牌幾號？」
「BX18....，全黑嘅xx」我講咗車牌同車款比佢聽。
「好～掰掰～」
「Bye～」我有啲唔捨得咁收咗線，但諗諗下，我一陣就見到佢啦。

過咗一陣我見到佢行緊過嚟...，佢應該認到我架車。今日嘅佢著咗一件白色嘅吊帶背心仔，下身著咗條短牛仔褲，隻手拎住一件薄褸。
「你唔凍咩～」我等佢上咗車之後講。
「唔會呀～而家幾好太陽，同埋我有褸」佢舉一舉起佢件褸。
「哈哈件褸咁薄～著咗都凍啦～」我邊講邊鬆手掣，然後開車。
「哈哈唔怕啦～」我地邊傾計邊揸車，過咗一陣就去到間cafe附近。我泊好咗車，然後同佢一齊入去。

「呢度好似靚過睇相喎～」佢細細聲講。
「我都覺，不過我都未嚟過」我話。然後佢去坐低，我去行出去落單。我地叫咗一杯flat white一杯latte，然後佢隻眼不斷打量緊間鋪。
「你好似好鍾意呢度喎」我笑住話。


「唔錯呀～個feel幾好。呢啲cafe係我會想坐好耐嘅cafe～」佢話。
「咁就要睇埋佢啲咖啡好唔好飲啦」
「都係～你岩」佢話。我等緊嘅時候隻眼間唔使都會望下佢心口，因為佢著背心著到事業線出咗嚟....。我吞一吞口水，然後去拎咖啡。

「哇～咩嚟嫁呢個？」佢望住杯啡笑一笑。
「花嚟㗎～」我望一望佢杯咖啡。
「係咩..咁搞笑嘅～你呢？」佢拎我嗰杯嚟睇。
「駱駝嚟？」我話。
「係咩？唔係草泥馬嚟咩？」
「傻妹...！哈哈，佢有駝峰嫁～」我笑咗。
「唔理呀...係草泥馬..！」佢個樣好可愛。
「咁我去問下個咖啡師囉～」我講笑咁講。
「好呀～你問呀」佢話。
「講笑炸...，我驚人地笑你呀」
「人地笑你炸～肯定係我岩！」佢好有信心咁話。


「咁如果係駱駝咁點先？」
「如果係駱駝....我請你食飯！」佢話。
「好！如果我贏，下次出嚟你請我食飯」我加句下次出嚟，約埋佢下次。
「好呀～」佢伸咗隻手指尾出嚟。
「一言為定～」我拎咗隻手指尾勾住佢，然後我地手指公對手指公。佢隻手好白滑，手指都好幼...。今次，係我第一次手指貼實佢手指...，唔知點解，好緊張。

世界沒有光 火花如驟降
靠我掌心給你釋放