我嘅工作就係揀我鍾意嘅女仔拍拖: 變故

「喂..！做咩啦」Kylie見我一路都冇咩點講嘢就話。
「冇呀～真係冇嘢，我地食咩呀？」我問。
「好啦..，我諗下先」
「食泰國嘢？我呢度附近有一間幾好食」我話。
「可以啊，反正我食咩都得～」
「好，咁就嗰間啦」我地一路係灣仔嗰條長天橋行，行咗大概10分鐘到，就到嗰間泰國嘢。沿途都有唔少人會望佢，因為佢今日著咗件黑色嘅背心仔，外面披咗件好薄嘅長袖冷衫。背心偏緊，但心口個位唔算包得好實，所以條事業線若隱若現…。我行行下都間唔中望一望佢，然後好快就收返我嘅眼神。可能係因為佢今日咁著，搞到佢同Jensen嘅互動令我好唔舒服。

入到餐廳我地叫咗野食之後就吹下水，順帶一提，佢坐低咗之後，我直望都係望到佢少少嘅北半球。其實佢對波唔算大，不過佢皮膚好白，加上黑色小背心，好容易就令人有遐想。
「哈……呼…」Kylie打咗個好大嘅喊路。
「好攰呀？哈哈」我笑佢。


「最衰都係你囉…，琴晚搞到咁夜..」佢話。但係佢講完之後隔離枱望用一個好神秘嘅眼神望住我地…，我諗佢地誤會咗啲嘢…
「咩搞到咁夜….，我搞咗啲咩…？」我強調咗個「搞」字。
「…咩呀….，頂你！」佢終於意識到佢講啲令人誤會嘅嘢，塊面紅晒。
「我咩都冇講呀～」我笑笑口咁望住佢。
「喂也..！頂..我唔係咁嘅意思呀..」佢不斷想解釋。
「哈哈知啦知啦，最衰都係我搞咁夜啦～」
「喂..！」佢打我膊頭。
「哇！..痛呀..」
「哼，自己攞嚟～」佢扮嬲咁話。
「好啦好啦，最多請你啦呢餐」我話，雖然本身都諗住請佢。


「嘿～咁就算你啦」佢又笑返。
「不過你都唔好成日打人啦，女仔人家唔可以咁粗魯～」
「邊有成日，我淨係打你炸嘛～鬼叫你恰我！」佢話。
「係咩，你唔係會打你同事Jensen嫁咩」我又表現到有啲呷醋。
「邊度有..，我先懶得打佢」
「哦～」我話。
「做咩成日提起佢喎，我地普通同事嚟炸..」佢話。佢解釋其實對我嚟講係一種暗示，因為至少係我面前會想同其他異性劃清界線。我緊係知道佢地唔係係埋一齊，但由Kylie口中得知，個心都安樂啲。
「我知呀～我冇講啲咩呀」我講完飲咗啖水。
「扮哂嘢…」佢細細聲講，但我聽到。
「下？」我扮聽唔到。


「冇嘢呀」
「哦..，好啦」我話。
「你唔眼瞓嫁咩？」佢想轉話題。
「眼瞓呀，不過冇你咁早起，你應該好辛苦啦」
「哇..我今朝一聽到鬧鐘聲，我真係有股衝動想辭職」佢好似真係好攰。
「有冇咁誇呀？」
「你緊係未試過瞓得兩個鐘就直踩全日啦..」
「試過～不過係讀大學嗰陣。我諗我而家都真係未必得..」我話。
「你呀..！下次真係要話比我聽已經兩點呀，唔係傾傾下真係唔覺。搞到今日好辛苦」
「都唔知係邊個唔捨得收線～」我話。
「你囉！唔關我事喎」
「下話？」
「下話下話」佢做咗個反擊嘅樣。
「哈哈，小學雞」我話。
「你就小學雞！」


「係呀係呀」我地打打鬧鬧嘅時候嘢食就到。
「食嘢啦你～」佢拎起隻叉講。
「得啦得啦」我笑一笑。
「呀…，我唔食青瓜嫁…」Kylie話。佢個海南雞飯有青瓜嘅配菜係隔離，平時啲配菜會隔好遠，但係唔知點解今次碟嘢啲青瓜同啲雞有少少撈埋咗。
「係咩…我都唔食嫁喎..」我話。
「下…我而家連啲雞都唔想食」佢扁嘴，個樣勁可愛。
「你食我呢碗啦，我過嚟之前食咗啲嘢啦」
「下..，唔係咁好喎」
「得啦你食啦」我張碟嘢推比佢。
「咁….好啦，我食啦」
「食啦～」我笑一笑，然後望住佢食嘢，當然都順便望下佢心口..。

「….我唔慣有人係咁望住我食嘢..，有啲尷尬」佢話。
「哈哈，好啦我叫啲小食啦一係」
「嗯！我又要！」


「咁為食嫁！」我話。
「為你個頭…咁人地真係肚餓…」
「你咁大食嫁？哈哈」我語帶相關。
「係嫁～好多人都以為我食好少，但我可以食好多嘢嫁！」佢好自豪咁講，但聽唔出我講咸濕嘢。
「叻啦～」我將口入面嗰句「肥死你」吞返入肚，因為我記得咁講佢會唔開心。
「咁我要呢個，同埋…要埋呢個！」
「好～」我叫完嘢食就去咗廁所。返嚟嘅時候我見到Kylie 個樣有啲奇怪，好似有少少嬲，又有啲唔開心。

「咦，小食嚟咗啦？」我問。
「嗯」佢dup低頭講。
「做咩啦..？」
「冇嘢，我差唔多走啦，夠鐘返工」
「下..！咁快..？你未食啲小食喎」我話。
「冇胃口」
「…」


「咁我走啦，我payme返你」佢面冇表情咁講。
「…Kylie…！」
「你有未接來電」佢講完就直接走咗，完全冇理我。
我一頭霧水，然後打開手機…。仆街..！係Cherine打比我。而我一直都冇轉過Cherine係我手機嘅名，嗰個名係我地拍拖嗰時由佢幫我set嘅。個名係「我心入面最靚嘅女人」，然後後面有個心心。

大撚鑊…Kylie一定覺得我有女朋友…。

我沒有說謊 我何必說謊
妳懂我的 我對妳從來就不會假裝