Q:「交叉仔,多謝你!你太好人喇!」
我:「喂,又咁叫我…咁我叫返妳…QQ女!」
Q:「嘻嘻,乜你都知我好cute cute咩?」
佢知道可以上嚟我度,當堂開心晒,重兩隻手托住自己下巴喺度扮花,真係服咗佢,我諗佢都可以叫做非典型女神咯,但係,佢平時都唔係咁嘅…
我:「咁妳想幾時過嚟?」
Q:「咪而家囉,重要等乜?」
我:「吓?咁我都要執下屋先㗎…做下樣都好吖。」
Q:「妖,咪扮嘢啦,最多未通地鹹書,我承受到㗎喎,唔使擔心。」
我:「妳唔好扮Q啦,呢個年代重邊有人睇鹹書㗎喎,差唔多執晒啦。」
Q:「我點知喎,我都唔識呢啲嘢嘅。」


我:「之但係,我哋一齊行,實俾人講㗎喎。」
Q:「得啦,我哋前後腳行,隔返半條街,唔會有人留意到嘅,有邊個會信我嚟你屋企吖。」
係囉,都唔知佢搞乜,點解要嚟我屋企喎,不過佢上嚟又的確唔會對我做成太大打擾,我諗佢都係離家出走或者屋企有啲事嚟一兩日落腳㗎啫,唔好諗太多。
就係咁,佢跟喺我後面行,最後入到嚟我間屋。
我當然第一時間走入廚房執返晒啲公仔麪包裝袋,點心膠兜嗰啲掉落垃圾袋,揼出垃圾房。
Q:「得啦,你唔使咁緊張喎。」
如果係屋邨妹上嚟就話啫,對女神不敬好大罪㗎…
我:「無呀,橫掂都要執,我順便啫。」
Q:「嗯,我話畀你聽我做乜無家可歸啦。」
佢坐喺張殘到爆嘅兩坐位布梳化上面,呢個畫面真係太唔夾,好大衝擊;嚴格嚟講只係得返一個坐位,因為有一邊都俾我放晒啲漫畫呀,足球雜誌嗰啲無謂嘢。


咁我咪坐喺張食飯膠凳上面聽下佢講乜囉。
Q:「我老竇…佢…借孖展抄Bitcoin期貨輸晒啲錢…」乜話?Bitcoin都夠高風險,重要係期貨?借埋錢炒添!咁同攞全副身家喺蘇聯輪盤買單冧有乜分別?可以咁玩㗎咩?
我:「咁輸咗…都係破產啫,唔會住都無得住呀?」
Q:「唔係經銀行㗎,嗰啲地下賭場嚟,我老竇驚到即時賣咗層樓,叫我媽帶埋我走,自己著草離開香港,我哋而家都搵唔到佢。」
乜…真係咁大鑊,分分鐘俾人斬死㗎喎…
已有 0 人追稿