我怎可能是女神👸🏻獵人🏹（第一季更新至斷更為止）: XI

我：「欸…唔好意思，妳…有零用錢㗎可？」
Q：「得返…好少少，唔知之後會唔會收到。」
我：「咁…妳戶口總會有啲錢掛？」
Q：「無呀…我戶口嗰幾千蚊…阿媽已經攞晒出嚟畀舅父做我嘅生活費…」
我：「唔係呀…富家女戶口竟然得幾千蚊？」
從來無諗過，正牌女神如佢個戶口嘅金額係會同我呢個屋邨仔一樣，而且已經一鋪清袋。
Q：「我平時都唔會缺錢，又點會儲錢喎。」
我：「咁妳媽咪…結咗婚咁耐，點都會攞咗筆錢自己揸手㗎？」
Q：「應該就無，我媽大學未畢業就生我出嚟，然後嫁人，成世都未返過工，老竇都從來無畀過任何錢佢管…」
咁我開始明，點解佢哋一出事就可以掉低個女，甚至阿媽會即刻投靠第二啲男人。




咁都幾論盡，雖然我間屋乜都係自動過數唔使我出錢，但係食嘢總要錢㗎…如果Queenie一直無資金來源，咪要我出埋佢嗰份？我每月二千幾飯錢加零用，唔夠喂飽我哋兩個人㗎喎…
Q：「點呀？你諗緊乜…」
我：「無呀…諗下以後嘅生活。」
Q：「係咪計唔掂？如果唔得…我都係返去我舅父度，唔好麻煩你喇。」
我：「唔得，話過會幫妳，我會諗掂佢。」
佢個樣有啲疑惑，但又帶住感激嘅眼神望住我。
今次真係下巴輕輕，話雖慣咗一個人生活啫，但要照顧多一個人，就係唔同嘅層次，而且資金無多到；以前氹細蚊開心，手鬆嘅時候都係嚟個茶餐廳扒餐，去旺中買件衫買對鞋畀佢，手緊嘅話就都係M記或者各大餐廳嘅下午茶餐啦；如果呢啲偶一為之嘅消費會變成常態，點搞好？而且佢係高貴嘅右女神，我都唔知點算…
我：「嗱…我屋企就係咁㗎喇，一眼睇晒，妳自己熟習下環境啦…當自己屋企就得…因為真係妳屋企嚟。」
咁佢都好大方轉個圈睇下我屋企有乜。
Q：「咦，原來你鍾意砌LEGO㗎？」




佢指住我電腦枱上面一左一右嘅加勒比海盜船。
我：「係呀，不過呢啲唔係LEGO嚟…」
Q：「吓，點會呀，明明就係LEGO。」
我：「假㗎，翻版嚟，係叫樂拼，妳應該無聽過。」
Q：「啊！就係LEGO神奇地喺大陸打贏官司，拉人封艇嗰間！但係香港唔係俾海關掃晒㗎咩，點解你會有㗎？」睇嚟高尚人家嘅女係會睇新聞，我都係全靠鋪頭老闆話我知先知。
我：「無呀，好耐之前，深水埗玩具街買㗎，個老闆同我講海關就掃唔想留，平放畀我，叫我攞多幾盒走，我重有兩三盒未砌…」
Q：「你都幾醒喎，睇落同LEGO無乜分別啫。」
我：「睇落無乜，無咁good fit囉，可能要磨下同埋用膠水幫下手。」
佢攞咗隻放喺手，我都幾驚佢跌散。
Q：「係嘞，咁我今晚瞓邊呀？」




我：「我都唔知呀…呢張我張床，呢張我老竇同埋我阿婆之前瞓。」
兩張床就放喺入門口嘅一左一右，左邊係我嗰張，組合床嚟，上面有衣櫃嗰啲，右邊老竇就咁一張大少少嘅木板床，好清好簡潔嗰啲。
Q：「呀！得塊床板嘅！」佢坐喺老竇床度講。
我：「我老竇同阿婆都鍾意瞓床板，所以咪…嗱，我呢度有塊三吋墊，都好少少嘅。」
佢走過嚟又㩒一㩒，好似啲人睇樓咁。
Q：「勉強啦…好過無嘅…」
我：「咁我今晚，瞓老竇張床啦…」
Q：「梗係啦！你唔係諗住同我瞓呀？」
我：「咪搞，一齊瞓無得食，重衰過自己瞓。」
Q：「點呀，撩架打呀！」
我：「唔敢，就係驚同妳喺一張床俾妳打死…咁我搬開啲嘢先啦，妳應該唔慣。」
都係啲漫畫，遊戲攻略書嗰啲。
Q：「換返啲毛公仔落嚟就差唔多…呀，張床好大唚你嘅味呀！」
我有預感，今次我將會有排煩。