我怎可能是女神👸🏻獵人🏹（第一季更新至斷更為止）: Thirty

於是乎我哋就好似平時咁一齊行去青年中心。
去到見到有啲其他學校高form大哥哥喺度打緊乒乓波，江湖規矩一齊放學，做細嘅要讓大嘅打完一圈先，之後佢哋就會讓枱或者等你跟隊。
咁我哋就自自然然開張康樂棋枱嚟㧻棋先，有得玩啲唔使爭嘅嘢咪玩嗰啲先囉。
我：「我玩到六點要走㗎喇。」
健：「吓？你係咪病咗呀？我就話要七點返屋企食飯啫，平時係你捉住我叫我玩耐啲，或者叫我食完飯落嚟再玩過㗎喎。」
我：「無呀，約咗人打機，屋企WiFi快啲…」
健：「咁神奇…識到女？」
我：「邊係呢，星期五公會戰嘛，啲女咁廢我點會同佢哋打喎。」
於是我哋就開始㧻…
健：「喂！張枱斜咗嚟我呢邊喎，呢局唔計…」




第一局。
健：「綠色唔旺我，換位，我用橙色。」
第二局。
健：「妖，膠棋你特登擦隻小回畀我，換木棋！」
第三局。
健：「不如…我哋交換枝Q？」
第四局。
認真，我經常性喺度四點怐到十點，每一粒棋嘅特性我都瞭如指掌，打落張枱邊條木紋可以小回一Q入窿都認得，有時八點後啲學生已經走晒我都會開張枱出嚟自己同自己打，邊有咁易贏我。
我：「我差唔多要走喇。」
健：「頂你吖！割禾青！咪走！」




其實我又未走住嘅，但通常一去到呢啲moment，我哋呢啲死細路，傻仔就會圍住張棋枱跑…
中心另一條規距就係喺遊樂區追逐只要唔撞到人，唔影響到人，唔打架嘅話職員係唔會嚟處理。
慢慢我哋就將條跑道延伸去到乒乓波枱，跑呀跑呀跑，四五個圈到。
「頂你！你兩條撚樣好撚煩呀，畀你哋打喇！」
我：「唔係…我差唔多走喇。」
江湖事江湖了，行之有效，邊使大人插手。
通常呢啲地方唔係鬥邊個曳，鬥邊個惡，鬥邊邊多人，而係細嘅通常聽大嘅話，試過有啲黑社會細飛都要俾校服大師兄KO，因為大人插手大家都知幫邊邊。
咁我呢，係讕街啫，唔係曳，啲師兄就算唔知點稱呼都會周不時撞到，無謂第時面阻阻，所以佢哋一發脾氣我哋兩個都即時收咗步。
健：「最衰都係你，叫咗你唔好走！」
阿健埋嚟扯住我個袋拉咗我去電視機梳化位度。




簡單嚟講即係俾我走，坐多陣咁解啫。
健：「喂，搞乜鬼你個袋咁重嘅？」
我：「欸…無呀。」
今日聖誕聯歡當然唔會孭平時書包，除非你想俾全校笑鳩你唔記得今日聯歡照執書包返學，唔係講笑，真係年年都有一兩個呢啲怪胎；咁我就拎住個尼龍布索繩手抽袋。
健：「咦…呢個…點解，個五香肉丁會喺你度？！」