我怎可能是女神👸🏻獵人🏹（第一季更新至斷更為止）: 100010

我：「嚟喇！嚟喇！」
我飛奔去門前打開木門再推開埋鐵閘。
「你好，細佬，麻煩喺度簽收啦。」
我：「好！唔該晒郵差叔叔！」
「欸…其實我係速遞員。」
我：「唔緊要啦，我話你係聖誕老人都得。」
「聖誕快樂呀。」
就係咁，我抱住一個好大嘅紙皮箱行返入屋，上面有好大隻嘅amazon字樣，個箱比起我想像中重要大，都有少少重手。
Q：「哈，有聖誕禮物收，個樣開心得你吖。」
我：「第一次收到咁大個盒，梗係開心啦！」




Q：「重開心過見到我剩係著住內衣。」
我：「點同喎，嗰啲唔係禮物，無得拆…」
Q：「…，得喇，你估呢盒係乜嘢嚟？」
我舉高放喺耳邊輕輕搖，有啲細粒物件嘅碰撞聲，質感係粒唔係塊，所以唔係模型嚟。
我：「我諗係LEGO！希望係正版嚟啦。」
Q：「吓，amazon又點會有翻版呀？」
我：「咁唔係翻版，可能係MEGA BLOKS嚟嘛。」
Q：「得喇，知你開心仔，咁我去洗碗啦。」
好彩Queenie都肯洗碗，咁我就唔使咁辛苦成晚喺度做，而我就抱住個大箱坐喺張床上面感受佢嘅份量，唔知會有幾多粒呢，應該起碼都六七百，要砌我幾粒鐘都似，諗起就覺得興奮。
Q：「咦，你重坐喺度嘅？唔拆禮物？」




我：「都未到聖誕節，過多幾日先啦，係老竇為咗穩陣起見所以先提早買嘅。」
老竇雖然同我唔多見面，佢亦都係一個唔太鍾意講嘢嘅人，不過對我算幾好嘅。
Q：「估唔到你咁等得喎，我重以為男仔個個都好猴擒，一見到禮物就會即刻留晒口水咁拆。」
我：「係媽咪叫我做人唔可以太心急。」
Q：「唔好意思…多口問句，你媽咪係幾時離開㗎？」由好細個開始，身邊嘅朋友都知我無咗媽咪，但開口問佢幾時走嘅Queenie係第一個。
我：「我好細個嗰陣，重讀緊幼稚園，五歲到。」
Q：「吓？！你媽喺你五歲同你講嘅嘢，你可以記到而家，重要咁聽話？」
我：「梗係唔係，五歲細路聽乜都耳邊風㗎啦。」
Q：「咁佢可以點同你講？報夢？」
我：「唔係喎。」




Q：「唔通你識通靈嘅？」
我：「好心妳唔好睇咁多小說漫畫啦，我個樣都唔似呀…」
Q：「咁佢可以點同你溝通…」
我：「嘻嘻，秘密嚟。」
Q：「唓，讕神秘！」
我：「都唔係嘅，可能好快妳就會知點解㗎喇。」
媽咪，唔知點解由前日開始有個靚女嚟咗我哋屋企住喎，不過妳放心啦，我唔會亂嚟嘅，都係只可遠觀而不可褻玩，就算望都係偷偷哋㗎咋，唔會令到佢覺得唔舒服，希望呢個家畀到溫暖佢啦。
我：「弊！頭先剩係顧住煮嘢，唔記得晾衫添。」
Q：「都係一陣啫，咪而家晾囉。」
我：「你使唔使晾返自己嗰啲先？」
Q：「啱啱洗完碗咋…你晾啦。」
我：「但係你啲底衫褲…」
Q：「哎呀，你咁凝住凝住做乜啫，掉落去嗰陣你都摸過晒啦，知你鹹濕仔喇，都話鍾意咪攞去用囉，益晒你啦，以後啲底衫褲交晒畀你處理。」
唓，晾咪晾，我都係懶唔想郁想攤下啫，鬼得閒攞妳啲底衫褲嚟用喎；唉，再咁搞法，以後我見到女仔走光睇怕都唔會有反應…
今晚無乜特別，最特別係我連個amazon箱放埋上床一齊瞓覺，而我都開始慣咗屋企入面多咗一個女同學。