我怎可能是女神👸🏻獵人🏹（第一季更新至斷更為止）: Pd，Palladium，鈀，催化轉換器，～100USD/g

今餐我哋食得好開心，講真呢啲超市熟食已經平過喺餐廳食一截；盒壽司有十六件都只係八十幾蚊，點都平過佢同男朋友食廿幾蚊兩件，但我一份生活費要兩個人分嘅話，實在好難維持到呢種生活，無論點都要諗下辦法。
連女神都寧可鋌而走險賣底褲，我又點可以乜都唔做坐喺度呢？唔知有無PTBF呢個工種嘅呢，不過無理由我鬧佢賣底褲，自己就做埋啲咁嘅嘢…
Q：「你做乜唔食壽司呀？」
我：「我對魚生…其實無乜興趣。」
Q：「哦，咁你幫我食咗啲蛋同布包佢啦。」
我：「好呀…妳…做乜一路食一路笑呀？」
Q：「因為有個低B仔話要養我囉。」
真係講下㗎咋，我都唔知可以點樣養佢，不過見到佢咁開心，乜都抵返晒啦。
我：「妳鍾意食呢啲等我之後買啦，通常七點之後都有特價㗎喇。」
Q：「我知呀，不過今日我等唔切咋嘛。」




由於Queenie買咗咁多好餸返嚟，呢幾日我哋都食得非常之好，我想講Al Fresco嘅腸真係好好好味，啲乜鬼廚師腸雞尾腸相比之下可以用垃圾嚟形容，無計啦，成十五蚊一條腸，但都幾大條嘅。
然後過咗兩日。
Q：「喂，我一陣要出街呀。」
我：「估到吖，平安夜如果妳留喺度先得人驚，不過，話時話，你條仔重未去愛沙尼亞咩？」
Q：「聽日先公眾假期，佢聽日出發去到一月二號返嚟囉。」
我：「咁呀，妳記住要喂飽飽人哋先好返嚟呀，我驚佢喺愛沙尼亞餓死就唔係幾好啦，妳知啦，嗰邊凍冰冰，缺乏咗妳嘅溫暖。」
Q：「你想講乜嘢呀！」
我：「平安夜，失身夜，嘻嘻。」
Q：「嘻你個頭呀，重邊有身可以失呀？」
我：「無所謂啦，身呢家嘢每天都可以失一次嘅。」




Q：「去邊度失呀？土地問題呀！游議員都無位扑嘢啦。」
我：「去開房啦。」
Q：「今晚啲房…咁貴，你贊助呀？同埋佢未夠十八歲都唔知租唔租到房。」
我知道，有錢一定租到，啲老泥妹一早同我講過呢個問題，但我當然唔會話佢知。
我：「去殘廁啦。」