我怎可能是女神👸🏻獵人🏹（第一季更新至斷更為止）: 71

我：「吓？！我一年只可以開一封㗎咋喎！」
Q：「當然啦，你要聽你媽咪話，但我唔使㗎嘛。」
我：「咁，唔係幾好嘅，最多我以後每開一封都畀埋妳睇囉。」
Q：「你唔係諗住我會喺度陪你住到三十五歲呀？」我重記得佢話十八歲要申請公屋，我諗就算最難申請都唔會要等十七年嘅…
我：「就算唔喺度，我可以影低send畀妳嘅。」
Q：「你驚唔驚啲信就咁放喺度好高風險？」
我：「有乜嘢風險？」
Q：「如果有火燭點算？」
我：「我當然第一時間攞埋走啦，重使講！」
Q：「如果係你個書櫃著火呢？你唔係諗住冒險爬上去攞呀？你媽唔會想你為咗攞啲信同你提早…你明嘅…」




我：「有無咁巧…我又唔食煙。」
Q：「如果有賊入屋偷咗呢！如果有白蟻蛀你又發現唔到呢？你會抱憾終生㗎！」佢表情誇張到…
對住牙尖嘴利嘅右女神，我從來都唔夠佢講。
我：「咁妳想點呀？」
Q：「到時每一封信都已經記咗喺我腦入面，我可以每年讀返嗰一封畀你聽囉。」
我：「重有成二十封咁多喎，我見後面重有啲幾厚，妳有無咁犀利呀？」
Q：「雖然未必一字不漏，但八九成唔會有問題，點呀，係咪好吸引呢？」
我：「但點解咁想睇？」
Q：「好似，有種追小說嘅感覺咁囉…你信我啦，睇完之後我會絕對保密唔同任何人講，而且幫每封信封返口保證原封不動。」
我：「其實妳最緊要都係唔好同我講啫。」




Q：「好！就咁話啦！多謝晒你！」
我：「妳多謝我媽咪好過啦…」
真係服咗佢，夠晒夾硬嚟，妳估我自己唔想睇咩，但我唔可以唔聽我媽咪話…每一封信都係佢遺言嚟，全部一樣咁有份量；我諗正常阿媽講十樣嘢，阿仔咪聽六七樣到，而我係無得揀，直頭可以叫做『親不在而子受教』，夠晒有效率；例如只係一句，無論我點躝街，身邊有幾多人食煙，我都會拒絕任何撩我一齊食嘅邀請…不過佢今年嗰封真係講遲咗，如果唔係我都唔會攪細蚊，不過放心啦，我之後會好好忍住㗎喇。
專心打機，唔好理QQ，費事又忍唔住過去八兩眼；打下打下，唔知幾時我就瞇埋咗對眼，進入咗夢鄉。
Q：「嗚嗚嗚嗚嗚嗚嗚！」
我：「嗯…咦…嘩！Q…妳做乜？」
Q：「嗚嗚嗚嗚！我唔會俾你媽咪擔心你㗎！」
做乜…唉，睇怕梗係阿媽喺啲信入面又講埋啲好煽情嘅嘢，搞到呢個眼淺嘅小妹妹；不過真係估唔到，Queenie竟然可以對我嘅事上心到咁，明明就同佢無關。
佢又爬咗上我張床度攬到我實一實，入埋我被竇嗰隻，都唔知佢當我係乜；不過我當然無奇怪反應啦，睇住佢喊，又諗起自己阿媽，重點會諗衰嘢；放心啦，我會畀心機生活，唔使喊嘅，我摸摸QQ頭安慰返佢。
Q：「唔會無人要你㗎！如果無人要就我要！」