我怎可能是女神👸🏻獵人🏹（第一季更新至斷更為止）: 77

咁啱喺我哋附近有對中學生情侶，個女仔郁都唔郁兩隻手捉住條邊，女仔都話呀，我絕對唔會容忍自己咁樣衰。
Q：「咁你喺度感受下先，我去轉幾個圈。」
QQ講完一剔就彈咗出去，啲動作係清爽利落輕快，滑行嘅速度比大部份嘅人都高，所以就喺度左穿右插，一般人都係雙腳貼地䟴下䟴下咁滑，QQ就好多時都會換腳單腳貼冰面滑行…我又諗返起佢本週記，要佢過我呢啲生活真係大嘥。
我都想試下郁，但…就好似釘死咗咁，同roller好唔同，roller啲轆係你側下個身就會自動轉，加埋個感覺無咁硬，而我而家想郁就係當右腳向前，左腳就會自動向後咁，捽下捽下喺度原地磨擦。
我索性企定定喺度睇，女神嘅肢體動作真係好美妙，再加埋佢本身先天嘅外表優勢，呢一刻我先覺得佢係貨真價實嘅女神。
轉咗幾個圈之後，佢忽然消失喺我嘅眼底之下，咦，到底佢去咗邊呢，漆黑中嘅螢火蟲無理由可以隱身㗎。
Q：「企定，唔好郁。」
Queenie喺我後面同我講，兩隻手放咗喺我條腰上面，用少少力咁捉實我。
我：「我…一直都未郁過喎，唔使妳講。」
Q：「你咁樣企定定，把冰刀會插入啲冰度㗎。」




我：「嗯，咁妳想我點…」
Q：「放鬆你啲手腳，扎好個馬，收實條腰。」
我：「咁矛盾嘅，即係要鬆吖，定係要實呢？」
呢啲指示實在令人摸不著頭腦，就好似揸車撞正黃燈咁，踩油好吖定係煞車好呢，停又唔得，塞入去又話唔好，掹出嚟又扁嘴，諗下諗下咪交通意外囉，都唔知係邊個發明埋呢啲欲拒還迎嘅燈號…
Q：「總之聽我話啦。」
喺我重諗緊點理解佢呢句嘢而用身體作出反應時，我個人已經…移動緊！
我：「嘩！呀呀嘩嘩…」
Q：「咪嘈啦，捉實咗你㗎喇，保持企喺度平衡就得。」