我怎可能是女神👸🏻獵人🏹（第一季更新至斷更為止）: 八十三

一月一日，公眾假期，溫書日；我極度懷疑Queenie佢違返咗聯合國兒童權利公約而有意將佢告上國際法庭；不過喺我識寫英文信之前，我首先想去消費者委員會投訴，畢竟我係真金白銀養佢喺度美化家容，但係佢嘅商品說明條例並無寫明佢會強迫他人勞動同剝奪他人自由。
一月二日，我要發動革命爭取獨立。
我：「Queenie，你條仔好似今日返香港喇喎。」
Q：「唔係好似，係今日返到。」
我：「幾點落機呀？」
Q：「大概黃昏前囉。」
我：「妳…唔係應該準備要去接機嘅咩？」
佢將個頭傾斜45度角兼反白眼，好似望住外星人咁望住我。
Q：「乜年代呀，而家重有人接機嘅咩？」
我：「咁…咁耐無見，應該嚟個重逢相擁嘅畫面。」




Q：「你係咪傻咗呀？人哋成家返嚟，我點接機？」
我：「成家返嚟點解接唔到，佢屋企人無見過妳？」我估唔到呢啲高尚人家嘅小朋友拍拖都要收收埋埋。
Q：「無呀…費事嚇親人啦，一陣以為個乖仔俾我搶咗就唔係幾好啦，又驚會以為阿仔顧住拍拖唔溫書，成績唔好就嚟怪罪落我度。」
我：「應該係知道乖仔俾妳色誘而衰十一大發雷霆，想夾生打死佢咋掛。」
Q：「咪再講呀！唔係我主動㗎，從來無色誘佢！」
我：「但妳就咁喺度已經…」
Q：「溫你嘅書啦，咁多廢話。」
暖和嘅冬天，白色寛衣下嘅一對開心果泡芙，酥軟Q嫩，隨著主人嘅動作而產生震盪，好似一個唔小心就會破皮，香滑嘅奶油從缺口滲出嚟，呢個時候要盡快用舌頭頂住將內饀吸入口中，以免成身都係。
『俛而讀，仰而思；思有弗得，輒起，繞室以旋。室有窪徑尺，浸淫日廣。每履之，足苦躓焉；既久而遂安之。』
讀下書，諗下嘢，突然諗到衰嘢，彈起跺跺腳，室有女娃長腿數尺，每日廣泛哋浸淫污染吾心，每次揩到佢隻腳，足夠我苦忍，但久而久之…




「鈴鈴，鈴鈴…」
Q：「喂，唔好嘈，我條仔打嚟！」再閃咗上床。
真係要感謝公子好生之德，將寡人救出牢籠…
我又點會嘈吖，就算唔係妳條仔打嚟我都唔會出聲㗎啦，以前妳唔喺度，我間屋可以全晚一粒聲都無；理得妳咁多，我即刻彈上我張床度㩒下電話先。
Q：「有呀，梗係掛住你啦，邊係喎…」
Q：「今年唔去喇，今年揀科，要專心溫書…」
Q：「唔使啦，唓，你都唔記得晒…」
Q：「乜喎，人哋不知幾專心…」
Q：「我先無你咁曳呀…」
Q：「嗯…鍾意呀…有呀…嗯嗯…好衰呀…唔入呀…」




當然啦！送飛機點可以入禁區！