我怎可能是女神👸🏻獵人🏹（第一季更新至斷更為止）: 八十五

話咁快，聖誕新年假就去到尾聲。
Q：「交叉仔，我可唔可以借你部電腦嚟用呀？我重差剪報未做呀，想印張新聞出嚟。」
我：「呀！我都未做呀，可唔可以幫我搵埋呀？」
Q：「知你籠嘢啦，無問題，但你要自己寫㗎。」
我：「嗯，咁我落去買飯盒喇。」
行去街市燒臘鋪前，會經過青年中心，諗返起今個假期都好似無乜落過嚟玩咁，貢獻晒啲時間畀QQ同埋溫書，雖然係好開心嘅…但難得落到嚟，咪入去兜過圈囉，一埋位就見到啲相熟嘅人仔喺度打波，就坐低跟隊喇，我諗玩返半個鐘先買飯，都唔係好過份啫。
真係開心嘅時光過得特別快，輪咗三場嚟打，原來已經過咗九個字…死火，QQ打過嚟我放低咗部電話唔知添，都係即刻衝去買飯扮無嘢算，如果餓親佢個肚仔就有排我受。
我：「Queenie，我買咗飯喇，嚟食啦。」
我將兩盒飯盒放咗上枱面，順便將佳寶買嘅兩枝zero放一枝喺雪櫃上格。
Q：「欸…你部電腦上唔到網…唔知做乜…」




我：「等我過嚟睇下，嗱，右下角打咗交叉，話無網絡卡driver呀，咁又點會上到網呢？但無端端點會話無driver嘅？咦…點解個desktop啲嘢無晒嘅？」我落咗去一陣啫，到底發生乜事？
Q：「欸…頭先電腦hang咗佢自動boot機，然後入唔到Windows，佢問我回唔回復視窗…」
我：「妳揀咗回復？！」
Q：「係呀…唔啱…」
我：「妳係咪黐線㗎！係人都知㩒取消再重新開機㗎啦！」一時之間我忍唔住向佢大發雷霆。
Q：「我真係唔知…屋企用開Mac機…」
我：「我俾妳累死喇！我重有好多嘢喺C drive㗎！而家無晒喇！嗚嗚嗚嗚…」黐線㗎，點解咁對我！
Q：「對唔住呀…頭先打俾你無人聽，一時手快，唔好喊啦…啲嘢好緊要？」
我：「緊係啦！」
Q：「係你做咗嘅功課？」我擰擰頭。




Q：「係你媽咪嘅相？」我又擰擰頭。
Q：「你唔係想講…你啲AV呀…」…
我無言以對。
Q：「你好嘢呀！哈，為咗啲鹹片對我發脾氣。」
我：「妳點會明喎！」
Q：「咁大聲鬧我，原來為咗打J。」
我：「咁都唔係亂嚟搞到我無晒啲嘢㗎！」
Q：「唉，原來我嘅地位連AV都不如。」
我：「唔鍾意妳呀！嗚嗚嗚嗚！」
我跳咗上床，用張被冚實自己，不停喺度喊。