我怎可能是女神👸🏻獵人🏹（第一季更新至斷更為止）: nōnāgintā quattuor

Q：「我諗我一陣五點幾就會返嚟。」
我：「妳鍾意啦，太夜唔見妳我就自己食。」
Q：「你唔出街㗎啦？」
我：「唔啦，考完試想瞓下。」
當然重有打下機，睇下瞓唔瞓得著啦，都想落街玩下嘅，但到黃昏又要返屋企煮飯，所以都唔係太想出去。
點知呢個時候我電話收到個message。
我：「細蚊…佢send咗個message過嚟。」
Q：「點呀？約你扑嘢？扑完話我知我先返嚟囉。」
我：「唔會啦…佢問我可唔可以接佢放學喎。」
Q：「接放學…咁大個人要接放學？」


我：「唔係嘅，我諗佢有啲特別意思…點都好，我去睇下乜嘢事啦，妳放心，我唔會亂咁同佢扑。」
其實我都唔知自己點解要特別同佢咁講，我同其他女仔有性行為，Queenie應該都唔會有乜感覺；不過至少，等佢知道佢唔須要等我扑完嘢先有屋企返…當然我都希望細蚊唔係真係搵我扑，如果唔係我都唔知點算。
Q：「咁…你要小心啲喎，我哋一齊出門口啦。」
換好衫一齊出去，好快就分道揚鑣，我行去細蚊間學校，QQ就約咗班姐妹喺商場。
我：『我喺妳學校門口喇，細蚊。』
蚊：『多謝你，咁我出嚟啦。』
睇嚟佢間學校今日都係考試，所以先會中午就放學。佢學校風評本身就好麻麻，成間學校應該無乜人會讀書，啲喺好學校讀書嘅乖學生無事無幹都唔會走過嚟，費事瓜田李下啦。咁喺佢學校門口，周不時都會有啲無業遊民喺度遊來遊去，好彩我換咗衫先過嚟，同埋都生得夠高大，如果唔係我都驚俾佢哋逗。
等咗一陣就見細蚊慢慢咁行出嚟，佢見到我嚟咗就慢慢咁接近我，但係當重有三四米距離嘅時候，就有一個挨住欄桿凭到打壞咁嘅男仔彈咗去佢面前…睇怕…
蚊：「咪話咗分手囉…唔好煩我得唔得…」
然後細蚊兜個圈跨過佢繼續行埋嚟我身邊。


「喂！唔好嬲啦…分乜手啫？！屌！妳叫仔嚟接放學？妳無撚嘢呀！而家當我係乜呀？」
屌…我心入面就真係屌咗出聲，遇到我最唔想對住嘅事；我寧願細蚊同我講佢得罪黑社會大佬，最多睇下謦唔謦得掂數啫，你哋啲感情事關我乜嘢事呀，俾我放下假得唔得。