右女神:「魔王阿道弗斯!你到底點先肯放過我哋?!」女神攞住枝無乜攻擊力嘅松木魔杖說道。
阿道弗斯:「我有無窮無盡嘅魔力,何解我要放過你哋呢?」魔王一路吃吃笑一路講。
我:「走呀!女神!快啲走呀!妳唔夠佢打㗎!唔使理我喇,返去王國收完兵再過嚟打啦!」
呢個時候我已經俾魔王阿道弗斯生擒,鎖咗喺行刑台上面,兩隻上臂俾個鐵扣緊緊咁鎖咗喺塊木板上面,我知道自己已經九十九死一生,只要魔王心情嚟到,就可以用一隻手指刺穿我個心臟。
右女神:「唔得!我帶得勇者嚟,就要帶返你返去,如果我茍且偷生,將來重邊有面目面對國民!」女神舉高法杖裝腔作勢。
我:「唔好呀!咁樣我哋都會死路一條!」
阿道弗斯:「呵呵呵!好玩呀!」
魔王壓根兒由一開始就無將我哋放在眼裡。
右女神:「救命呀!救命呀!有無人嚟救我?」
阿道弗斯:「妳唔係諗住喺魔界重會有人救妳呀?」放棄啦,右女神,如果唔係當初妳屁股痕話要佔領魔界擴張版圖,我哋都唔會落得如此田地…


右女神:「破喉嚨!破喉嚨!你喺邊呀?」
阿道弗斯:「荒謬!破喉嚨條廢柴已經喺三千五百萬年前俾我收拾咗,今次妳喊破喉嚨『都無人』會嚟救妳。」兇殘嘅魔王凍凍的說道。
刀舞人:「邊個搵我?等我嚟大開殺戒啦!」
突然間一個綠色頭髮嘅傻仔彈咗出嚟,左右手各拎住一把刀,個口再咬住一把;佢身輕如燕喺空中飛舞扭動閃來閃去,不時用手揮動佢嗰兩把武士刀,立體感十足,睇得魔王津津樂道。
刀舞人:「星月交輝十字斬!」
只見個傻仔左右開弓一左一右兩把刀直衝魔王心口,唔通今次…
阿道弗斯:「搞笑!亞聲波掌!」
魔王手掌輕輕一揮,就連空氣都產生壓縮摺疊,令到後面嘅景物變到海市蜃樓咁扭曲不定,而個傻仔嘅衝力就完全俾空氣嘅壓力比下去,被活生生咁停咗喺半空,面容扭曲,身上嘅三把劍亦都隨音波共振,瞬即化為一堆碎片。
接落嚟呢堆嘢就跌咗落熔岩,化為幾條火舌。
阿道弗斯:「唉,真的沒路用,嚟多一打都唔夠我玩啦。」魔王拍拍手掌擦走灰塵顯得有啲失落。


右女神:「就算係咁,我哋都唔會放棄,光明一定可以戰勝黑暗嘅!」
阿道弗斯:「康多呢?不如示範下?」
右女神:「願水之女神阿庫婭賜我力量!」
只見女神揮動魔杖,一個淺藍色微妙嘅氣泡慢慢飄向魔王嘅方向。
阿道弗斯:「祝融之風!」
魔王彈指之間,一道道烈風帶住緋紅色嘅火焰刮向右女神,先係擊破咗個粒睇落毫無作為嘅泡泡,再直接打落右女神嘅身軀上面。
右女神:「嘩吖吖吖吖!」
本來著住純白色公主戰鬥服嘅女神隨即被點燃,唯有即刻趴喺地下上面打滾以圖整熄火炎;終於身上面嘅火被救熄,但係八成嘅布料已經被狠狠咁燒掉,青澀嘅女神不屈咁爬返起身,全身嘅嫩肉被無情咁暴露喺魔界嘅空氣之中,只係剩返兩成嘅破布僅僅遮住佢羞恥嘅位置!
已有 0 人追稿