我怎可能是女神👸🏻獵人🏹（第一季更新至斷更為止）: 148

最後就係一個紮住馬尾略帶傻氣嘅眼鏡妹…然後就沒有然後了，因為佢哋已經起身走去埋單，然後我就行埋去佢哋張枱度執拾，無論佢哋係國色天香，抑或係沉魚落雁，我首先都要幫佢哋清理咗嗰條食剩三份之一嘅魚骨先。
執執下，咦…嗯…諗咗一輪，我決定小心翼翼咁將啲碗碟放咗上架手推車度，慢慢推入廚房；整理完一輪之後我又喺廚房睇下有無啲菜頭菜尾要掉，跟住䚎下個飯煲，鏟咗幾鏟，倒咗啲清水入去浸住。
到咗十一點幾剩返一枱阿叔喺度睇波，馬叔叔好似早就見慣不怪，而我已經執好晒其他嘢，又換晒早餐餐牌，就是就企去收銀櫃枱隔籬，馬叔叔喺度睇緊馬經。
馬：「唔使心急喎，十二點完場佢哋就走㗎喇。」
我：「啊…無呀，我唔係急。」
馬：「係嘞，雖然我諗你學校未必會話你，不過做飲食嘅，頭髮剪短啲企理啲點都好啲嘅。」
馬叔叔擰個頭嚟望咗我一眼，然後又去睇返佢份馬經同埋本數簿。
我：「係，知道，我呢兩日會去剪！」
其實學校啲訓導係有時會催我飛髮，不過我通常都唔多會理佢哋，因為我間學校唔係Band 1好多同學會比我更加嚴重…不過理由有啲唔同，人哋可能係染髮或者gel到三尖八角，而我就純粹懶同埋想慳錢，啲頭髮唔長到丐幫咁都唔會去剪。
當然，老細叫我去剪梗係即剪！反正遲早都係要剪，我唔想為咗慳嗰半吋頭髮而無咗份工。




我見無嘢做，又唔想攞部電話出嚟玩，話晒都係第二日開工咋嘛；於是我就攞咗盒牙籤出去逐枱逐枱加，直到全部都啱啱放滿為止。
「喂！小兄弟！」
我：「係，請問有乜嘢幫忙？」
睇緊波嘅阿叔叫咗我埋去，於是我戰戰兢兢咁行過去，希望佢哋唔會睇我唔順眼啦。
「唔該愛四枝藍妹！」
我：「好！請等一等。」
就咁攞四枝藍妹過去？好似又應該無咁簡單，我都係請示咗老細先。