我怎可能是女神👸🏻獵人🏹（第一季更新至斷更為止）: 173

我：「Queenie，家訪嗰度妳點算？」
Q：「同咗媽咪講啦，佢約咗星期六朝頭早做視像會議，佢會同Miss講我去咗補習唔使露面。」
我：「原來係咁，都正常嘅。」
Q：「點呀，你問嚟做乜，定係你想報名做我監護人，叫Miss上嚟你屋企幫我做家訪。」
我：「傻嘅咩，我有乜可能做到你監護人…」
Q：「咁你搵錢養我吖嘛，保護埋我呢個小妹妹都好正常啫，啱唔啱？」
我：「妳咪扮細路女啦…我會驚㗎。」
就係咁，家長日呢件事就告一段落嘞。
星期五，呢一日係額外嘅假期，我哋兩個都瞓到差唔多中午先起身；今日無乜嘢做，留喺屋企你眼望我眼，有時都唔知講乜好，一齊喺度玩手指咁；不過我哋已經彷彿心有靈犀，唔講嘢咪唔講嘢，互望完一眼之後佢有時會喺度傻笑或者奸笑，好靚女，又好鬼可愛。
今日扚起心肝捉咗佢入廚房睇我煮晏晝，唔係為咗想佢以後煮飯畀我食，而係想第時我唔喺度佢都可以唔係剩食杯麪啫。今日煮嘅係東東雲吞王加米粉，小朋友記住買東東雲吞一定要買雲吞王而唔好買鮮蝦雲吞，因為鮮蝦雲吞得八粒，112克，而雲吞王係有十粒，170克；雖然雲吞王係貴幾蚊雞，但照除嘅話一定係雲吞王抵，而且每粒都大粒啲多餡多蝦肉，食起上嚟開心好多；雖然我計factorization唔夠QQ嚟，但呢啲婆仔數我一定贏佢幾條街，如果唔係點養佢喎。




有乜技巧呢？首先米粉同雲吞係要分開煮，而且係要水滾先落，首先煮米粉，望到開始軟身就攞去過冷河，瀝乾備用；然後煮雲吞，一定要滾水落，如果唔係啲皮會溶；呢個時候就順邊煲一壺飲嘅滾水，到見到啲雲吞開始發脹，塊皮好似啲女學生條裙俾風吹起飄飄嘅時候，就倒返啲米粉落去，唔使攪動見到水滾就熄火；最後倒啲食物落碗度，但就唔會要煲入面啲湯，會另外倒啲熱滾水落去，再加湯包同少少雞粉…
雖然好悶，但QQ都企定定喺我隔籬睇，可能因為佢鍾意食雲吞掛；我覺得我哋兩個已變到好似兩公婆咁，好想一嘢就攬住佢嚟抱同惜，點解佢要有仔喎？第一次煮雲吞畀佢食嗰陣，本來都係一人一半每人五粒，但佢食完之後好快就喺我碗搶走一粒再換啲米粉或麪畀我，自此之後我放六粒喺佢嗰碗度就變成不成文規矩，而我對佢嘅愛亦都心照不宣。
食完嘢繼續無乜嘢做，由於今日只係星期五就決定唔做功課住，我哋都同意玩幾鋪傳說先，但諗兩諗如果我哋一齊online嘅話阿健睇到就會好可疑，所以就我login game先，一入去就見到條PK仔喺度，亦都即刻邀咗我。