我怎可能是女神👸🏻獵人🏹（第一季更新至斷更為止）: 194

啦啦啦，我呢個合法青年勞工有糧出喇，係人生第一份糧；放咗工之後我喺條街跳下跳下咁彈返屋企，係喎，我都未入過票，學校又無教，唔知要點做嘅呢？等我聽日放學就即刻仆去銀行先。
我：「QQQQQQ！」
Q：「做乜呀！煩膠！」
我：「妳睇下！」
我喺佢面前攤開張支票畀佢睇，沾沾自喜地。
Q：「得喇，知你出咗糧喇，好好收埋佢啦。」
我：「不如我哋攞啲錢去玩吖，過兩日就放假喇！」雖然日日喺屋企對住女神，但諗返起上次正式出去同佢玩已經係除夕溜冰，而且得一陣。
Q：「傻嘅咩，得嗰少少錢，可以玩啲乜喎，食多幾餐飯都無咗啦，你都係入落銀行留起慢慢用啦。」
我：「咁我下個月都會出糧㗎嘛…而且新年有加班，到時會多啲錢㗎喇。」
Q：「係啫，都儲起佢先啦，呢個幾月已經使多咗你好多錢。」




我：「又係嘅…咁遲啲先再算啦。」
一諗起要等到下個月先有得再出糧，就覺得時間係好漫長，希望到時會有多少少錢陪佢玩下啦。
正當我除咗件上身衫諗住入去沖涼嘅時候，QQ突然衝咗埋嚟喺我後面攬住咗我。
我：「Queenie…做乜事呀…」
Q：「對唔住…唔好唔開心啦。」
我：「做乜咁講呀？」
Q：「我…只係，唔想你嘥啲無謂錢喺我身上。」
我：「點會無謂喎，話過要照顧妳㗎嘛，咁我同妳一齊去玩我自己都有份用㗎嘛。」
Q：「係啫…但係妳為咗我咁樣，我驚你連飯都無得食呀。」
我：「傻嘅，點會呢，我有老竇養㗎嘛，我返工呢份糧，所有錢都將會為咗你而用㗎。」




Q：「其實，如果你想同我去玩，平平哋就得㗎喇，我唔敢亂使你啲錢。」
我：「放心啦，之後嘅生活費應該唔會有問題㗎喇，只要平時慳住使就得，妳又唔係食好多嘢。」
呢個時候我反返轉個人攬返住佢，順手搣下佢個肚仔，其實佢都幾為食。
Q：「睇嚟你嫌我食得太多嘢咁…」
我：「點會呢，女仔有少少脂肪先可愛㗎嘛。」
尤其係當啲脂肪生咗喺心口，即係而家壓落我胸骨上面嗰兩團軟肉，真係好舒服。