我怎可能是女神👸🏻獵人🏹（第一季更新至斷更為止）: 197

條友仔喺校褲抽咗部電話出嚟，㩒咗幾下show咗幅相畀我睇…屌！就係Queenie喺沙灘望住個斜陽影背脊嗰幅比堅尼相，咁我認係幾煞食嘅。
我：「哦，嗯，呀下。」我都唔知點反應好喇。
健：「你乜態度呀？就咁嘅反應？」
我：「咁…請問你想我點？」
健：「你唔覺得好正嘅咩？起碼都要興奮少少呀…」呢個背影我喺屋企都已經望咗N百萬次。
我：「背多分嚟㗎咋喎，樣都睇唔到…」
健：「睇個身材都知係超正啦，我就話佢一定係靚女，靚到唔敢畀個正面你睇驚你會暈嗰啲…嗱，你再睇下呢幅，動靜皆宜，能文能武，呢度有啲咁多嘅側面，都睇得出係又白又滑嘅美女。」
佢講緊係QQ幅彈琴相，經佢腦補同形容之後我覺得右女神再升格咗一個層次，變做神聖大不列顛右女帝，我建議此人真係唔應該太多幻想。
我：「哎呀！嘩！唔得喇！太閃呀！正得太交關！我已經谷精上腦，精盡人亡！亡羊補牢…」我唔知自己喺度噏緊乜，既然佢想就氹下佢啦。
Q：「睇過…」




我哋冷不提防，喺空中嘅電話一嘢就俾Queenie搶咗去；雖然Queenie係有啲霸道，但我哋作為尊敬女神嘅小毒撚都唔敢有啲乜冒犯，所以係唔會搶返走部電話嘅。
而QQ就喺度轆緊自己Facebook sub account嗰兩張相，呢個咁尷尬嘅moment我都唔識形容喇，希望QQ唔係自戀緊自己美好嘅背多分啦。
Q：「得嗰兩張咋？擺明呢條女就扮晒嘢啦，正面都唔敢畀人睇，就係專呃你呢啲毒撚。」
救命…點解可以咁七情上面，妳唔去做女騙徒實在太浪費咗妳嘅天賦才能。
健：「咁可能…佢都係怕俾啲狗公煩住先private咗啲相啫，Queenie妳自己都係…無理由唔明㗎喎。」聽到阿健幫女神兩隻字靜音打碼就覺得好鬼搞笑，而且佢有口話人無口話自己，如果唔係佢成隻狗公咁煩住QQ，又點會攞到佢Facebook喎。