我:「無呀,其實我老竇同間酒樓個經理就一早就識嘅,咁我前排問老竇有無得加生活費佢就唔多高興,問我肯唔肯自己做下嘢搵錢,咁我諗住咁細個邊會有人請咪下巴輕輕話梗係制啦,點知佢真係安排咗我去酒樓做兼職,不過我唔係去做侍應或者煮嘢食喇,只係周末夜晚落去幫手清場執返靚個地方等聽朝可以正常開鋪。」
我只係輕描淡寫咁講解下,點知嗰兩隻嘢好似望住個聖人咁…返工啫,有乜特別?
健:「乜十五歲可以打工㗎嗱?」
我:「可以呀,我search過勞工處個網。」
康:「咁十四係咪就唔得?」
我:「咁又唔知喎,個網係寫十五歲就叫青年。」
由於佢哋未生日,所以只係得十四歲。
健:「係咪包伙食㗎?咁咪可以任食點心!」
康:「我下次嚟買燒臘飯可唔可以叫個廚師斬晒成隻雞髀畀我?」
救命…原來返咗工之後,係真係會覺得自己啲同學變低B咗,重好細路仔。


我:「咪玩啦,都話我係夜晚先去執手尾,所以唔包伙食喇,不過有時會有啲賣剩嘅嘢益我嘅,而去買燒臘飯呢個問題,或者我可以一陣放學去幫你買嚟試下,個廚師應該認得我。」
健:「咁有幾錢人工㗎?」
嗯…講真我唔係幾想答佢哋咁多問題。
我:「一個鐘五十零啦,只係夠我多少少零用。」
康:「多過最低工資喇喎!」
我唔想再糾纏喺呢個話題度。
我:「算係多少少啦…係呢,如果俾你哋揀團年飯食乜,你哋會揀去邊度食呀?」
健:「重使問,梗係去食燒肉啦,最好有和牛放題,同埋有自助甜品小食吧嗰啲。」
康:「我想食重慶雞煲,或者串燒,次次返廣州明明通街好嘢食,但佢哋係都要去酒家。」
健:「但…你諗住一個人去食呢啲嘢?好怪喎…」


我:「唓,點解唔得,我出咗糧,一個人自由自在,想食乜就乜啦!」
講真我先唔會咁黐線,一個人去豪食實通街都望住我,食都食得唔安樂,我寧願去便利店掃晒成個架好過。
健:「知你威喇,咁你年三十晚幾點返工呀?」
我:「日日都一樣,返九點半,到所有客走晒就放工。」
健:「咁我嗰晚應該見唔到你嘞,我阿嫲阿爺十點就瞓,睇怕九點到就會走。」
我:「無所謂啦,我果晚應該好唔得閒,就算你喺度我都唔會得閒招呼你。」
呢一日嘅晏晝大家都無心機上堂,數學阿Sir都懶得教書,畀咗幾條數我哋做classwork,然後再講解一次就算;而QQ呢,又係臨放假前同佢啲八婆去行街,好似話一齊去睇戲,咁其實唔關我事,除咗嗰張戲飛係用我錢買。
已有 0 人追稿