QQ真係引死人喇,好鬼死靚女,實在係未出發先興奮;不過我而家先得閒留意佢對波鞋,好似同我平時喺街見到嘅唔同,特別得嚟又好有美感。
我:「想問下妳對波鞋係乜嘢來頭㗎?」
Q:「哈,乜你而家先見到呀?」
我:「咁係因為妳個人太靚,先唔得閒留意妳啲衫褲鞋襪啫。」氹女仔我都重係識嘅。
Q:「鬼唔知咩,你根本就想我乜都唔著咋嘛。」
我:「嗱,我無講過呀,係你自己成日喺我面前換衫咋,唔係我要你咁做㗎…」
Q:「好吖,你咁講,不如我每次換衫你都同我走入廁所自閉,等我換完先出返嚟好唔好?」
我:「姐姐我知錯喇,我乜都唔講喇。」
Q:「呢對係LV Time Out白皮鞋嚟。」
我:「即係乜嚟,可唔可以講中文?」


Q:「無中文呀,講咗你都唔識㗎啦。」
我:「咁係咪即係好貴貴㗎?」
Q:「係呀,本來我想賣咗佢㗎喇,不過見你有工返我就繼續著住先啦。」
我:「咁點得喎!妳賣咗嘅話之後著乜?」
Q:「我賣咗之後可以換十對Nike都唔止啦。」
聽完之後我無聲出,其實原本嘅佢,同我真係兩個星球嘅人嚟,住埋一齊實在係一種錯誤。
唔好諗,越諗只會令自己越唔開心,明明今日係我哋兩個一齊出去玩嘅大好日子,唔應該浪費心神去呢啲世俗嘅嘢上面。
換好衫我哋就出門口,不過為咗安全起見我同佢都係前後腳出去嘅,再約埋喺地鐵站等,咁就算俾人撞到都無咁礙眼吖,同隔籬位同學一齊出街可以有千百萬種原因嘅啫。
入到地鐵車廂,平日呢個時候唔算多人,我哋搵咗個位坐低,留意到周圍無熟悉嘅面孔我哋就越坐越埋,手臂貼手臂,再自自然然兩隻手拖埋一齊;一直以嚟,我哋都無定義過點解要拖手同幾時要拖手,只不過既然都拖過咯,咁咪繼續囉,兩個人一齊出街拖住都舒服啲吖,唔使解釋啲乜,就算我哋唔係情侶都可以拖手嘅啫,又唔算得係啲乜,反正一齊住都係咁咯。
好在我哋兩個學生搭地鐵有半價,就算過海去中環都唔係好貴,然後我就喺Queenie嘅帶領下嚟到文華東方酒店。酒店嘅大堂係非常富麗堂皇,地下喺反晒光嘅雲石,天花上面有傳統嘅水晶吊燈,牆壁上面有大型壁畫同雕刻,Lobby放咗啲散發住懷舊氣息嘅梳化,木凳同茶几,茶几上面重有花樽。


而Queenie就好熟手咁帶咗我去搭(車立),嚟到位於廿五樓嘅文華廳。
已有 0 人追稿