我怎可能是女神👸🏻獵人🏹（第一季更新至斷更為止）: 211

呢個時候，QQ喺度好專心咁睇餐牌，於是我又望一下，第二行就係蝦餃，一籠有四件，啱啱好一百蚊多啲，而其他點心都係差唔多。
Q：「嗱，係你話要同我食好嘢㗎，唔係我迫你。」
我：「嗯，我唔敢叫你隨便嗌，妳知道大概嘅…」
Q：「我好細食㗎咋，唔會食窮你。」
我：「如果妳而家大食，咁嚟緊呢個月都可以細食，然後個肚仔就會唔見咗。」
Q：「放心啦，我喺度計緊數，我重驚過你。」
我第一次喺考試以外見到Queenie個樣咁認真，其實呢度個點心餐牌好簡單，得一頁紙嘅底面，而後面就有平時味部，廚部啲小食，小菜同炒粉麪飯，黐線嗰啲我唔講喇，但一碟炒麪就三百零啦，未至於食唔到嘅。
等咗大概五分鐘到，知客姐姐就帶咗我哋入去，入面都幾多人，平日差唔多坐滿晒，原來香港係有咁多人食得起呢度嘅嘢，睇嚟唔訂位真係好大機會無得食，當你以為好貴嘅時候，其實大把人同你爭住食。
入面當然又係好靚啦，我哋被安排坐咗喺一個角落度，勉強都叫望到出面嘅維港，而呢度嘅餐具，又係非常之新淨整潔，一杯一碟都係反晒光，差唔多令我唔好意思印咗自己啲指紋上去。
原來呢度啲點心係可以逐件逐件叫嘅，QQ就叫咗：普洱，茉莉，四件蝦餃，兩件燒賣，兩件小籠包，兩件蟹肉菠菜餃，兩件蛋撻，一件黑椒和牛酥，完。咁我數學都唔係差嘅，聽完都知道我係夠錢埋單，慎防QQ亂嚟我今日好犀利咁袋咗千二蚊出嚟…其實我好想食三百蚊一碟嘅炒麪睇下有乜分別，但真係唔捨得，而且我相信QQ嘅選擇。




呢度，係另外一個世界嚟，一切對我嚟講都係好新鮮；明明我自己喺酒樓返工，但除咗啲點心個名差唔多之外，所有嘢都係唔同嘅，唔同嘅枱布，唔同嘅餐具，唔同嘅裝修，唔同嘅客人，唔同嘅景色。
Q：「唔好周圍望啦，嚇親人呀。」
其實我哋入嚟嘅時候都有其他人會留意我哋，因為成個場全部都係大人，我諗就算有小朋友嚟飲茶都唔會係自己嚟，所以我哋應該係幾奇怪。
我：「香港真係多有錢人。」
Q：「窮人重多呀。」
我：「點解我哋可以嚟飲茶嘅…」
Q：「因為你出咗糧囉。」
我：「因為妳係K生個女。」
Q：「又唔到我揀嘅。」
我：「所以妳嚟過好多次。」




Q：「唔好提個不知所謂嘅男人，我係為咗同你慶祝第一次出糧先嚟㗎咋。」
我望住Queenie，深深咁感受到自己高攀唔起佢，莫講話我，就連佢條仔都高攀唔起啦，食餐壽司都隱隱作痛，禮物都只係一條千零蚊嘅銀鍊；呢幾個月，我由鄙視女神，到接受女神，到鍾意女神…但我點睇佢根本就唔重要，因為物理上嘅距離就活生生咁擺咗喺度；Queenie係一個好女仔，我真心想佢過得幸福，但我根本畀唔到啲乜佢，希望…佢會搵到一個襯得起佢嘅男仔啦；而我，可能應該要接受細蚊嘅好意。