我怎可能是女神👸🏻獵人🏹（第一季更新至斷更為止）: 224

QQ同交叉仔衷心祝福某失眠人士身體健康，一切順利，生活愉快，全因為你先有我哋兩個嘅存在。

我呆咗…但，佢呢個推論又實屬合情合理之至。
我：「唔會喇，無咁諗過，我同佢無嘢。」
Q：「係你唔想同佢有嘢咋？我就唔信你上次幫咗佢佢會唔心動。」佢轆大隻眼成個偵探咁款。
我：「可能有少少嘅，不過我已經同佢講清楚。」
Q：「嘩，重要專登同人哋講清楚添呀，巴閉喎。」
我：「無…咁啱返工撞到佢落嚟食晚飯啫。」
Q：「哈哈，落嚟食晚飯變食檸檬。」
我：「邊係喎，只係…覺得咁樣喺返埋一齊唔係咁好啫，我幫佢又唔係為咗咁。」




Q：「你無拖拍，同返人哋一齊睇下會點都無壞吖。」
我：「咁我唔係想同佢玩玩下吖嘛。」
Q：「咁可能人哋想同你玩呢。」
我：「我就係唔想咁對佢，玩玩下到最後受傷嘅都係女仔，都係認真啲好。」
Q：「哈，你幾時變到咁正經㗎？」
我：「我都唔知，可能喺幫佢捱咗一刀之後掛。」
其實我亂噏，如果我無人無物同佢玩下可能都無傷大雅，但而家咁嘅狀況…隨時搞到三個人唔開心，而且我重應承咗媽咪同QQ唔可以亂嚟，咁既然無得咩嘢，玩個重點都已經唔知去咗邊。
Q：「咁佢有無好唔開心呀？」
我：「咁又無喎，放心啦，我同佢重係好朋友。」
Q：「哦，你同邊個女仔係好朋友其實都唔關我事。」佢攤開雙手咁講，睇落好口不對心。




我：「係妳無端端問佢咋嘛。」
Q：「點知你有無需要間屋同妳啲女仔好朋友做愛做的事喎，想同你講唔使嚟渡假屋，我會好配合咁讓返一晚出嚟㗎喎。」
我：「喂，呢啲關係好似唔係叫做好朋友喎…」
Q：「咁你另一個好朋友Carmen姐姐呢？佢好似等緊你十六歲生日再陪佢玩㗎喎。」
聽到佢咁講，我語塞了，如果大卡車…
Q：「唉，我明喇，即係細蚊平平無奇就做好朋友，大波姐姐呢啲就唔當佢係朋友，真係唔公平…」
我：「Queenie…我邊有咁講過喎…」
Q：「唔使講喇你，我已經識穿咗你，繼續幫我影相就得。」
QQ用間圖書館嚟做背景，棟建築上面有啲書法雕刻，記憶中細個嗰時係無呢棟嘢喺度。
講真，有得食，有得玩，有自來女，有邊個男仔唔想，但如果為咗咁，而令到自己嘅心上人覺得我攪三攪四，無嚟正經，我寧願放棄。我知我嘅機會係微乎其微，但只要Queenie妳一日重繼續留喺我身邊，我相信可能性一定係有嘅；而且就算我唔可以擁有妳，我都可以令妳過得快樂，咁樣我就心滿意足。




之後我哋行咗入榕樹灣大街，呢度呢…好難形容，話特別又唔喺好特別，但望多兩眼又會有奇怪嘅感覺湧上心頭；呢度一間海鮮檔，對面一間西式酒吧，隔籬一間傳統雜貨店，再行兩步就有間文青首飾鋪，撞到五顏六色，正正就係呢度特色。