我怎可能是女神👸🏻獵人🏹（第一季更新至斷更為止）: 227

我：「喂，做乜同我交換㗎？」
Q：「因為我唔食咁多糖囉！」
佢攞咗我碗未加糖嘅豆花，喺原本嘅富士山中間挖咗少少熔岩過去就推咗畀我，即係打完齋唔要…算，無所謂，反正我都食得落甜嘢；冬天食碗熱辣辣嘅豆花又真係幾好味，滑捋捋又暖笠笠，咖哩魚蛋都係夠香夠辣，係唔夠份量啫，細細粒畀多兩粒都好吖。
Q：「喂，食緊就唔好影啦。」
我：「我覺得呢個畫面先係最真嘅妳嘛。」
Q：「影飽佢，反正我一陣自己delete返。」
我：「Queenie，好唔好食呀？」
Q：「好食呀，好嫩滑，食完個人又暖晒。」
我：「哈哈，少少嘢就食得妳咁開心。」
Q：「嗯，係㗎，如果你喺酒樓有嘢拎返嚟畀我食都會好開心，所以錢唔係問題嚟。」




哈…錢唔係問題，不過無錢先係大問題，諗下妳同Yvonne佢哋出一次街要使幾多錢都令我感到壓力。
由於我實在係唔夠飽，所以又encore多一碗豆花，十四蚊就十四蚊啦！唓，都係我十五分鐘人工到咋嘛！食完我哋就繼續出發去風車站。
南丫風采發電站得一座大風車喺度，而且都生得幾高，所以喺豆花店行咗一陣已經眺望到佢嘅位置，只不過重要慢慢行上去啫；好彩成條路都係石屎路，又唔太斜，喺無乜難度之下我哋好快就抵達咗風車嘅位置。
風車呢，係用嚟發電，係用嚟環保，係用嚟科學教育；錯，通通都唔係！係用嚟畀港女打卡嘅；呢度雖然荒山野嶺，但係都起咗唔少人工設施，有涼亭有凳，有展示牌，有啲太陽能嘅導覽柱，風車底有個電錶喺度展示佢發咗幾多電，雖然我唔係幾睇得明，都想望下呢架大風車有幾巴閉發到幾多電出嚟。
Q：「喂！咪顧住睇呀，趁個太陽重夠光幫我影相先呀！」然後就活生生俾佢捉走，緊係啦，見樹不見林，企到喺風車底又鬼影到風車呢，於是佢又捉我去到大老遠。
而由於風車係會郁嘅關係，除咗影相重要幫佢拍片，咁無理由風車郁人唔郁㗎嘛，所以QQ就擺出各種唔同嘅動作，換咗好多種表情，再嘗試用手同腳跟住啲風車葉用同一個速度轉動…