Q:「你都幾man㗎喎。」
我:「使乜講。」唔知點解佢一讚我就變得輕浮。
Q:「讕醒,你千祈唔好戟親仆街呀,你跌低無人理你,但唔好連累我呀,重有我個袋!」
我:「邊有咁易,細蚊凌空鉗喺我身上面成五分鐘都係咁啦。」死火,好似多口得滯添…
Q:「你覺得我好想聽你講鹹嘢咩?」
我:「唔係,sorry,對唔住,唔講。」
Q:「其實又無乜所謂嘅…龍舟掛鼓就龍舟掛鼓啦,乜鬼鉗住啫,以為我會聽唔明呀?」
我:「唔係嘅…」
Q:「咁佢有乜感想呀,舒唔舒服?」
我:「佢話…好似拋下拋下咁,除咗我就無嘢捉住,要畀晒成個人我咁,幾enjoy…」


Q:「哦,原來係咁。」
我:「咁妳…有無試過呀?」
Q:「我先唔會話你知呀。」
我:「係…又係嘅…」
Q:「你個鹹濕佬分明係想摸我大髀,同埋感受我嘅心口先孭我咋嘛,唔好唔認呀。」
我:「真係唔係呀…我擔心,唔想妳腳板仔刮花。」
Q:「咁重衰!鍾意腳板重變態!」
我:「唔鍾意腳板,鍾意妳胳肋底囉。」
Q:「真係好變態!都唔明點解我可以容忍自己同你一齊住咗咁耐㗎。」
我夠想知我點解可以容忍同妳呢個索到爆嘅女仔住咗咁耐都唔抽妳水,個難度比起喺屋企踢波唔會不小心打爛爸爸的花瓶繼而道歉重要高幾倍。


然後行到嚟嚿大石度,我放低咗佢喺地面,佢再赤腳爬去石上面坐低,啲石面都幾平滑所以無乜問題。
呢個時候個天已經微微變橙,燈色昏…咪住!
我突然之間與天地感悟,忽爾同個爛作者神交;佢同我講詩經又寫日落,李白又寫,巴金又寫,白仙勇同徐志摩呢兩條麻煩友都寫,就連蘭陵笑笑生都寫…一定有寫,如果搵唔到肯定只係失傳…所以佢都唔好意思再寫,驚人覺得佢抄襲就唔係太好啦,好老尷㗎嘛;所以佢決定唔寫,如果大家想知道黃昏嘅太陽係乜嘢蛋樣嘅話,可以參考返萬言師兄篇我同女神做咗鄰居第二百四十七回,就可以得到一個最佳答案。
正所謂,古人不見今時月,今月曾經照古人;太陽同月亮都差唔多啫,相信李白同萬言睇嗰粒太陽同我睇嘅都一樣,無謂寫咁多呃字數啦;有現成㗎嘛,copy and paste都慳返…
就係咁,我開始攞住部iPhone喺橙黃色嘅鏡頭filter下影相;隨住又夠字數,下章再見。
已有 0 人追稿