今日嘅佢同平日真係好唔同,但,都係好可愛嘅;然之後,我哋又拖返住行去榕樹灣市中心,之前行完大街而家就轉入後街,經過一間叫林記鎖業嘅鋪頭,賣鎖就得一個櫃仔,間鋪另一邊就放咗幾個大雪櫃喺度賣涼茶…一早講過,南丫島呢度啲鋪係好趣緻,例如五金鋪會賣埋水泡水槍咁。
Q:「我要飲薏米水!」
由於無諗過要戶外活動,所以我哋係無帶水嘅,全靠晏晝飲咗好多茶同頭先碗豆花先捱到而家,喺呢度十八蚊一大枝薏米水算係好合理,抵過飲水啦;咁大枝重可以兩份share,又可以飲佢口水尾間接惜惜。
輪流一人一啖,薏米水好清,好家鄉feel,只有啲咁多甜味,重有一粒粒薏米跌落個口,感覺非常清新,我覺得重正過豆腐花,呢枝嘢喺市區應該好難搵到;結果我同QQ喺間鋪門口唔使兩分鐘就飲晒成枝薏米水,重拍晒啲薏米入口食。
Q:「呀!南陵金卷重未閂鋪,我要食!我要食!」
我:「嗯,好出名㗎?」
買我就當然會買畀佢,不過順便問下啫。
Q:「梗係啦,抵食過德成號多多聲,以前爹地啲朋友去親南丫島我都會有得食。」
我:「妳真係好嘴刁嘅小妹妹。」
Q:「嘻嘻,小小咁啦,好在我唔太鍾意德成號。」


南陵金卷…佢要買嘅係鳳凰卷,不過呢間鋪重有超多納納雜雜嘅嘢賣(用納雜為合詞意之故,收納各式雜貨,並非文獻佐證;唔用擸㩑係因為呢兩粒字相信係垃圾嘅字源,而且㩑字個底少咗一劃為異體字,輸入法未搞掂。);我諗又係每日人手新鮮製作,QQ鍾意食得嘅嘢睇怕都唔會差。
買完南陵金卷,QQ行咗兩步就企喺大街中間攞咗塊鳳凰卷出嚟食,睇嚟佢都開始肚餓。
我:「妳嚟過好多次南丫島?」
Q:「幾次咁啦,多數係去另外嗰邊食海鮮。」
我:「食海鮮…一定好開心。」
Q:「嗯,會食好多隻瀨尿蝦,同埋風沙鮑魚。」
衰妹,真係聽到都肚餓,唔知點先養得掂妳。
我:「下班船重有廿分鐘,不如喺度食埋夜晚?」
我諗住QQ肚餓唔想佢捱,就算等埋船返到中環都唔會有乜平嘢食,如果返到屋企附近先食實餓死佢都似。
Q:「你話事啦,老細。」
已有 0 人追稿