我怎可能是女神👸🏻獵人🏹（第一季更新至斷更為止）: 241

今日係我第二次同Queenie認真出街玩，其實我哋之間發生嘅所有嘢都係同一對情侶係無分別嘅，唔好話扮情侶，我哋比起好多真情侶重要更加真；所有嘢嘅原因當然係QQ，如果唔係佢嘅意願我根本就唔會敢同佢咁樣，其實佢係點諗嘅呢？橫掂出嚟玩所以索性當係情侶就算？反正當同學當一齊住嘅朋友出嚟玩都會左就右就唔知點咁…定係其實係QQ濫索愛情？佢知道我會惜佢唔會對佢亂嚟，所以就享受盡我對佢嘅好，而又唔需要對我哋嘅關係負上責任…
呀，我都唔知呀，總係覺得自己好似喺度攪緊其他人條女咁有啲唔好意思，而家上到船佢又係撓實住我隻手挨落我個身度…但無論如何，我自己都係好享受，點解我要攞呢啲嘢嚟煩呢，都唔知有幾多男仔恨同佢出一次街拖一拖佢隻手仔都恨唔到；來日方長，唯有見步行步啦。
Q：「交叉仔。」好簡單嘅稱呼，但又好親密。
我：「嗯？乜事呀。」
Q：「我聽日要去拍拖呀。」原來…係咁。
我：「男朋友都放新年假嗱？」
Q：「係呀，佢聽日開始放假。」
我：「咁咪幾好，可以連續玩兩日。」
Q：「我聽日朝早就去搵佢㗎喇。」
我：「上去佢屋企？」




Q：「嗯。」
我：「嘻嘻，真幸福，玩得開心啲。」
Q：「我驚你唔開心。」
我：「點會…只要妳開心，我就開心。」
我邊有資格唔開心吖…喺妳身上面得到嘅，那怕只有一點半滴，我都已經係賺晒，何苦要思想自虐。
Q：「係咪真係㗎？」
我：「真喇，我識妳day 1就有男朋友㗎啦，有乜特別喎，你不如驚Miss Tang唔開心重好啦。」
QQ，點解妳會擔心我會唔開心？妳擔心個點喺邊，妳又係點睇我？如果我唔開心妳又會點？
Q：「佢嗰啲係叫擔心，唔係唔開心。」
我：「唔緊要啦，Miss Tang都已經輔導咗妳，無人可以迫到妳決定啲乜，妳自己衡量啦，唔好出事就得，雖然我唔識個男仔，都唔想佢又案底。」




Q：「放心啦，我同佢唔係玩玩下，就算…可能有一日，佢激到我好嬲，或者會憎佢一世，都唔會咁害佢嘅，我唔係咁嘅女仔。」
我：「有時唔到妳話事㗎，衰十一係刑事，唔係妳唔㧻佢就得，萬一係妳媽咪要告佢呢？」
Q：「唔準呀！同佢斷絕母女關係㗎，如果係咁…不過呢，佢自己都亂七八糟，肯定以前都有搞到人衰十一，但我唔敢問佢。」
我：「妳問佢佢實知道妳個衰女包衰十一。」
Q：「咪係囉，不過又唔係我衰。」
我：「唉，細蚊條EX話佢手上有我同細蚊以前啲嘢，我都有啲驚。」
Q：「你咪係細蚊條EX囉。」
我：「唔係我呀，鎅傷我嗰條仆街仔呀。」
Q：「講笑啫，點呀，好驚衰十一留案底呀？」
我：「少少啦，雖然我都唔係矜貴嘅小朋友…但有案底都唔知點算好，到時可以明正言順派私煙。」




Q：「傻㗎咩！拉到要坐監㗎！」
我：「係㗎…聽聞都要坐幾個月到半年。」
Q：「咁我點算呀！你掉低我嗱？」
我：「傻啦，講下笑咋。」
QQ妳做乜喎…如果我有一日潦倒到要派私煙，妳都早就已經唔會再喺我身邊啦，但係妳會咁樣講，我又實在係好開心。
然後，女神就喺我膊頭上面瞓著咗到中環。