我怎可能是女神👸🏻獵人🏹（第一季更新至斷更為止）: 247

Q：「係咪想死呀！」
我：「嘩…嘩呀！咪搣！」
唔好諗多，佢係搣返我個肚啫，唔好諗住佢下下都要扯爛啲蛋嘅皮同麪包嘅皮先得㗎。
Q：「繼續打機啦，我都要忙喇。」
我：「妳快啲搞掂妳隻兵啦，佢越嚟越煩喇。」
Q：「乜兵呀？我都無收兵嘅。」
我：「呢隻呀！」我㧻一㧻電話mon指住佢頭像。
Q：「唔知呀，唔想理呀，由得佢啦。」
我：「人哋話想見妳呀，妳話點搞吖。」
Q：「可以點搞，都無得搞，你喺出面重有無識其他女仔friend吖？可以代我去見佢。」




我：「咪玩啦，無呀，妳當我agent咩，何來咁多女仔，細蚊同Carmen佢又見過。」
Q：「由佢囉，我永遠唔出佢都無辦法。」
我：「你唔覺得佢好慘咩？」
十足十額頭掛住紅蘿蔔圍住石磨轉嘅驢仔。
Q：「我都唔想㗎，邊有男仔會對個樣都無嘅女網友咁痴情，平時啲仔幾日呃唔到相就走人㗎啦。」
我：「咁即係話佢同嗰啲不知所謂嘅男仔唔同囉。」雖然我以前就係呃到二號EX相即狗衝…
Q：「無計喎，我無可能俾佢知道身份，一係你插盲佢隻眼囉，咁我同佢拍下拖又有乜所謂，幫佢J埋都重得呀。」
我：「嘩…乜妳係咁諗㗎？！」
Q：「咁既然唔會知道係我，呢啲好閒啫，純粹手板功夫嚟，當然，起碼要收返十個八個skin啦。」
我：「唔理你哋呀…唔好玩到佢自尋短見就得。」




Q：「你話吖，如果啲skin可以轉售幾咁好呢。」
的而且確，我係好鍾意Queenie，但有啲時候，我又會覺得佢好恐怖好得人驚，如果唔係同佢一齊住，瞭解到咁多嘢，我先唔敢對佢傾心。
Q：「我靚唔靚女呀？」佢指住自己幅相。
我：「我影梗係靚啦…但…妳做乜整到幅相啲色好似上世紀七八十年代咁。」我趁未復活就應下佢。
Q：「嗯，唔好咩？咁我換過個effect先。」
我：「係幾襯間豆花鋪嘅，不過，整到妳變到好似我媽咪個媽咪啲style咁。」
Q：「喂，你唔好亂講嘢呀，你婆婆重喺度㗎，過幾日唔係要去食飯咩？」
我：「係呀，去呀，都成兩個幾月無見過婆婆喇…」
Q：「乖孫嘞，哈哈…我好kai呀。」
佢講緊同風車一齊轉嗰段片。




我：「都唔明呢啲低B片點吸引到過百like。」
Q：「乜低B呀！嗱，我較下速度，再zoom in zoom out，睇下，係咪好吸睛呢？」
頂，我差啲理解咗做好吸精，雖然啲仔確實會J。
我：「對唔住，我諗返起今朝現場睇住妳，只會好想笑，哈哈…試咗十幾次先可以同一個速度。」
Q：「咪笑我呀！衰人嚟㗎！」
我：「喂！唔好，搶緊龍呀…」
其實同佢一齊住，有時又真係好鬼死溫馨嘅，就好似今晚咁…其實啲乜嘢埕埕塔塔關係名份唔係咁重要嘅啫，可以融洽咁相處，已經夠晒開心。