我怎可能是女神👸🏻獵人🏹（第一季更新至斷更為止）: 250

難得有日可以過返以前嘅生活，喺中心食飯盒，同小朋友打下康樂棋、乒乓波，睇啲唔知第幾N次睇嘅蠟筆小新，然後再過隔籬球場踢下波；咁呢啲都無乜好講㗎啦，我又唔係嗰啲識炒人二十比零嘅足球界男神，唔會有啲乜tic-tac-toe三劍俠嘅組合，街場都唔會有啲好似大軍咁嘅仆街喺度打茅波，因為佢一定會俾人圍揼死。
健：「喂！阿爽，你喺度呀？」
係呀，我喺度呀，如果唔係你撞鬼咩；我落少咗嚟啫，唔等於我唔可以喺度㗎嘛…
我：「點呀，一唔一齊踢呀？」
健：「踢條毛咩，你又唔同我講，阿媽迫我落嚟買大掃除用品咋，著住拖鞋點踢呀？」
我望一望佢，左手一個大嘅百佳袋，右手一枝金寶湯嘅好朋友綠水，睇嚟真係幾慘下；於是我就求祈同另一個靚仔換人，反正我都係志在過下日辰，有條茂利嚟同我吹下水都唔錯，就一齊坐咗喺球場側邊啲凳睇波。
健：「Kuromi今日唔得閒，而且成日都無覆我。」
睇嚟佢中毒已深無得救，無其他嘢可以同我講，一面愁緒咁喺度發牢騷；Kuromi就梗係唔得閒啦，今日全日走去喂仔，按道理佢哋而家應該食緊tea，我都唔知佢幾時返屋企。
我：「都無辦法嘅，新年忙啲唔出奇吖。」
健：「我咁樣同佢講嘢有無問題呀？」




佢遞咗個Messenger畀我睇。
健：『我今日晏晝到夜晚都會喺度㗎，如果妳得閒可以隨時搵我打。』外加一個單眼emoji。
我：「無問題吖，正常都係咁啦，又無迫佢玩。」
健：「但係佢由中午到而家都無覆過我。」
傻嘅咩，喺條仔面前覆你條麻煩友？Kuromi又點會咁蠢做埋呢啲引火自焚嘅行為呢。
我：「做乜要等呢，人哋會覆就自然會覆㗎啦。」
健：「佢會唔會唔鍾意我…覺得我煩…」
我：「你有無做過或者講過啲乜激嬲佢呀？」
健：「無呀，一直都無乜特別。」
就算有妳都唔知啦，不過Kuromi又點會將你放上心呢，傻仔嚟嘅，你同佢講我愛妳佢都當食花生。




我：「咁咪照繼續等囉，都無辦法㗎。」
健：「佢會唔會驚我鍾意佢，驚我想追佢，所以唔敢同我一齊打機？」
我：「咁男仔鍾意同女仔打機都好正常啫，唔一定代表咩，就算知你鍾意佢都唔一定要驚嘅，驚嘅話就一早ignore咗你啦，係咪？」
健：「如果我就咁樣…直接約佢出嚟，或者同佢表白，有無可能有少少機會成功？」