自己食完團年飯,就到serve人食團年飯;我今日好乖仔九點三就返到酒樓,話晒雙工都要勤力啲嘅,做下樣都唔會錯,點知我一入到去係全場爆滿,重要有好幾枱只係啱啱坐喺度;Angel姐姐呢,就繼續全場走來走去serve酒,睇到都知佢好辛苦,如果晚晚都要咁做實傷埋隻手都似。
至於阿健呢,走咗嚕掛,就算佢喺度我都唔會得閒搵佢,更加唔會得閒理佢。
馬:「呀爽,今晚畀心機做呀,雪櫃有袋嘢係畀你嘅,同埋頭先我哋伙記食團年飯剩咗啲,年年有餘打包咗三盒餸畀你,如果一陣得閒啲你又肚餓都可以食嘅。」
我:「多謝馬叔叔,我啱啱都食完團年飯嚟。」
馬:「咁拎返屋企做餸啦,開工先。」
嗱,即係咁,我就唔serve客嘅,所以啲阿姐就繼續做到一頭煙,而每當有人走呢,我就秒速閃過去執枱,可能啲客都知我呢個死靚仔無乜用,所以落單追單呢啲都唔會搵我。
A:「頂!我賣咗二百幾枝酒喇,重要未計啲阿姐幫手攞嗰啲!」
我:「如果一枝有兩蚊收,妳都有五嚿水喇喎。」
A:「唔好估啦,幾多都發唔到達嘅。」
我:「我都執咗十幾張枱喇,膊頭有啲痛。」


唔係講笑,連續做四日而且都係工作量偏高嘅,唔多唔少都有啲傷身,所以雙工係好合理嘅;至於Angel姐姐就多勞多得,我諗一枝最少有兩蚊掛,加埋最低工資四粒鐘百六,即係今晚佢至少會有六百幾七百人工,都唔差吖…如果QQ肯做又唔怕手痛我都想介紹佢做下。
我:「Angel…想問下,妳琴晚係咪唔開心?」
A:「嗯?周不時都唔開心㗎啦…」
雖然佢係咁講,但就係笑住嚟講嘅。
A:「無嘢喎,唔使擔心我,有工返有糧出已經好好,其他嘢我都唔想諗住。」
我:「都係…我解決到食飯問題已經好開心。」
正確啲嚟講係解決到QQ嘅食飯問題,佢嚟之前我本來每個月都有幾百蚊剩,可以買下game,做下啲無謂嘢,而家真係諗都唔使諗;不過呢,可以買到個女神同你住喺同一間屋,就已經乜都抵返晒。
A:「係呢,你之前一條友住咪好自由?」
我:「係㗎,不過都係上年先開始一個人住,之前婆婆會嚟湊我。」
A:「咁…有無帶女仔返屋企曳曳?」


我:「Angel…你問得咁直接,我會怕醜㗎…」
A:「咪扮嘢啦你,睇你個衰款都唔方乖得去邊,快啲講,溝過幾多條女?」
已有 0 人追稿