返到屋企一開門。
Q:「交叉仔!交叉仔!交叉仔!」
QQ佢今晚重未瞓,兩隻手搭住我膊頭喺度彈下彈下,認真嚟講佢又真係好鬼cute嘅,半夜三更重咁精靈;太大對比喇,啱啱先同個啤酒妹姐姐flirt完,一返到嚟就對返住個可愛嘅妹妹。
Angel對唔住,我屋企有呢隻嘢喺度,就算妳下面濕晒擘大大髀對住我都係唔會動情,雖然我好想玩係事實,但亦都唔見得妳會好似Carmen咁玩得。
我:「Queenie…妳…搞乜鬼…」
Q:「我有利是收呀!」
我:「年三十咋喎,咁早派利是唔啱規矩,妳媽咪都亂咁嚟嘅…」
Q:「嘻嘻,有乜所謂喎,而家咪年初一囉,過咗十二點喇,可以拆利是!」
我:「中國曆法計十一點換日做子時㗎,其實妳十一點就可以拆利是。」
Q:「唓,我點會唔知,以為你唔識咋嘛。」


雖然家道中落,佢媽咪重係封咗封長條型嘅硬卡紙金色利是畀佢,個樣就夠晒豪華喇,唔知個餡會係啲乜呢?起碼都要五百先對得住個封啦。
Q:「嘩!係金牛呀!」
我:「恭喜晒…多謝妳媽咪啦。」
Q:「不朽多謝佢,咁我可以唔使問你攞錢住。」
我:「嗯…妳媽啲錢唔知點嚟嘅呢…」
Q:「喂,閘住,唔準講落去,唔使你解釋。」
我:「所以妳要好好珍惜,唔好亂使呀…」
Q:「做乜喎,我媽咪有男人錢使都唔係好差啫,我諗嗰位先生OK我媽咪先會黐埋去嘅…」
我:「唔差呀,我都想做女人,妳夠有男人錢使咯。」
Q:「係呀,兩母女真係一擔擔,不知所謂。」


呢句我都十分之同意,可以咁樣掉低個女寄居喺男人屋企嘅女人真係唔知有幾多個,最神奇係佢又唔會擔心,又唔會問呀女點生活…一個搞唔好分分鐘呀女去咗做援交妹都唔知,雖然我打從心底覺得佢媽咪而家同做人私家雞無乜分別;我覺得婚外情係一回事,同男人玩係一回事,但如果為咗生活同金錢犧牲自己肉體寄居喺個男人度又實在係另一回事。
所以我唔可以攪QQ,我唔想佢覺得自己係私家雞…
一千蚊利是都好嘅,夠佢食兩個禮拜飯,咁我啲錢可以褪少少去做其他有意義嘅嘢;金牛做利是我咁大個仔都係第一次見,我諗對佢哋呢啲屋企嚟講好common㗎啫,不過呢,與其封大利是,不如畀下生活費自己個女重好啦。
但係又好矛盾,萬一佢媽咪對女女負返責任,QQ好可能就會離開呢個屋企,我唔捨得。
Q:「咦,你搦住咁大袋嘢嘅?嘢食嚟?」
我:「係呀,妳又肚餓豬?使唔使整畀妳食?」
Q:「唔使啦,啱啱先同媽咪食到好飽。」
我:「咁聽日先食囉,呢度有一底年糕同一底蘿蔔糕,估唔到我都有得分,跟住呢三盒係員工團年飯啲剩餘物資。」
Q:「好嘢!聽日有開年飯食。」
我哋兩個,就係咁簡簡單單迎嚟新嘅一年,雖然無乜享受,但一齊生活已經夠晒開心。
已有 0 人追稿