我怎可能是女神👸🏻獵人🏹（第一季更新至斷更為止）: 307

我：「咁…無計啦…都過咗去就算，呀，係呢，呢兩位仁兄會唔會為咗妳大打出手？」
A：「哈，唔想知，唔想諗，所以我都係早走早著算，費事佢哋唔小心斬死咗件，亦唔想佢哋錯手劈埋我，雖然係過得潦倒，但我未想死住。」
我：「係嘅…亂七八糟咁，走得甩就好。」
我喺度諗，如果QQ男朋友知道咗現況，可能都會想劈死我，實在係有啲驚。
A：「點呀，使唔使抽下水？」
因為我顧住喺度幻想Calvin同Benny比武搶親嘅狀況，一個唔覺意就失咗神眼定定咁望住佢心口上面嗰兩個男仔名，但我可以用人格擔保我唔係喺度望緊嗰兩粒我好鍾意望嘅嘢；俾佢咁樣問一問，我先醒起唔應該望到女仔嗰度咁實。
我：「Angel…」抽水？想㗎…但唔應該係而家。
於是我執返起佢件外套，好溫柔又gentleman咁披喺佢個膊頭度；雖然我係可以好似細路仔咁伸隻手入去摸下舒服下滿足自己…但日日喺屋企對住QQ都要忍㗎啦，唔爭在忍埋呢次；同埋我覺得咁樣嘅自己好似好成熟，好型，有啲自high。
我：「抽水嘅嘢遲啲先算啦，到我有心情嗰陣再問妳，而家天氣凍著返件衫先啦。」
A：「到你問嗰陣就無㗎喇，會兜巴車你。」


我：「係咁咋…乖，到時畀妳車到手軟為止呀下。」
A：「唉，見到上面嗰兩個名，正常男人都唔會想揸啦，係咪…有邊個想見到其他男人名。」
我：「未必嘅，總會有人愛惜妳嘅，一定會有。」
A：「希望啦，不過我一個都重未遇到。」
我：「其實紋身都可以洗返走嘅啫，如果唔鍾意。」雖然腦海入面啲記憶就點都洗唔走…
A：「我知…但洗甩佢重貴過紋上去一大截，我唔想嘥無謂錢呀，如果係為咗溝仔就更加…吖！係呀，我重有一個紋身係喺…」
我：「喂，Angel妳想點呀？！」
佢喺度解開條裙嗰粒鈕，我叫停咗佢。
A：「嘻嘻，我個名叫Angel喎，所以呢，我就喺陰毛上面紋咗對Angel's wings。」
我：「嗯，我知，OK喇，即係一對天使嘅翼。」


A：「好靚㗎喎，你唔想睇下咩？」
我：「唔使啦，我feel到係點，妳唔使客氣喇。」
A：「我真係覺得靚喎，就連啲陰毛都生得好靚。」
我：「Angel妳醉喇…唔好咁啦。」
Angel妳搞乜？係色誘我吖，試探我吖，定係點？不過論醉嘅話作為一個啤酒妹老司機睇怕就無咁快醉，反而我就開始有啲暈酡酡。
A：「我邊有醉喎，想畀你欣賞下咋嘛。」
Angel解開咗粒鈕，已經露咗條粉藍色底褲出嚟，正想拉開埋出嚟畀我睇…唔得，再睇真係會出事，我應承咗媽咪同QQ，唔可以咁樣；所以我就㩒住咗佢隻手，唔俾佢打開自己身體畀我睇。
我：「唔好啦，Angel姐姐，我怕醜呀，嘻嘻。」
A：「信你至奇呀，咪喺度扮細路啦。」
對住Angel，我都係想做返個弟弟多啲，我無嘢畀到佢，而且我心入面全部都係QQ；Angel唔同Carmen，㗎車係好決斷，有主見，識控制感情嘅人，點玩都唔會傷害到佢；但我睇得出Angel唔係，我唔想佢生命中再多一個不知所謂嘅男仔，如果可以，暫時呢一刻我做返個百厭嘅小朋友陪下佢就已經好夠。


Angel佢都扣返好自己條裙；或者總有一日我可以名正言順咁睇妳個身體嘅，我大個咗之後…未來嘅嘢無人知，一切都話唔埋。
A：「唉，好想做愛呀。」
Angel挨咗個頭上我膊頭度，低聲輕嘆。
我：「其實我都好想。」
A：「如果你可以大返幾年你話幾好呢。」
我：「對唔住。」
之後我哋都無出聲，然後我用手輕掃Angel嘅背脊，簡單嚟講即係叫佢唔好亂諗嘢。