Y:「嘩,你條友發乜神經呀?Queenie講一句你就唔虧扯到行晒咁,小心跨欄仆街呀。」
Q:「唉,啲傻仔係咁,我都無眼睇,係唔想有個虧仔坐喺我隔籬影響我心情。」
Y:「計我話,佢可能係J妳太多J到虧。」
Queenie一早就同我講過Yvonne係有仔嘅,據我嘅觀察佢暗地裡應該都係半個老司機,絕對唔係黃花閨女,可能同QQ差唔多,所以先會咁口沒遮攔講埋啲咁唔知醜嘅嘢。
Q:「妖,妳唔好亂噏啦,好鶻突,俾我知道嘅話實打鑊佢甘,再閹埋佢。」
我:「哎唷,妳兩個女神慳啲啦,唔係個個都想做兵㗎,虧唔虧由我話事,不過都係懶得J妳哋。」
算啦,反正都係假惺惺,我都係講大話算;呢幾日就懶啲抖下唔J QQ啦,因為前日已經俾Angel姐姐搞到虧空晒。
然之後就打鐘,各人亦都返去自己原來嘅地方。
我:「原來妳一早就報咗陸運會,唔同我講嘅?」
Q:「唉…我呢啲有頭有面嘅,好難推,費事啦,都係當玩下啫。」


我:「咁妳報咗乜項目呀?」
Q:「四百米同跳高囉。」
我:「哦…好似好犀利咁。」
Q:「到時你咪知囉,係呢,你真係識跨欄㗎?」
我:「我都唔知,我剩係知以前喺街得罪其他靚仔未試過有人追到我,啲扶手電梯咪通常兩條平排一上一落嘅,我可以一條跳過去另一條,然後又可以逆線行車,激到追我嗰個死死下。」
Q:「得喇得喇,我搵日叫社長借個鉛球同個欄畀你玩下嘞,我都唔想睇到你出醜。」
我:「無所謂啦,會有靚女惜返我。」
Q:「玩完先講啦,你唔好嗰日詐肚痛臨陣退縮呀下,唔好累我俾人話。」
我:「噢,乜我玩唔玩原來關妳事㗎?」
Q:「凡社員玩一個項目無論成績係點都有一分㗎,我帶挈佢攞到最少三分,唔想佢落空啫。」


我:「妳同社長好熟嘅咩?」
Q:「普普通通啦,我上年無玩項目,但就有玩啦啦隊,佢上年先中三,但就好熱心啲社務,讀書成績OK,係學校足球校隊,不過最重要都唔係呢啲,而係佢把口,由於得到先生歡心,喺無乜人爭嘅情況下通常搵中五做嘅主席就畀咗中四嘅佢嚟做…」佢把口…咪成個cold call sales,得個煩字。
我:「咁佢對妳有無興趣?」
講咁多,呢個先係重點。
Q:「你做乜咁問我呀,我點知啫。」
我:「會喺妳身邊出現嘅男仔,好難對妳無興趣喎,妳係右女神嚟吖嘛。」
Q:「如果你講到咁個個都對我有興趣啦…除咗你呢條粉腸。」
我:「原本無㗎,多謝妳爹地帶挈囉。」
我無講所謂興趣即係乜,總之就…唔係無囉。
Q:「辛苦晒你喎,上年…我哋用啲啦啦球全部都係佢整嘅…」


我:「乜嘢係啦啦球?」
Q:「即係用尼龍繩綁做一個波,啦啦隊攞喺手拂來拂去嗰個波呀,咁我哋練習嗰陣,佢會成日喺度囉,有時都會望住我嘅。」
已有 0 人追稿