我怎可能是女神👸🏻獵人🏹（第一季更新至斷更為止）: 362

Q：「嘩！你發乜神經呀？！」
我：「我…睇過可以放半年，計落同食飯差唔多平，所以咪買埋佢囉，橫掂妳都會食㗎嘛。」
無錯，剩返嘅三盒都俾我掃埋喇，呢個價我覺得放上二手網度分分鐘可以平手走人，唔買就嗔笨，亦都等QQ唔使擔心為食時無嘢落肚嘅問題。
Q：「你買到咁…睇到都厭，即時唔想食。」
我心諗，唓，講妳就咁講啫，冰箱長期都放咗四五包公仔蝦餃喺度㗎啦，又唔見妳話厭；我曾經做過實驗溝啲珍珠雞牛肉燒賣喺度，結果佢通常都係攞蝦餃先。至於厚皮水餃嗰啲，佢差唔多掂都唔會掂，係我煮完放埋一齊佢先會食。
我：「妳唔好食囉，留返畀我就啱，嗱，呢度係妳包指定嘅明治72%杏仁朱古力呀。」我遞咗畀佢。
Q：「嘩，真係有㗎？我好開心呀，你竟然捨得買畀我。」佢即場就打開個套明封膠。
我：「咁啱見到有…不過係幾貴，一盒仔已經等於半罐曲奇有多，不過新年…無所謂啦。」
Q：「放心啦，我一日食兩粒㗎咋，夠我有排食。」
我：「嘻嘻，妳驚變肥豬咋嘛，屋企咁多嘢食夠妳過個肥年喇。」我想㧻佢個肚但都係唔敢。




Q：「過完年好耐喇，不過我有分寸唔會俾你得逞嘅，係呢，你又會咁早返嚟嘅，重以為你會留喺學校睇下啦啦隊練習。」
我：「屋企有女神喺度，何苦要留喺學校同人爭呢，喺度睇妳飛釘重好過睇人打底褲啦。」
Q：「冬天衫唔係好覺啫，等夏天先睇啦，鹹濕仔。」
都黐鬼線，佢已經進化到唔係鬧我做乜成日昅佢，而係睇下自己係咪真係咁揚眼，重搵隻手指掃一掃粒釘，攪到即時突起咗。咁…無乜嘢嘅，佢剩係真空著住件背心攤喺度畀我睇都係咁啦。
今日就喺平靜之中度過，而喺我監察之下佢係食咗三粒杏仁朱古力，不過我就無㧻爆佢喇，費事畀佢打；而我都試咗一粒，真係好味好味好好味，朱古力好香濃，入面粒杏仁重係甘香酥脆…不過實在太貴我都係留返畀佢食，我用平價花街攝住牙罅先。
臨瞓前佢無端端捉住我講嘢。