我怎可能是女神👸🏻獵人🏹（第一季更新至斷更為止）: 364

我：「Queenie呀…想問而家要交乜功課呀？」
Q：「咪孔乙己嘅課後練習囉。」
我：「吓…幾時有樣咁趣緻嘅功課㗎？」
Q：「琴日咪問你做咗中文未囉，你重答我做咗。」
我：「妳唔係問我預習咩…」
Q：「預習寫喺書度㗎咋喎，你唔係咁都當功課呀？幫唔到你，自己同Miss Tang自首啦。」
頂，你個仆街科長，自己唔負責任就算啦，重要害埋我，本來你早十分鐘收，我都會及早發現未做功課，左抄一句，右抄一句，百鳥歸巢用十分鐘臨摹到份功課出嚟吖…而家俾你條粉腸害到我欠交功課，實在係雞毛鴨血。
我：「Miss Tang…」我只得死死氣地舉手道出實情，直頭想參科長一筆。
鄧：「你哋一個二個做乜呀，放新年假放到懵咗呀？係都要激嬲我…無做功課咁而家點算好呀？」
我：「這…下回還清罷！」難得星期五，就放學…




鄧：「你好嘢呀下！重要扮孔乙己嚟答我。」
呢個時候大部份同學都哄堂大笑，雖然我自知犯下過失，但都唔想Miss嬲嬲豬，所以我就搞搞氣氛等大家輕鬆一下，QQ就喺我隔籬搖頭歎息。
我：「難得我已經溫咗書，當然要學以致用。」
聽到我咁講，班上面頓時歡樂起嚟，就連QQ都已經忍俊不禁。
鄧：「咁乖仔呀，即係叫我考下你咁啫。」
我：「無問題吖，即管放馬過嚟。」
鄧，Q：「…」而其他同學準備食花生。
鄧：「作者喺邊間酒店打工？」
我：「就係咸亨酒店，絕對唔係咸享酒店。」
呢個易記，記住佢係淫業大亨就得。




鄧：「孔乙己用乜嚟做下酒菜？」
我：「茴香豆。」呢條題目簡直係侮辱我智商。
鄧：「個回字有幾多種寫法？」
我：「回字有四樣寫法，妳不知道嗎？」
我學著孔乙己的語氣和面貌…雖然，我係完全唔Q知到底真正嘅佢係點，但要扮一個低B嘅說書人，話易唔易，說難就當然不難。
鄧：「咁四種回字嘅寫法分別係點樣？」
我：「本書無講過，所以我哋唔使識。」
之前已經有另一個攪事嘅男同學問過Miss四種回字點寫，Miss只係寫多咗另外一種畀我哋睇，就係將中間個口嘅左右兩棟延長掂到頂同底；佢重同我哋講，每個朝代，各種民族，唔同嘅書法字體都有唔同嘅寫法，現代就有繁簡體，有時台灣啲字都唔同，叫我哋唔好深究啲異體字，隨時學得越多就錯得越多；之後又講到戰國時代嘅篆書喺七國都有啲唔同，所以秦始王先要統一文字，正所謂車同軌，書同文，默書同課本一樣就得。
唓，講得越多越係掩飾佢寫唔出四種回字。