今晚重要返工,唔想咁辛苦,所以我偷懶買咗兩盒燒臘飯就算,返屋企搬一搬啲餸就變雙拼飯,可以慳返四蚊,呢個係同QQ一齊住嘅其中一個好處;點知我排緊隊買飯嘅時候,就有個傻仔無挐挐send message嚟。
健:『喂,你個女神頭先著住校服玩啦啦隊喎!』
我:『乜鬼我個女神,係我隔籬位嘅港女啫…你唔係一早放咗學喇咩?』
健:『係呀,但品女group嗰邊好熱鬧,不停有人講緊,大家都話下個禮拜要留堂睇女。』
嗰啲乜group物group呢,我一個都無入,成班好似排住隊為眾女神提供兵力咁,入面肥矮柒毒乜都有,大部份都係溝唔到女嗰啲,雖然我都想八掛,聽聞佢哋會backup晒所有女神啲post同限時動態…但要我同佢哋圍威喂,免喇,加埋我同Queenie一齊坐實有好多柒頭會煩住晒。
我:『我咁啱留堂做功課喺現場睇到,咪又係咁,無乜特別啫,佢話佢上年都玩過。』
當然我費事話一早同佢約咗。
健:『屌,咁好彩嘅,你應該即刻叫我仆返嚟吖嘛,咁唔老友嘅!』
我:『吓?!係你話對呢啲女人無興趣㗎喎,同埋得嗰十分鐘唔夠,你仆到落嚟都散場啦。』
健:『唓,咁齋睇唔會蝕底嘅,我邊似得你,坐佢隔籬平時實昅到唔少好嘢。』


我:『有乜?係都要等夏天先啦,冬季校服有乜嘢昅?』
健:『你咁講,我唔使forward啲啦啦隊相畀你睇啦,係咪?』
我:『唔好!都要參考下,交流下嘅!』
睇唔係重點,我驚班友仔真係影到QQ走光,雖然阻止唔到幅相傳嚟傳去,都單聲畀QQ知啫。
過咗一陣佢send咗幅相嚟,caption係『你睇下,Bubble姐姐真係好大波。』,我鬼唔知咩,頭先佢都喺度,雖然只係train緊其他妹。
我:『你咁鍾意咪同社長講囉,關我乜事…』
健:『我想摸下咋,無其他。』
我:『同佢示愛囉,可能佢肯㗎,睇落咁nice。』
健:『咪玩啦,佢重大我兩年,有乜可能。』
藉口…乜都唔肯試,乜都唔敢做,乜都話無可能,咁點會成功?但偏偏就情傾絕對無可能嘅Kuromi,呢個世界就係咁荒謬;以我經驗,Bubble姐姐應該單身緊,死纏下佢絕對有兩三成成功機會,等佢知道有個弟弟俾佢迷倒,以佢性格應該都會開心,玩下玩下就…


我:『就係大先好,就算你衰咗佢都應該唔會唱你,唱師弟好無品㗎嘛,但如果你騷擾師妹你就死得,實全校都睇你唔起。』
健:『唔好啦,又唔係鍾意佢。』
我:『重點呀!係咪有Queenie相?』
已有 0 人追稿