【代糖故系列】《她被寄宿到屋邨男孩的家中》: 378

Q：「乜嘥精神，正經事嚟㗎，我要諗定下年搲啲乜嘢職位嚟做，社職好似都唔錯。」
我：「重有半年喎，咁快就要諗定？」
Q：「我唔係你呀，唔可以無所事事乜都唔理，我都要計下下年有機會拍到乜嘢人㗎，你明知我有男朋友重認定我去姣仔，都唔知想點…」
我：「但係…妳對瘟神好似特別nice咁…」
Q：「大佬呀，人哋好歹都係社長嚟㗎，花咗好多心力先上到呢個位，唔通你期望我好似對啲低B追求者咁對佢咩，關係都唔同…你係羨慕又妒忌嘅話咪自己爬上去做社長囉，我會一樣咁對你。」
社長？！我鬼識做咩，要同先生打交道，要籌組內閣，要開會謦活動，要睇住盤數，要哀契弟咁拉客玩陸運會，分分鐘重要睇高form師姐面色…
我：「唔好玩我啦，我無諗住做任何職務…」
Q：「咁你呷乜鬼醋？」
QQ攤喺我大髀上面，由下而上咁定睛仰望住我，質疑我呷其他男仔醋；但…邊係喎，乜我有資格呷妳醋咩，只係妳嘅態度…
我：「無呷醋…但喺學校…妳咁對我…」




Q：「咁唔係你想點？定係你好想我同你俾人講閒話，我驚你受唔住咋。」
我：「邊有咁嚴重喎，明眼人都唔會覺得我哋有嘢啦。」如果唔係被安排坐喺隔籬，可能呢世我哋都唔會有任何交集，只會互相成為對方口中嘅批鬥對像，咁都傳到緋聞真係搵鬼信。
Q：「你以為，就係睇落越無可能，啲人先會越八掛，新聞價值越高，Yvonne已經喺度質疑緊我做乜同你會謦得咁開心，其他姐妹都問我係咪要兵你，重問我你有乜貢獻。」
屌，啲八婆真係好Q煩，乜同隔籬位friend唔係天經地義嘅咩？上堂得兩樣嘢做嘅啫，一係就做功課聽書，一係就同隔籬位打牙骹㗎啦，我相信無一個人會百份百專心嘅，所以自然就會friend，我又唔係第一次同女仔坐，呢個係鐵一般嘅事實，但通常再調位之後連結就會無咗，好快此情不再；同埋，做朋友要講乜嘢貢獻嘅咩？而且一個屋邨仔就唔可以有貢獻㗎喇咩，我好想大大聲同佢班姐妹講，係我畀地方QQ住，係我搵錢養緊佢。
當然無可能咁做，佢哋關係一定會大亂。