我怎可能是女神👸🏻獵人🏹（第一季更新至斷更為止）: 383

QQ…妳唔會咁對我㗎可…不過我哋又唔係發展緊，佢又有男朋友；我諗呢趟渾水點都要撐落去㗎喇，無論佢對我係點都會繼續照顧佢。
我：「咁妳而家個男朋友點追妳㗎？」
Q：「好似…無乜喎，嗰陣同佢喺長笛班識嘅…係囉，點解佢好似唔使追我咁嘅，蝕底咗添，都係識得耐咗越嚟越熟，佢約我出嚟幾次，結果就一齊咗。」
咁即係點？！乜都唔做反而可以成功？重有，點解係長笛班？明明吹笛結果變咗吹蕭，曳得妳吖…
我：「咁妳又會接受佢嘅？學校咁多仔都失敗嘅話…」
Q：「嗯…可能因為成個班得佢一個男仔掛，佢都幾靚仔嘅，斯文企理，又鍾意音樂，中四已經考到鋼琴八級，會彈畀我聽，讀書都算係咁啦，叫做教到我，屋企環境唔差，同佢出街食嘢買嘢都係佢埋晒單，雖然我嗰陣其實唔使靠佢，但感覺上都算大方嘅，講嘢又唔會鶻鶻突突，都係喺埋咗一排，先開始…大膽親近我嘅身體。」
事實證明，無論起點喺邊，終點都係喺嗰度，就好似打golf咁，有人一桿入洞，有人打雀仔，有人唔執輸打多幾隻怪獸出嚟。
吓？！你問我一個屋邨仔點解識打golf？！我頂你個肺吖！唔準歧視窮人呀！嗱，你去執部二手PS3，都係三四百蚊，加隻全民哥爾夫嘅碟就會學得識㗎喇，我大大話話小學嗰陣都玩咗過百粒鐘，但部機而家喺個櫃入面封緊塵，都唔知開唔開到…呀，我都想玩PS4新版嘅全民哥爾夫，但等得PS4二手跌價PS5又出，加埋成日顧住打傳說，所以就算喇。
我：「哦，即係其實都係妳發姣。」
Q：「乜喎！我都係個正常女仔嚟㗎，想俾人惜下好正常咋，做乜係要話我發姣！」




我都唔知，可能我都想講講下就會成真，QQ會主動咁向我發姣，但其實佢間唔中都會似是而非咁向我發姣，就好似而家瞓喺我大髀度咁。
我：「無話妳唔正常，重正常過唔正常。」
Q：「嗯，所以你都要惜我！唔準嬲我。」
唉，人哋係你條仔，惜妳係天經地義…我呢啲叫做乜？攞苦嚟辛呀…
我：「不朽都惜妳㗎啦，係呢，就咁聽落，妳男朋友都幾吸引㗎喎。」
Q：「算係咁啦，不過一齊耐咗就好似無乜特別。」
我：「係妳要求高啫，相比之下我好似只係一條粉腸，同坺泥無乜分別。」
Q：「哈！你直頭係仆街仔嚟添，剩係識扮細路係咁抽姐姐水，用枝果汁酒就呃咗細蚊第一次，唉，真係無眼睇，都唔明佢兩個做乜會對你咁好，你呢啲男仔，應該快快手捉去閹咗佢就啱。」
欸…早知唔同佢講咁多，睇嚟喺佢眼中我嘅風評都唔係幾好，都係唔好咁隨便就畀佢知道我嘅心意，等所有嘢都保持原狀就好。
我：「我都知我唔值得女仔對我好嘅…係嘞，點解妳屋企咁有錢，成績又唔錯，但妳唔係讀嗰啲名校，直資女校嗰啲嘅？」




Q：「講起就好笑，咪多謝我個搵笨老竇同低B阿媽囉，不過而家咁都幾好，起碼唔會因為畀唔起學費而被迫轉校…喂，你呀，做乜今日咁多嘢問㗎？我要休息寶寶喇…」
我：「無呀，瞭解下妳啫。」
佢有對咁嘅父母，實在係我嘅三生有幸。