我:「沖乾淨喇,連頭都洗埋添呀。」
Q:「咁點呀,係咪要嚟揸我波喇?」
QQ重喺度做緊佢嘅sit up,但就已經拆咗塊mask落嚟;我都唔知我哋呢啲乜溝通方式嚟,可能真係只會出現喺我哋呢啲被迫同居非情侶關係嘅小朋友身上,除咗瞓覺外日日對住十幾粒鐘,重有乜唔講得喎;不過我覺得,好多嘢係講個膽,同埋習慣,經驗話我聽女仔其實無你想像中咁怕醜,只要你唔好鶻鶻突突,乜都大大方方講出嚟,最多都係俾佢哋鬧一餐;反而你收收埋埋黐埋去唔知想點圖謀不軌咁,就會好易搞到佢哋驚咗你而避開你…所以你問我係咪男不壞女不愛,又或者點解啲花花公子玩到出晒名都重可以繼續食女,我都唔知點答你好。
細蚊都想搵返我玩啦,係咪?
我:「無喎,過嚟幫下妳手啫。」就係坐喺佢隻腳上面等佢做sit up做得舒服啲。
Q:「古古怪怪咁,都唔知你想點。」
我:「係嘞,我今日有幫你輔導傻仔健,佢應該唔會咁快表白住,妳同佢講嗰幾句都幾大威力㗎喎。」
Q:「使乜講,我最鍾意摙碎啲男仔無謂嘅希望。」
我:「鍾意著妳呢個女魔頭實在夠晒三生有幸。」
Q:「乜喎,我起碼無呃人感情,無收兵拖住人時間,又無黐飲黐食,都不知幾仁慈,我重要犧牲埋自己形象,畀佢哋話我絕情。」


我:「妳唔犧牲呢邊,就要犧牲另一邊,到時啲人就話妳多情兼發姣㗎喇。」
Q:「是但啦,我只係唔想自己攞嚟煩,不過如果今時今日有人進貢嘅話我係好OK㗎。」
明明你男朋友幫妳埋晒單,我都已經叫盡力喂飽妳,果然…係小女子難養也呀下。
我:「嗯…係呀,阿健之前send咗張相嚟,我畀妳睇下吖,學校有人偷影妳。」
Q:「哈哈!乜料呀,咁嘅質素…唔係都J到呀?!」
「噗噗噗…」女神佢屈起條腰坐起身睇幅相,一笑之下可能某啲肌肉鬆馳咗,導致一啲有機氣體喺個身體入面洩漏咗出嚟,佢塊面即刻紅咗,本來笑逐顏開嘅佢變得沉默是金。
Q:「喂…你咁樣…望住我…乜意思呀…」
我:「女神放屁呢。」
Q:「咁…正常㗎喎…你唔係信啲人亂噏乜嘢靚女唔放屁呀?」
我:「咁…我又好似真係無乜聽過妳放屁喎。」


Q:「可以忍住慢慢放㗎嘛,又或者諗辦法令到佢唔會出聲囉。」
我:「吓,乜有辦法可以令到個屁唔響㗎咩?」
已有 0 人追稿