我怎可能是女神👸🏻獵人🏹（第一季更新至斷更為止）: 417

我慢慢地…小心翼翼地…神出鬼沒地…瓜田李下地，將個身軀移到去某兩個凍不提防嘅人嘅後面，偷聽佢哋嘅淫聲細語。
瘟：「喂，德爺，啱啱影到啲乜呀？」
社長口中嘅德爺，係我哋學校一個好出名嘅中六師兄，就連我呢個日日返學身在曹邦心在漢嘅低form生都知道佢嘅存在；佢包辦咗學校嘅攝影組，出版組暨校園電視嚟玩，由唔知幾時就開始會幫學校活動影相拍片，雖然身為中六生好似放低咗啲乜主席組長嘅銜頭，但到咗而家佢都重係攞正牌可以喺學校任何活動揸住部相機影相，絕對唔會有任何先生質疑佢，因為佢可以話係直屬副校長（活動及外務）管轄。
至於佢到底影過啲乜就實在無人知，總之學校網站，印刷品上面嘅相都係正正經經。
德：「你唔係懷疑我呀，瘟神。」
唓，原來咁多人會嗌佢做瘟神，呢個重大膽到當住佢面咁嗌；不過無辦法啦，鬼叫人哋係德高望重嘅中六師兄嚟咩，你呢個得中四嘅社長係無得反抗㗎喇。
瘟：「咁呢啲體育相好難影㗎嘛，我都懶得攞電話出嚟獻醜。」其實係體育相吖，定睇肉相？
德：「OK啦，啱啱頭先都重有啲陽光，用ISO1600就搞掂，唔會有太多noise嘅，你想睇邊個呀？」
瘟：「無所謂啦，你繼續play就得…嗯…欸…啊…嘩，呢幅影得好perfect喎，點解可以timing同角度都配合得咁好…件PE衫啱啱飄起咗，重見到個肚仔，連粒肚臍都對焦得咁清楚！」
哦，原來係QQ嘅相。




德：「梗係啦，而家景深可以後製搞掂，所以我用8.0光圈，保證成個人由頭至腳都輪廓分明，嗱，我放大埋畀你睇，連肚臍入面啲紋都走唔甩呀。」
哼，咁多年嚟影咗咁多相，我肯定你收埋大把好嘢留畀自己鑑賞使用…
瘟：「嗯，呀，犀利呀，精彩精彩…」
德：「做乜呀，你對呢條女有興趣呀？」
瘟：「唔係呀，咁係自己社嘛，點都關心啲嘅。」
德：「見係你，幅相又無乜特別，私人醒你嘞。」
瘟：「多謝晒喎，咁我等收相㗎喇，係呢，上年陸運會啦啦隊比賽啲video，你重有無留底？」
德：「乜嘢我喎，啲片係學校㗎，梗係有啦。」
瘟：「我哋紅社嗰段，可唔可以抄個copy畀我？」
德：「唔好話你啦，上年你哋幾個前任社長有啲都問過我，真係幫唔到你哋呀，先生話啲片比較敏感，如果流咗出街怕有尷尬情況，例如啲家長可能投訴，所以我哋都係crop咗幾段仔同埋screen cap咗啲相放上網咋，條原片連我都dup唔到，唔係話我信唔過你唔想幫你呀。」




瘟：「原來係咁樣呀…不過都明嘅。」
德：「又唔使咁灰嘅，搵日我帶你去剪接房度駁streaming server睇，我account係睇到抄唔到，不過今日大家都唔得閒，下次先啦。」
瘟：「無問題，記住你last day前搵我就得。」
德：「重有排啦，之後我都可能返嚟嘅，不過，明明你就日日對住啲啦啦隊喺度練，因乜解究重想攞返條片呢，現場睇…重立體咁滯啦！」
瘟：「你知啦，我係近距離睇住啫，但我身為社長唔可以攞部電話出嚟影咁肉酸㗎嘛，係人都知我想昅嘢啦，而且重有兩位文書康樂姐姐昅住我，我直頭係郁不得其正，有苦自己知…」
德：「係咪呀，我重以為你一腳踏兩船，一次過搞掂兩個師姐咁勁揪添。」
瘟：「咪傻啦，雖然佢兩個係睇落幾OK，但一個已經有仔，另一個就收兵兼同人曖昧，我玩唔嚟呀…你睇個樣都知係調返轉我俾佢哋玩啦。」
我見已經聽到晒啲有用資訊，就決定好似隻井底之蛙咁跳出嚟打草驚蛇嚇佢哋一跳！
各位小朋友千祈唔好學，因為蛇食青蛙。