認真,我通常都係推女仔落床,好少可係拉女仔落床,重要係貼住我呢邊;QQ件衫唔鬆又唔緊,雖然未至於係開胸闊領畀我打晒入去,但真空嘅肉球喺地心吸力嘅引領之下…啊!係麥樂雞呀!Bell shape!一雙吊鐘,a pair of bells!
呢種柔軟嘅擺動,就好似晶瑩剔透嘅水滴咁,形體會隨住外界嘅影響而千變萬化,睇得我如痴如醉。
我:「係呢,點解今晚要拉筋嘅?」
Q:「因為可以令身體產生多啲血清素,促進血液循環,提高瞓覺質素,聽日體力好啲,對做運動都有幫助。」點解佢識咁鬼多嘢㗎…
我:「妳好似真係好想贏咁。」
Q:「贏就無可能㗎喇,但都唔知有邊啲人參賽,未必有人墊底,我只係唔想包尾。」
睇怕就係佢呢啲心態,令佢能文善武,做乜嘢都綽綽有餘…係唔識做家務。
Q:「好!輪到你…」到佢拉返我個人。
我:「嘩嘩嘩…我條腰!妳咁大力嘅…」
就係咁,我哋互相拉扯一連換咗好幾個動作,極端延伸所帶嚟嘅痛覺令我唔記得咗眼前呢個其實係玲瓏浮凸嘅絕世美女,小雞雞亦都保持冷靜無變成大鵰…無錯,基本上我為咗舒服都會保持真空狀態,呢點我同佢係不遑多讓。


Q:「捉住我隻手。」然後佢將兩隻腳擺成一個L嘅動作,左邊向左,右腳向天,搭咗上我左邊嘅膊頭上面。
我:「女皇…妳呢個動作係想點?」
Q:「放心,我係一丁點想挑逗你嘅意思都絕對沒有嘅。」唔係有一丁點,係有好多丁點?係咪?
佢隻腳板底就放咗喺我左邊面嘅隔籬,傳嚟陣陣學生妹美腿嘅香氣,就算聞唔到都睇到!
我:「我好放心,絕對無一丁點嘅非分之想。」
Q:「因為唔係一丁點,而係鋪天蓋地,係咪?」
點解我哋諗啲嘢咁鬼似嘅…
我:「無啲咁嘅事囉,我都不知幾咁乖。」
Q:「係咩,你唔好俾我知道你有反應呀。」佢一路講一路用腳趾仔夾我隻耳仔,呢個唔係挑逗咁點先係,女神妳分明引人犯罪再送官究治嘅啫。
我:「如果有反應會點?」


Q:「可能會用右腳掛落你隻雞雞度,又或者…幫你拉下條子孫筋睇下最長可以去到幾長。」
螻蟻都尚且偷生,只要我雞雞一息尚存,都要保持冷靜,古語有云槍打出頭鳥…
QQ佢圖謀不軌咁望住我,膽小如鼠嘅我就唯有避開佢嘅眼神;移落少少就變咗雙球雪糕,雪糕唔緊要呀,最大問題係雪糕上面嗰兩粒夏威夷果仁…欸…其實又無夏威夷果仁咁誇張,只係呢個term會令我諗起啲跳草裙舞熱情如火嘅姐姐仔;唔得,明明日對夜對乜都睇過我點解重要咁鹹濕喎?自愧不如嘅我唯有低頭反省。
已有 0 人追稿