我怎可能是女神👸🏻獵人🏹（第一季更新至斷更為止）: 435

訓：「搞乜鬼呀！你兩個，遲咗一分鐘喇喎！」
我：「對唔住，雖然犯錯嘅係巴士司機，但無辜嘅我哋係甘願接受懲罰嘅。」由於我以前都唔係乖，好清楚啲麻煩訓導嘅脾性，亦唔會嘥精神同佢哋糾纏，反正我老竇唔會得閒鬧我，班主任Miss Tang亦都惜我哋，唔會好似隔籬班啲黐線婆雙重鬧，所以我只想速戰速決。
喺個訓導諗緊再點孖叉我哋嘅時候，其他幾位同學亦都跑到嚟，加埋有六個同學；我心諗，有本事你就記名，我唔信你有帶紙筆。
訓：「無眼睇你哋！快啲去跑道排隊！」
然之後我哋就急急腳咁歸位。
康：「係…係咪…無事呀？」
我：「無啦，唔使咁驚，安全抵達！」
去到跑道搵返自己嗰班，Miss Tang啱啱喺度點緊名，見我哋遲少少佢都無出聲。
然後就係各班排好隊，聽校長廢噏，乘機可以打個盹，打到周公都盹埋為止；點知唔使下刪一千字，佢講咗一分鐘都無，可能佢都想吞泡（pok1）白逗人工大家開心。
之後個咪就交咗畀大會司儀旁述老師，首先就係吩咐我哋跟返自己個社坐返喺各自看台，呢個從來都係一個大問題嚟…我紅健綠康藍，我親信又唔多，都唔知一陣坐邊先好；雖然話最後通常都會坐到亂七八糟，但一開波始終都要畀下面，如果唔係俾啲低能訓導趁未有賽事罰我一條友落場跑四百助慶就唔係幾好，我唔想出名住。




上到看台，好多人都喺度你眼望我眼，呢個絕對係每年一度最難分配嘅項目嚟，我寧願佢出個座位表迫我哋跟住嚟坐聽天由命好過；你知啦，有時同班都無講多兩句，而家先坐埋去扮friend實在係多麼的尷尬，我又未至於會放肆到喺學校撩其他班甚至其他form嘅師姐師妹；不過有啲同學就會因為重遇以前嘅好友而格外興奮。
我決定挨喺低排欄杆睇清楚狀況再決定，或者坐到最高自閉瞌下眼瞓未嘗唔係一個好選擇。
瘟：「呀爽同學！好快就要落場喇喎！畀心機！」
見到佢握實拳頭鼓足幹勁朝氣蓬勃咁嘅樣我實在唔知點好，我都知陸運會係你哋每年最大嘅項目，但我實在唔太明咁樣自high其實有乜意思…都明嘅，讀書叻，運動掂，有少少樣，受歡迎，做社長，攞嚟溝女已經好禁使。