豬:「七個人…可能有啲難攞位…」
U:「你知就好啦!重望住我?唔係要我哋女仔攞位呀?」佢望住肥豬嘅眼神,就好似平時瞓導捉我哋無攝衫或者著有花紋襪嗰種…
幾個女神成日喺埋一齊,普通男仔其實正常都唔會對佢哋打乜主意,但如果細心觀察下佢哋,又會發覺每個都各有特色同難搞之處;QQ,難服侍;Yvonne,令人難受嘅難頂;Zilvia,難以理解同接近;Uranus,難以反抗…
Q、U、Y、Z…連個名都刁鑽過人,都唔知有無夾埋,話雖我自己都不遑多讓啫。
豬:「得得得…只係,我驚大枱要等好耐…」
U:「無人話好想同你坐囉!分枱都得㗎,總之要俾我睇到你係度做緊嘢就得。」都唔知係同女神嚟食飯吖,定係同老細,唔明點解咁多男仔鍾意投懷送抱自取滅亡。
細龜一副不問世事嘅樣,我都唔好意思睇住肥豬自己一個承受壓力,所以就陪佢入去打探一下;正當個侍應都諗緊點派位嘅時候,好好彩有枱白領啱啱埋單,於是我就去門口掐埋佢哋幾個入嚟;肥豬一早就坐咗喺最入,Uranus亦都順勢封喺佢隔籬,細龜就即刻黐返住肥豬…咁我,都無得揀啦。
Q:「唉,又要對住你,真係無癮。」
我:「乜喎,家陣坐妳隔籬好失禮妳咩…」
Y:「做乜呀,你兩個耍少一日花槍就唔安樂呀?」


Q:「閘住,唔好亂講,我同佢河水不犯井水,就算妳做我哋謠言都唔會有人信啦。」
我:「咪就係!雖然我讀書唔叻,但以我有限嘅智商,明眼人都知我唔會低B到黐埋去啲咁㤿憸聲悶嘅女神身邊啦,正所謂君子不立危牆之下。」
Q:「君子?好笑,我淨係知君子恥其言而過其行,你照下塊鏡先啦,知唔知乜嘢係長戚戚?」
我:「唔知喎,咁妳係乜?女神袒蕩蕩呀?」
Q:「收啦你,你連個坦字係禮衣邊定土字邊都唔識分啦,唔好曲解論語唔該,失禮死人。」
Y:「你兩個…唔係真係幾夾咩?」
Q:「啋過妳把口!」咦,Zilvia竟然喺度笑。
妳個麻煩QQ,知唔知乜叫此地無銀三百兩?
U:「我唔理你,最少同我呢餐飯諗好個地點!」
對面又係另一個漩渦嘅中心,懶理呢邊嘅好事。
已有 0 人追稿