我怎可能是女神👸🏻獵人🏹（第一季更新至斷更為止）: 448

Y：「乜…你哋兩個識㗎？」點知佢問完之後，兩個主角都望住佢但就唔答佢，氣氛實在係…
U女神隻眼離開咗肥豬部電話，望一望而家乜環境，再輕描淡寫咁講：「係呀，有乜出奇？佢兩個中一同班，開學嗰陣一齊坐過兩個月。」
原來係咁…點解我讀到第三年先有得同女神同班嘅，唔通我前世做得太多陰騭嘢？
Y：「吓…你兩個一齊坐咗兩個月，咁有無講過嘢㗎？」真係好問題，QQ前面個女仔都悶到傻，唯有間唔中擰轉面同QQ謦下欬。
呢個時候細龜望住我，Zilvia就望住QQ，好似諗緊點樣答Yvonne問題，過咗兩秒Zilvia開口先。
Z：「有呀，早晨囉…」
龜：「Bye bye囉…」
Z：「重有唔該…」睇怕就係傳功課或者係互相交換默書改嗰陣嘅暗語。
Y：「即係一日加埋都唔知講唔講到十隻字，哈哈！」佢同QQ一個小息應該已經係佢哋一百倍。
Q：「咁細龜本身就好少出聲，難怪嘅。」




我：「都唔係嘅，如果你同佢講啲佢鍾意嘅嘢佢都幾多嘢講㗎，例如乃…」
龜：「喂喂喂…喂喂！」佢好緊張咁截停咗我。
Y：「奶？乜嘢奶呀…」真係夠晒易惹人誤會。
龜：「無呀…妳哋唔好聽阿爽佢亂噏。」
細龜佢真係好怕醜，就算男仔佢都好少會同人分享佢自己鍾意乜，係我初初讚乃木坂靚佢先至會唔避忌咁同我講；至於QQ，當然就知道呢個宅男係鍾意啲乜㗎啦，不過佢唔會特別關心。
Y：「好在妳又真係全日唔出聲都得，無所謂啦。」
Q：「其實如果無男仔喺度，Zilvia都可以好多嘢講㗎。」
Z：「邊…邊係呢…」佢塊面已經紅到上耳仔。
Y：「係同妳多嘢講啫，都唔知妳兩個係咪有路。」
Q：「係都我同妳有路先啦，唔係咩？」




Y：「唔敢同妳仔仔爭，我唔想俾人講壞話搞到不停打乞嗤。」
救命…有無女神翻譯字典？平時佢兩個小息喺度吹到天南地北已經令人搲晒頭…而家咁齊人講啲嘢就更加好似暗號咁。
好在啲嘢食都開始送上嚟，最快嘅當然係兩個學生餐，細龜見到碟意粉就即刻攞起枝叉轉嚟食，咁我…在公在私都要等埋QQ先嘅。
跟住就到QQ嘅焗飯同Yvonne嘅鑊仔牛柳。
順帶一提，我知道QQ唔方便喺佢哋面前嗌學生餐，但佢已經輕手咗㗎喇，焗飯係貴十四蚊啫，zero檸樂就再加六蚊，不過罐裝zero加冰底檸檬另上點都值回票價嘅…點都抵過另外嗰三個。
豬：「做乜咁執著要近個海啫，學校講到明低form班會活動係唔可以玩水㗎！」