我怎可能是女神👸🏻獵人🏹（第一季更新至斷更為止）: 456

Y：「哎喲，你做乜咁錯蕩過咗嚟嘅？」
日頭真係唔好講人，尤其係壞話。
我：「係呀，Yvonne姐姐，有乜可以幫到妳？」
Y：「作死你呀！我邊忽似你姐姐呀？」
我：「咁Yvonne妹妹，有乜可以幫到妳？」
Y：「咪一早叫咗你唔好扯晒旗讕醒㗎啦，乜都未玩過就走去報跨欄，而家真係好似我講咁仆街喇，唉，睇到都覺得痛呀…」
哦，多謝妳嚟關心我喎，收到晒。
我：「哈哈，係嘅…第一次玩跨欄，估唔到去到最尾個欄先出事，不過又衝到線唔係包尾，唔緊要啦，有Queenie嚟安慰咗我無咁痛㗎喇。」
Y：「拜託你唔好咁多情諗咗去第二度呀，佢都係唔想你太過傷心咋。」
我：「放心啦，佢頭先其實係落嚟笑鳩我呢個低B仔，妳唔使擔心我對女神有非份之想。」




Y：「知就好啦，懶得理你。」
其實Yvonne唔係一個人，Zilvia一直喺佢隔籬，Y字頭走咗之後Zilvia對我露出咗個尷尬嘅表情，再揮揮手同我bye bye；我諗…靜音女神可能先係最好嘅女神，但溝通唔到，日日對住佢呢個冰冷嘅面孔都係唔會好受。
我同自己講，QQ一定係最好嘅。
健：「服咗你，係你先可以同佢哋溝通到。」
我：「哦，無乜嘢㗎咋，當佢係隻無牙嘅狗，剩係識吠又唔識咬人嘅，由得佢就好。」
健：「呢啲咁嘅女人以為自己有幾巴閉，我唔信有仔哽得落佢囉，肯定係毒閪嚟嘅。」
乜話？！毒撚我就聽得多，毒閪真係第一次聽，健仔你狠毒到吖，抵你無女睺。
我：「咁你就大錯特錯喇，佢係有仔嘅。」
健：「吓？你點解知㗎？」
死火，呢個係QQ私底下同我講嘅，但按道理我同佢嘅表面關係唔應該會觸及呢啲話題…




我：「無呀…估㗎咋，佢哋平時成日吹水，間唔中我都會聽到少少，合理推測就係咁。」
健：「屌，肯撚定佢條仔係當佢私家雞，為咗有得扑先忍辱負重，如果唔係點頂得順。」
我好想覆佢膚淺兩粒字，不過算啦。
我：「都係嘅，以佢姿色，係仔都食得落。」
健：「咁如果齋計外表，成班女神都係上菜添。」
我覺得…呢位兄台確實有需要扚去思想再教育，不過算啦，我都唔知點幫佢好。