我怎可能是女神👸🏻獵人🏹（第一季更新至斷更為止）: 460

再過多陣，就到咗差唔多放學嘅時間。
今日攞到個銅牌，知足少少都叫做好滿意嘅成績啦，話晒唔計中一㞗掟木球今次叫做第一次落場，雖然發生意外係有啲樣衰，亦摧毀咗另一個攞牌嘅大好機會。
不過，係咪都可以慶祝下？佢叫我玩陸運會我有好努力咁跑，佢都入到決賽，今晚係咪可以同佢食好啲呢？去我公司外賣隻龍蝦返去？濕滴滴好似有啲麻煩，定係買半打瀨尿蝦好呢？應該重平少少，雖然我唔識亦唔想剝殼…抑或，橫掂都係，約佢去第二度無我哋熟人嘅地方堂食，但著住學校PE衫又好似周身唔自在。
唔理喇，畀QQ拍板啦，使少少錢同佢食餐好，等佢開開心心，再兌換我嘅兩個香吻；跨欄項目我有落場分一分，佢唔會發茅唔計數掛，雖然少一啖我都無乜嘢嘅。
Q：『我有嘢做，遲啲返屋企，唔好等我。』
我：『嗯？做乜？去邊呀？』
Q：『返一返學校啫，無乜特別。』
聽到佢咁講，我個心即時凍咗落嚟…
返學校…斷估唔係同姐妹一齊，睇怕就係…
諗都無用，佢有自由，而且佢又唔係我邊個…




至少佢有通知我，已經盡咗佢嘅責任。
好快就到咗放學時間，我同肥豬細龜唔同路，所以就搵返健康兩個先，然後一齊離開運動場行去搭巴士，將今朝半分鐘多啲跑完條路再行多次。
康：「你個樣做乜咁sad呀？話晒都叫有個牌吖。」
健：「你唔係一個唔夠要攞兩個呀？唔好咁貪心啦，雖然你咁樣趴街退出決賽係好唔抵。」
康：「唔緊要啦，你係搏到盡一時失控啫，又唔係包尾出意外，大家都明㗎喎，唔會有人笑你。」
健：「又係你話落場行兩個圈玩下攞出席分就算，你而家咁樣算係點呀…」
我：「你哋…唔會明㗎喇。」
唔通同你哋講…因為我個『哎吔』女人唔返屋企而唔開心咩，就連我都唔明自己點解會咁。
康：「見到你個衰樣就連我都down埋，我而家重要趕去補習社上堂呀，陰功。」
我：「哦，幾好吖…如果可以我都想一齊補。」




康：「玩嘢呀！唔鬼理你…」
然後就等巴士，巴士到，上車，去下層後排坐。
正當架巴士閂門準備開車嘅時候，有一大堆學生跑過嚟又截停返㗎巴士，跑頭位嘅係瘟神，然後黃藍社社長，跟住德爺，再到瘟神兩個護法，QQ…加埋各個幹事；成班友仔嘈到街市咁，三個社長喺度吹噓邊個短跑跑得最快，黃藍兩社社長不約而同咁話係讓師弟喎，成架車嘅人就喺度聽佢哋演講，真係夠晒失禮死人；最後，佢哋一干人等上晒上層。
好，眼不見為乾淨。
康：「聽日搭早一班車啦，我唔想遲到呀，唔係次次都可以咁好彩㗎。」
健：「知啦，見過鬼都怕黑，唔想一落車又要短跑。」陸運會都唔跑下，幾時跑？
我：「嗯，OK。」
我無心情聽佢哋講乜，只係諗緊而家QQ會唔會坐咗喺我頭頂，而又同緊邊個坐…係呢，點解Bubble唔同佢哋一齊嘅？