我怎可能是女神👸🏻獵人🏹（第一季更新至斷更為止）: 467

Q：「跌到一仆一轆嗰隻吖嘛，如果你有意思可以去做佢隻兵㗎，不過唔知有無兵糧派喇。」
我：「吓，點解咁講呀？」
Q：「佢唔係好吸引咩？又做得嘢，運動又叻，身材又fit，個樣都非常唔錯。」粗眉大眼，為人爽朗果斷，做嘢進取直接，把口可以隨時將死人哋，唔會搞埋啲小女生手段，呢個係我對佢嘅印象。
Q：「佢屋企做高級凍肉生意㗎，前幾年經歷過一次低潮，佢主動幫屋企盤生意開Facebook Page做marketing，自己設計促銷廣告，重搵埋網上面有邊啲共享運輸可以做到少量凍肉速運，後尾佢哋屋企搵咗間IT青年工作室幫佢哋做網頁營運同線上交易平台，而家好多嘢都會經佢手㗎。」
我：「點解…妳哋個個都咁叻…」
Q：「我唔叻㗎喎…係識讀下書啫，有時啲嘢迫到埋身，就要做㗎啦，你而家識返工都好叻…不過Uranus呢，佢成日都覺得啲男仔廢，唔明佢哋點解乜都唔識都敢溝女，所以到而家都係A0嚟，咁當然都會有啲傻仔埋佢身，但佢就對啲仔好差，亦都來者不拒，有禮物會照單全收，如果你睇唔開都可以搵佢自虐下，我都想知有無仔可以感動到佢。」
我：「雖然…佢有好多優點，但我未至於咁睇唔開…」見到肥豬喺佢面前變死豬都咪話唔驚。
Q：「我都唔知…佢咁樣係咪好事嚟，雖然我哋咁細個談戀愛好似好無謂，重有呀，佢喺屋企雖然好精明，出到嚟玩就好似變咗另一個人咁，周不時揀埋啲得個樣嘅餐廳嚟中伏，見到啲無謂嘢又成日話買買買，雖然佢一定負擔得到，試過我同Zilvia被迫要陪佢抽啲自己唔鍾意嘅Pop Mart公仔，我而家嘅話…可能真係會say no。」
我：「嗯，咁…Zilvia平時都係咁靜㗎？」
Q：「唔係嘅，剩係得我哋幾個嗰陣咪多啲嘢講囉，有男仔喺度嗰陣通常都係咁。」




我：「佢好驚男仔？點解會咁嘅？」
Q：「你哋夠大把男仔唔敢同女仔開口講嘢啦，好似你咁口沒遮攔咩，你當係啦，原因無謂提。」
我：「佢…係咪俾男人侵犯過？」
Q：「你…讀書嗰陣又唔見你咁叻…」
我：「我都係隨口估下㗎咋…」
Q：「喂！呢件事係得我知㗎咋，你千祈唔好同任何人講呀，拜託你！」
我：「放心啦，關於呢啲嘢我都好認真嘅…咁，佢無乜事吖嘛？」
Q：「未算係好嚴重嘅…喺佢六年班嗰陣，有一日放學搭校巴返屋企，咁佢係最後一個站得返自己一個落車，嗰日個褓姆咁啱病咗得返個司機，臨落車前個司機話佢條校裙污糟咗，然後就揭起佢條裙嚟睇，同埋掃佢個心口…」
我：「咁變態！六年班嘅女仔都攪？！」
Q：「唔係你以為，其實做女仔有時都好辛苦。」




我：「咁之後點呀？有無報警拉咗個校巴司機！」
Q：「呢個…最後佢決定唔講出嚟，只不過以後唔再搭校巴，寧願行半個鐘有多返學校。」
我：「吓？！點解要姑息養奸呀？」